ಮನೆ ಪತ್ರ ಅಡ ಇಟ್ಟು 'ಲವ್ ಗುರು' ಮಾಡಿದ್ರು ಪ್ರಶಾಂತ್ ರಾಜ್!

ಚೊಚ್ಚಲ ಚಿತ್ರಕ್ಕೆ ನಿರ್ಮಾಪಕರು ಸಿಕ್ಕಿಲ್ಲ

ಯಾವುದೇ ಸಿನಿಮಾ ಹಿನ್ನೆಲೆ ಇಲ್ಲದ ಪ್ರಶಾಂತ್ ರಾಜ್ ಸಿನಿಮಾ ಮಾಡಬೇಕೆಂದಾಗ ನಿರ್ಮಾಪಕರು ಸಿಕ್ಕಿಲ್ಲ. ಪರಿಚಯ ಇಲ್ಲ, ಸಿನಿಮಾ ಮಾಡಿಲ್ಲ ಎಂಬ ಕಾರಣಕ್ಕೆ ಯಾವ ನಿರ್ಮಾಪಕನೂ ಮುಂದೆ ಬರ್ತಿಲ್ಲ. ಕೊನೆಗೆ ತಮ್ಮ ಸಹೋದರ ನವೀನ್ ಅವರೇ ಸಿನಿಮಾ ಮಾಡಲು ಕೈ ಜೋಡಿಸಿದರು. ಕೆಲವರನ್ನು ಪಾಟ್ನರ್ ಮಾಡಿಕೊಂಡು ಪ್ರಾಜೆಕ್ಟ್ ಆರಂಭಿಸಿದರು. ಸಿನಿಮಾ ಶುರುವಾಗುವುದಕ್ಕೆ ಒಂದು ವಾರದ ಮುಂಚೆ ಈ ಚಿತ್ರ ನಾವು ಮಾಡಲ್ಲ, ನಮ್ಮ ಹಣ ವಾಪಸ್ ಕೊಡಿ ಎಂದು ತಕರಾರು ತೆಗೆದರಂತೆ. ಇದರಿಂದ ನಿರಾಸೆಗೆ ಒಳಗಾದ ಪ್ರಶಾಂತ್ ರಾಜ್ ಕೊನೆಗೆ ತಮ್ಮ ಮನೆಯ ಪತ್ರವನ್ನು 10 ಲಕ್ಷಕ್ಕೆ ಅಡ ಇಟ್ಟು ದುಡ್ಡು ತಂದು ಕೊಟ್ಟು ಸಿನಿಮಾ ಆರಂಭಿಸಿದ್ದರಂತೆ.

ಗಣೇಶ್ ಜೊತೆ ಮಾಡಬೇಕೆಂಬ ಆಸೆ ಈಡೇರಲಿಲ್ಲ

ಮೊದಲ ಚಿತ್ರವನ್ನು ಗಣೇಶ್ ಜೊತೆ ಮಾಡಬೇಕೆಂಬ ಆಸೆ ಹೊಂದಿದ್ದ ಪ್ರಶಾಂತ್ ರಾಜ್, ಅವರನ್ನು ಭೇಟಿ ಮಾಡಿ ಸಿನಿಮಾ ಕುರಿತು ಚರ್ಚಿಸಲು ಸಾಧ್ಯವಾಗಲಿಲ್ಲ. ಮುಂಗಾರುಮಳೆ ಯಶಸ್ಸಿನ ಬಳಿಕ ಗಣೇಶ್ ಬ್ಯುಸಿ ಇದ್ದ ಕಾರಣ ಸಿಕ್ಕಿರಲಿಲ್ಲ. ನಂತರ ಗೆಳೆಯ ಸಿನಿಮಾ ನೋಡಿ ತರುಣ್ ಚಂದ್ರ ಅವರನ್ನು ಮೆಚ್ಚಿಕೊಂಡ ಪ್ರಶಾಂತ್ ಅವರನ್ನು ಆಯ್ಕೆ ಮಾಡಿಕೊಂಡರು.

ರಾಧಿಕಾ ಮೊದಲು ಒಪ್ಪಲಿಲ್ಲ

'ಮೊಗ್ಗಿನ ಮನಸು' ಪಾತ್ರ ನೋಡಿ ಮೆಚ್ಚಿಕೊಂಡಿದ್ದ ಪ್ರಶಾಂತ್ ರಾಜ್, ರಾಧಿಕಾ ಪಂಡಿತ್ ಅವರನ್ನ ನಾಯಕಿಯಾಗಿ ಆಯ್ಕೆ ಮಾಡಿಕೊಂಡರು. ಆದ್ರೆ, ಆರಂಭದಲ್ಲಿ ರಾಧಿಕಾ ಒಪ್ಪಲಿಲ್ಲ. ನಂತರ, ಅವರ ಮನವೊಲಿಸಿ ಕಥೆ ವಿವರಿಸಿದರು. ಕಥೆ ಕೇಳಿದ ಬಳಿಕ ಲವ್ ಗುರು ಚಿತ್ರಕ್ಕೆ ಓಕೆ ಎಂದರು.

ಕಾರ್ಮಿಕರಿಗೆ ಸಂಬಳ ಕೊಡಲು ಕಷ್ಟ ಆಗ್ತಿತ್ತು

ಎಲ್ಲರಿಗೂ ಅಡ್ವಾನ್ಸ್ ನೀಡಿ ಕೆಲಸ ಆರಂಭವಾಗಿದೆ. ಶೂಟಿಂಗ್ ನಡೆಯುತ್ತಿದೆ. ಎಷ್ಟೋ ಸಲ ಕಾರ್ಮಿಕರಿಗೆ ಸಂಬಳ ನೀಡಲಾಗದೆ, ರಾತ್ರಿ ಸಹ ಚಿತ್ರೀಕರಣ ಮುಂದುವರಿಸಿರುವುದು ಉಂಟು ಎಂದು ಪ್ರಶಾಂತ್ ಹೇಳಿಕೊಂಡಿದ್ದಾರೆ. ಹೇಗೋ ಕಷ್ಟ ಪಟ್ಟು ಸಿನಿಮಾ ಮುಗಿಸಿ ರಿಲೀಸ್ ವರೆಗೂ ಬಂತು. ಸಿನಿಮಾ ಬಿಡುಗಡೆ ಆಯ್ತು, ಲಾಭನೂ ಮಾಡ್ತು ಎಂದು ಖುಷಿ ಹಂಚಿಕೊಂಡಿದ್ದಾರೆ.