ರಜನೀಕಾಂತ್ ಮೌಲ್ಯ ಎಷ್ಟು ಕೋಟಿ? ಸಂಭಾವನೆ ಎಷ್ಟು?

ಅತಿ ಹೆಚ್ಚು ಸಂಭಾವನೆ ಪಡೆವ ನಟರಲ್ಲಿ ಒಬ್ಬರು ರಜನೀ

ಭಾರತದಲ್ಲಿಯೇ ಅತಿ ಹೆಚ್ಚು ಸಂಭಾವನೆ ಪಡೆವ ನಟರಲ್ಲಿ ರಜನೀಕಾಂತ್ ಒಬ್ಬರು. ರಜನೀಕಾಂತ್ ಅವರ ಸಂಭಾವನೆ ಸಿನಿಮಾದಿಂದ ಸಿನಿಮಾಕ್ಕೆ ವ್ಯತ್ಯಾಸವಾಗುತ್ತಿರುತ್ತದೆ. ಒಮ್ಮೊಮ್ಮೆ, ಡಿಜಿಟಲ್ ಹಾಗೂ ಸ್ಯಾಟಲೈಟ್ ಹಕ್ಕುಗಳಿಂದ ಬಂದ ಹಣವನ್ನು ಸಂಭಾವನೆಯಾಗಿ ರಜನೀಕಾಂತ್ ಪಡೆಯುತ್ತಾರೆ. ಒಮ್ಮೊಮ್ಮೆ 50 ಕೋಟಿ ರುಪಾಯಿ ಅಥವಾ ಅದಕ್ಕಿಂತ ಹೆಚ್ಚಿನ ಮೊತ್ತವನ್ನು ಸಂಭಾವನೆ ರೂಪದಲ್ಲಿ ಪಡೆಯುತ್ತಾರೆ. ರೋಬೊ ಸಿನಿಮಾಕ್ಕಾಗಿ 100 ಕೋಟಿ ಸಂಭಾವನೆ ಪಡೆದಿದ್ದರು ಎಂದು ಸುದ್ದಿಯಾಗಿತ್ತು. ಸಿನಿಮಾ ಸಂಭಾವನೆ ಹೊರತಾಗಿಯೂ ರಜನೀಕಾಂತ್‌ಗೆ ಬೇರೆ ಆದಾಯಗಳು ಇವೆ. ಅವುಗಳಿಂದ ತಿಂಗಳಿಗೆ ಸುಮಾರು 2 ರಿಂದ ಮೂರು ಕೋಟಿ ಆದಾಯ ಬರುತ್ತದೆ.

ಪೋಯಸ್ ಗಾರ್ಡನ್‌ನಲ್ಲಿ ರಜನೀ ನಿವಾಸ

ರಜನೀಕಾಂತ್ ನಿವಾಸ ಚೆನ್ನೈನ ಅತ್ಯಂತ ದುಬಾರಿ ಏರಿಯಾ ಪೋಯಸ್ ಗಾರ್ಡನ್‌ನಲ್ಲಿದೆ. 2002 ರಲ್ಲಿಯೇ ಪೋಯಸ್ ಗಾರ್ಡನ್‌ನಲ್ಲಿ ಅದ್ಧೂರಿಯಾಗಿ ರಜನೀಕಾಂತ್ ಮನೆ ನಿರ್ಮಾಣ ಮಾಡಿದ್ದರು. ಆ ಮನೆಯನ್ನು ಕಾಲಾಂತರದಲ್ಲಿ ಅಪ್‌ಗ್ರೇಡ್ ಮಾಡುತ್ತಲೇ ಬಂದಿದ್ದಾರೆ. ಪೋಯಸ್‌ ಗಾರ್ಡನ್‌ನಲ್ಲಿ ಜಮೀನಿನ ಸದ್ಯದ ಮಾರುಕಟ್ಟೆ ಬೆಲೆ ಒಂದು ಚದರ ಅಡಿಗೆ 40 ರಿಂದ 50 ಸಾವಿರ ಇದೆ. ರಜನೀಕಾಂತ್ ಅವರು ಈಗ ವಾಸವಿರುವ ಮನೆಯ ಈಗಿನ ಮಾರುಕಟ್ಟೆ ದರವೇ ಸುಮಾರು 30 ಕೋಟಿ ಇದೆ. ರಜನೀಕಾಂತ್ ಮನೆಯ ಪಕ್ಕದಲ್ಲಿಯೇ ತಮಿಳುನಾಡು ಮಾಜಿ ಸಿಎಂ ಜಯಲಲಿತಾ ಮನೆ ಇದೆ.

ಹಲವು ಐಶಾರಾಮಿ ಕಾರುಗಳಿವೆ

ರಜನೀಕಾಂತ್ ಬಳಿ ಹಲವು ಐಶಾರಾಮಿ ಕಾರುಗಳಿವೆ. ಕೆಲ ದಶಕಗಳ ಹಿಂದೆ ರಜನೀಕಾಂತ್ ಬಹುದೊಡ್ಡ ಕಾರ್ ಪ್ರಿಯರಾಗಿದ್ದರು. ಆದರೆ ವಯಸ್ಸಾದಂತೆ ಆಧ್ಯಾತ್ಮದ ಕಡೆ ವಾಲಿ ಸರಳ ಜೀವನ ಸಾಗಿಸಲು ಆರಂಭಿಸಿದರು. ಆದರೂ ರಜನೀಕಾಂತ್ ಬಳಿ ದೊಡ್ಡ ಕಾರ್ ಕಲೆಕ್ಷನ್ ಇದೆ. ರಜನೀ ಮೊದಲ ಬಾರಿಗೆ ಖರೀದಿಸಿದ ಪ್ರೀಮಿಯರ್ ಪದ್ಮಿನಿ ಕಾರು ಸೇರಿದಂತೆ 22 ಕೋಟಿ ಬೆಲೆಯ ಲಿಮೋಸಿನ್, ರೋಲ್ಸ್ ರಾಯ್ಸ್ ಪ್ಯಾಂಟಮ್, ಬಿಎಂಡಬ್ಲು ಎಕ್ಸ್ 5, ರೇಂಜ್ ರೋವರ್, ಬೆಂಟ್ಲಿ ಸೇರಿದಂತೆ ಸಾಮಾನ್ಯ ಕಾರುಗಳಾದ ಟೊಯೊಟಾ ಇನ್ನೋವಾ, ಹೋಡಾ ಸಿವಿಕ್ ಕಾರುಗಳಿವೆ.

ಮುಂದಿನ ಸಿನಿಮಾ ಯಾವುದು?

ರಜನೀಕಾಂತ್‌ಗೆ ಇತ್ತೀಚೆಗಷ್ಟೆ ದಾದಾ ಸಾಹೇಬ್ ಫಾಲ್ಕೆ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ. ಇದರ ಹೊರತಾಗಿ ಹಲವು ಫಿಲಂಫೇರ್ ಪ್ರಶಸ್ತಿಗಳು, ನಂದಿ ಪ್ರಶಸ್ತಿ, ತಮಿಳು ನಾಡು ರಾಜ್ಯ ಸರ್ಕಾರ ನೀಡುವ ಪ್ರಶಸ್ತಿ, ಜೊತೆಗೆ ಪದ್ಮ ವಿಭೂಷಣ ಗೌರವಗಳು ಸಂದಿವೆ. ರಜನೀಕಾಂತ್ ನಟನೆಯ 'ಅಣ್ಣಾತೆ' ಸಿನಿಮಾ ಕೆಲವು ದಿನಗಳ ಹಿಂದಷ್ಟೆ ಬಿಡುಗಡೆ ಆಗಿ 200 ಕ್ಕೂ ಹೆಚ್ಚು ಕೋಟಿ ಹಣ ಸಂಪಾದಿಸಿ ದಾಖಲೆ ಬರೆದಿದೆ. ರಜನೀಕಾಂತ್ ತಮ್ಮ ಮುಂದಿನ ಸಿನಿಮಾವನ್ನು ನಿರ್ದೇಶಕ ಪೆರಿಯಸಾಮಿ ಅವರೊಟ್ಟಿಗೆ ಮಾಡಲಿದ್ದಾರೆ ಆದರೆ ಈ ಬಗ್ಗೆ ಅಧಿಕೃತ ಹೇಳಿಕೆ ಹೊರ ಬಿದ್ದಿಲ್ಲ.