'ಯಾರೆ ನೀನು ಚೆಲುವೆ' ಸಿನಿಮಾಕ್ಕೆ ಮೊದಲ ಆಯ್ಕೆ ರವಿಚಂದ್ರನ್ ಅಲ್ಲ, ಈ ನಟ

ರವಿಚಂದ್ರನ್ ಸಹೋದರ ನಟಿಸಬೇಕಿದ್ದ ಸಿನಿಮಾ

ಹೌದು, ಯಾರೆ ನೀನು ಚೆಲುವೆ ಸಿನಿಮಾದ ನಾಯಕನಾಗಿ ಅಭಿನಯಿಸುತ್ತಿದ್ದು, ರವಿಚಂದ್ರನ್ ಅಲ್ಲ ಬದಲಿಗೆ ಅವರ ಸಹೋದರ ಬಾಲಾಜಿ ಅಲಿಯಾಸ್ ಈಶ್ವರ್. ಬಾಲಾಜಿ ನಾಯಕರಾಗಿ ಸಿನಿಮಾದ ಚಿತ್ರೀಕರಣ ಸಹ ಪ್ರಾರಂಭವಾಗಿಬಿಟ್ಟಿತ್ತು, ಆದರೆ ಬಾಲಾಜಿ ಅದೃಷ್ಟ ಕೈಕೊಟ್ಟು ಸಿನಿಮಾ ನಿಂತುಹೋಯಿತು.

ಸಿನಿಮಾಕ್ಕಾಗಿ ಸ್ಟಿಲ್ಸ್ ಸಹ ತೆಗೆಯಲಾಗಿತ್ತು

ತಮಿಳಿನ ಸೂಪರ್ ಹಿಟ್ 'ಕಾದಲ್ ಕೋಟ್ಟೈ' ಸಿನಿಮಾವನ್ನು ಕನ್ನಡದಲ್ಲಿ ನಿರ್ಮಾಪಕ ಕೆಸಿಎನ್ ಪ್ರಾರಂಭಿಸಿದ್ದರು. ನಿರ್ದೇಶನ ಮಾಡುತ್ತಿದ್ದಿದ್ದು ಮೋಹನ್ ಬಾಬು. ಆಗ ಹೊಸ ನಟ ಬಾಲಾಜಿ ಹಾಗೂ ಸಿಮ್ರನ್ ಎಂಬ ಹೊಸ ನಟಿಯನ್ನು ಹಾಕಿಕೊಂಡು ಸಿನಿಮಾದ ಚಿತ್ರೀಕರಣವನ್ನು ಒಂದು ವಾರ ನಡೆಸಲಾಗಿತ್ತು. ಸಿನಿಮಾದ ಸ್ಟಿಲ್ಸ್‌ ಸಹ ತೆಗೆಯಲಾಗಿತ್ತು. ನಂತರ ಅಚಾನಕ್ಕಾಗಿ ಸಿನಿಮಾ ನಿಂತುಹೋಯಿತು.

ಪಾತ್ರವರ್ಗ, ನಿರ್ದೇಶಕರನ್ನು ಬದಲಾಯಿಸಿದ ರಾಕ್‌ಲೈನ್

ನಂತರ ಸಿನಿಮಾವನ್ನು ನಿರ್ಮಾಪಕ ರಾಕ್‌ಲೈನ್ ವೆಂಕಟೇಶ್ ಕೈಗೆತ್ತಿಕೊಂಡರು. ಆದರೆ ಪಾತ್ರವರ್ಗ ಸೇರಿ ಎಲ್ಲದರಲ್ಲೂ ಬದಲಾವಣೆ ಮಾಡಿದ ಅವರು, ಬಾಲಾಜಿ ಸ್ಥಾನಕ್ಕೆ ರವಿಚಂದ್ರನ್ ಅವರನ್ನು ತಂದರು. ನಿರ್ದೇಶಕರನ್ನು ಬದಲಾಯಿಸಿ ರಾಜೇಂದ್ರ ಬಾಬು ಅವರಿಗೆ ಹೊಣೆ ನೀಡಿದರು. ನಾಯಕಿಯನ್ನಾಗಿ ಹೊಸ ಮುಖ ಸಂಗೀತ ಅನ್ನು ಪರಿಚಯಿಸಿದರು.

ಬಹುತಾರಾಗಣ ಸಿನಿಮಾ ಆಗಿಬಿಟ್ಟಿತು

ಸಿನಿಮಾಕ್ಕೆ ವಿಷ್ಣುವರ್ಧನ್, ರಮೇಶ್ ಅರವಿಂದ್, ಪ್ರಕಾಶ್ ರೈ, ಜಗ್ಗೇಶ್ ಹೀಗೆ ಹಲವು ಖ್ಯಾತ ನಟರನ್ನು ಸೇರಿಸಿ ಸಿನಿಮವನ್ನು ಬಹುತಾರಾಗಣದ ಸಿನಿಮಾ ಮಾಡಿಬಿಟ್ಟರು ರಾಕ್‌ಲೈನ್. ಹಂಸಲೇಖ ಹೊಸೆದುಕೊಟ್ಟ ಹಾಡುಗಳಂತೂ ರೀಮೇಕ್‌ ಸಿನಿಮಾಕ್ಕೆ ಹೊಸ ಜೀವವನ್ನೇ ತುಂಬಿದವು.

ಸ್ಟಾರ್ ಆಗುತ್ತಿದ್ದರಾ ಬಾಲಾಜಿ?

ಸಿನಿಮಾ ಬಿಡುಗಡೆ ಆದ ಬಳಿಕ ಭಾರಿ ದೊಡ್ಡ ಹಿಟ್ ಆಯಿತು. ಶತದಿನ ಆಚರಿಸಿತು. ಆದರೆ ಇದರಿಂದ ನಷ್ಟವಾಗಿದ್ದು ಬಾಲಾಜಿ ಗೆ ನಂತರ ಎಷ್ಟೋ ವರ್ಷಗಳ ಕಾಲ ಅವರು ನಾಯಕ ನಟನಾಗಲು ಆಗಲಿಲ್ಲ. ಆದರೂ ಸಹ ಹಿಟ್ ಸಿಗಲಿಲ್ಲ. ಯಾರೆ ನೀನು ಚೆಲುವೆ ಸಿನಿಮಾದಲ್ಲಿ ಅವರೇ ನಟಿಸಿ ಹಿಟ್ ಆಗಿದ್ದಿದ್ದರೆ ಅವರೂ ಸ್ಟಾರ್ ಆಗುತ್ತಿದ್ದರೋ ಏನೊ?