ಒಂದಾಗ್ತಿದ್ದಾರೆ ದರ್ಶನ್- ಸುದೀಪ್, ಕಾರಣ ಪುನೀತ್‌ ರಾಜ್‌ಕುಮಾರ್!

ಅಪ್ಪುಗಾಗಿ ಒಟ್ಟಿಗೆ ಸೇರಿತ್ತಿರುವ ದರ್ಶನ್, ಸುದೀಪ್!

ಕನ್ನಡದ ಚಿತ್ರರಂಗದ ದೊಡ್ಡ ಸ್ಟಾರ್‌ಗಳಾದ ನಟ ದರ್ಶನ್, ಸುದೀಪ್ ತಮ್ಮ ಸ್ನೇಹಕ್ಕೆ ಎಳ್ಳು ನೀರು ಬಿಟ್ಟು ವರ್ಷಗಳೇ ಕಳೆದಿವೆ. ಅಲ್ಲಿಂದ ಇಲ್ಲಿ ಈ ಇಬ್ಬರೂ ಒಟ್ಟಿಗೆ ಸೇರುವ ಯಾವುದೇ ಲಕ್ಷಣಗಳು ಕಂಡು ಬಂದಿಲ್ಲ. ಆದರೆ ಈಗ ಈ ಜೋಡಿ ಒಟ್ಟಿಗೆ ಒಂದೆಡೆ ಸೇರಲಿದೆ ಎನ್ನುವ ಸಿಹಿ ಸುದ್ದಿ ಹರಿದಾಡುತ್ತಿದೆ. ಹೌದು 'ಜೇಮ್ಸ್' ಚಿತ್ರದ ಪ್ರೀ-ರಿಲೀಸ್ ಕಾರ್ಯಕ್ರಮದಲ್ಲಿ ದರ್ಶನ್ ಮತ್ತು ಸುದೀಪ್ ಭಾಗಿ ಆಗಲಿದ್ದಾರೆ ಎನ್ನಲಾಗುತ್ತಿದೆ.

ಹೊಸಪೇಟೆಯಲ್ಲಿ 'ಜೇಮ್ಸ್' ಕಾರ್ಯಕ್ರಮ: ದರ್ಶನ್, ಸುದೀಪ್ ಗೆಸ್ಟ್!

ಹೊಸಪೇಟೆಯಲ್ಲಿ ಇದೇ ಮಾರ್ಚ್ 6ರಂದು, 'ಜೇಮ್ಸ್' ಚಿತ್ರದ ಪ್ರೀ-ರಿಲೀಸ್ ಕಾರ್ಯಕ್ರಮ ಜರುಗಲಿದೆ. ಇದು ಜೇಮ್ಸ್ ಚಿತ್ರದ ಮೊದಲ ಕಾರ್ಯಕ್ರಮ ಆಗಿದ್ದು, ಕನ್ನಡದ ಗಣ್ಯ ನಟ, ನಟಿಯರು ಆಗಮಿಸುತ್ತಿದ್ದಾರೆ. ನಟ ದರ್ಶನ್ ಮತ್ತು ಸುದೀಪ್ ವಿಶೇಷ ಅತಿಥಿಯಾಗಿ ಈ ಈವೆಂಟ್‌ನಲ್ಲಿ ಭಾಗಿ ಆಗಲಿದ್ದಾರೆ ಎನ್ನಲಾಗುತ್ತಿದೆ. ಈ ಮೂಲಕ ದಚ್ಚು ಮತ್ತು ಕಿಚ್ಚನನ್ನು ಒಟ್ಟಿಗೆ ನೋಡಬೇಕು ಎನ್ನುವ ಅಭಿಮಾನಿಗಳ ಆಸೆಯೂ ಈಡೆರಲಿದೆ. 'ಜೇಮ್ಸ್' ಚಿತ್ರದ ಈ ಅದ್ಧೂರಿ ಕಾರ್ಯಕ್ರಮಕ್ಕೆ ತೆಲುಗಿನ ಜೂ.ಎನ್‌ಟಿಆರ್ ಹಾಗೂ ಚಿರಂಜೀವಿ ಅವರು ಕೂಡ ಆಗಮಿಸಲಿದ್ದಾರೆ ಎನ್ನುವ ಸುದ್ದಿ ಇದೆ.

ಒಂದಾಗುತ್ತಾರ ದರ್ಶನ್, ಸುದೀಪ್ ಜೋಡಿ!

ಈ ಹಿಂದೆಯೂ ದರ್ಶನ್ ಮತ್ತು ಸುದೀಪ್ ಭಜರಂಗಿ ಚಿತ್ರದ ವೇದಿಕೆ ಮೇಲೆ ಒಟ್ಟಿಗೆ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿತ್ತು. ಆದರೆ ಅದು ಸಾಧ್ಯ ಆಗಿಲ್ಲ. ಆದರೆ ಈಗ ಅಪ್ಪು ಸಿನಿಮಾಗಾಗಿ ಈ ಜೋಡಿ ಒಟ್ಟಿಗೆ ಕಾಣಿಸಿಕೊಳ್ಳುವ ಸಾಧ್ಯತೆ ದಟ್ಟವಾಗಿದೆ. ಇಷ್ಟು ದಿನ ಕಿಚ್ಚ ಇರುವ ಕಡೆಗೆ ದಚ್ಚು ಎಂಟ್ರಿ ಕೊಡುತ್ತಾ ಇರಲಿಲ್ಲ. ಹಾಗೆ ದಚ್ಚು ಬರುವ ಕಡೆಗೆ ಕಿಚ್ಚನ ಎಂಟ್ರಿ ಇರುತ್ತಾ ಇರಲಿಲ್ಲ. ಆದರೆ 'ಜೇಮ್ಸ್' ಕಾರ್ಯಕ್ರಮಕ್ಕೆ ಇಬ್ಬರಿಗೂ ಆಹ್ವಾನ ಹೋಗಿದೆ. ಹಾಗಾಗಿ ಇಲ್ಲಿ ತಮ್ಮ ಮುನಿಸು ಮರೆತು ಒಟ್ಟಿಗೆ ಬರುತ್ತಾರೆ ಎನ್ನಲಾಗುತ್ತಿದೆ.

ಅಭಿಯಾನ ಮಾಡಿದ್ದ ಅಭಿಮಾನಿಗಳು!

ಅಷ್ಟಕ್ಕೂ ದರ್ಶನ್ ಮತ್ತು ಸುದೀಪ್ ಬೇರೆ ಆದ ಬಳಿಕ ಅವರ ಅಭಿಮಾನಿಗಳು ಒಬ್ಬರನ್ನು ಒಬ್ಬರು ಟ್ರೋಲ್ ಮಾಡುತ್ತಿದ್ದರು. ಆದರೆ ಬಳಿಕ ಇಬ್ಬರು ಒಂದಾಗಬೇಕೆಂದು ಅವರ ಅಭಿಮಾನಿಗಳು ಹಲವು ಬಾರಿ ಅಭಿಯಾನ ಕೂಡ ನಡೆಸಿದ್ದಾರೆ. ಈ ಹಿಂದೆ ಟ್ವಿಟ್ಟರ್‌ನಲ್ಲಿ ಸುದೀಪ್, ದರ್ಶನ್ ಅವರ ಅಭಿಮಾನಿಗಳು ಸಕಾರಾತ್ಮಕವಾದ ಅಭಿಯಾನ ಶುರು ಮಾಡಿದ್ದರು. ಅದರೂ ಕೂಡ ಈ ಇಬ್ಬರು ನಟರು ಒಂದಾಗುವ ಸಮಯ ಇನ್ನೂ ಕೂಡಿ ಬಂದಿಲ್ಲ. ಆದರೆ 'ಜೇಮ್ಸ್' ಕಾರ್ಯಕ್ರಮದಲ್ಲಿ ಆದರೂ ಈ ಜೋಡಿ ಒಂದಾಗುತ್ತಾ ನೋಡಬೇಕು.