ಭರ್ಜರಿ ಆಫರ್: ನಟಿ ರಾಕುಲ್ ಪ್ರೀತ್‌ಸಿಂಗ್ ಕೊಡ್ತಿದ್ದಾರೆ 50% ಡಿಸ್‌ಕೌಂಟ್!

ರಾಕುಲ್ ಮಾಡಿದ್ದಾರೆ ಗಟ್ಟಿ ನಿರ್ಣಯ

ಕೊರೊನಾ ಸಂಕಷ್ಟದಿಂದ ನಟ-ನಟಿಯರೆಲ್ಲರೂ ಕೆಲಸವಿಲ್ಲದೆ ಮನೆಯಲ್ಲಿ ಕಾಲ ಕಳೆಯುತ್ತಿದ್ದಾರೆ. ರಾಕುಲ್ ಪ್ರೀತ್ ಸಹ ಉದ್ಯೋಗವಿಲ್ಲದೆ ಮನೆಯಲ್ಲಿ ಕಾಲ ಕಳೆಯುತ್ತಿದ್ದಾರೆ. ಆದರೆ ಒಂದೊಮ್ಮೆ ಸಿನಿಮಾ ಚಿತ್ರೀಕರಣ, ಬಿಡುಗಡೆ ಪ್ರಾರಂಭವಾದ ಮೇಲೆ ಈಗ ಉಂಟಾಗಿರುವ ನಷ್ಟವನ್ನು ಸರಿತೂಗಿಸಲು ರಾಕುಲ್ ನಿರ್ಣಯವೊಂದನ್ನು ತಳೆದಿದ್ದಾರೆ.

ಒಟ್ಟು ಸಂಭಾವನೆಯ 50ರಷ್ಟು ಮಾತ್ರವೇ ಪಡೆಯುತ್ತಾರೆ

ರಾಕುಲ್ ಪ್ರೀತ್ ಸಿಂಗ್ ತಮ್ಮ ಸಿನಿಮಾ ಸಂಭಾವನೆಯಲ್ಲಿ ಕೇವಲ 50% ಹಣವನ್ನಷ್ಟೆ ಪಡೆಯುತ್ತಾರಂತೆ. ರಾಕುಲ್ ಅವರು ಒಂದು ಸಿನಿಮಾಕ್ಕೆ 1.50 ಕೋಟಿ ಹಣ ಪಡೆಯುತ್ತಾರೆ. ಆದರೆ ಇನ್ನು ಮುಂದೆ ಒಂದು ಸಿನಿಮಾಕ್ಕೆ ಕೇವಲ 75 ಲಕ್ಷ ಹಣವನ್ನಷ್ಟೆ ತೆಗೆದುಕೊಳ್ಳುತ್ತಾರಂತೆ.

ಕೆಲವು ತಿಂಗಳಷ್ಟೆ ಈ ಆಫರ್

ರಾಕುಲ್ ಅವರು ಈ 50% ರಿಯಾಯಿತಿಯ ಆಫರ್ ಅನ್ನು ಕೆಲವೇ ತಿಂಗಳುಗಳಿಗಾಗಿ ನೀಡಿದ್ದಾರೆ ಎನ್ನಲಾಗಿದೆ. ಚಿತ್ರಮಂದಿರಗಳು ಪ್ರಾರಂಭವಾಗಿ ಕೊರೊನಾ ಪ್ರಭಾವ ತಗ್ಗಿ ಸಿನಿಮಾ ಉದ್ಯಮ ಮತ್ತೆ ಹಳಿಗೆ ಬಂದ ಮೇಲೆ ಈ ಡಿಸ್‌ಕೌಂಟ್ ಇರುವುದಿಲ್ಲವಂತೆ.

ನಿರ್ಮಾಪಕರನ್ನು ಉಳಿಸಲು ನಿರ್ಣಯ

ಚಿತ್ರೀಕರಣ ಇಲ್ಲದೆ, ಸಿನಿಮಾ ಬಿಡುಗಡೆ ಇಲ್ಲದೆ ನಿರ್ಮಾಪಕರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಸಾಲ ತಂದು ಸಿನಿಮಾಕ್ಕೆ ಬಂಡವಾಳ ಹೂಡಿದವರ ಸಾಲದ ಬಡ್ಡಿ ಏರುತ್ತಲೇ ಇದೆ. ಸಾಲ ತೀರಿಸಲಾಗದೆ ತಲೆಯ ಮೇಲೆ ಕೈ ಹೊತ್ತು ಕೂತಿದ್ದಾರೆ. ನಿರ್ಮಾಪಕರಿಗೆ ಸಹಾಯ ಮಾಡಲೆಂದು ರಾಕುಲ್ ಈ ನಿರ್ಣಯ ತೆಗೆದುಕೊಂಡಿದ್ದಾರೆ. ಈ ಬಗ್ಗೆ ಅಧಿಕೃತ ಹೇಳಿಕೆ ಇನ್ನೂ ನೀಡಿಲ್ಲ ರಾಕುಲ್.