'ಅಶ್ವತ್ಥ ' ವೃಕ್ಷದ ಕೆಳಗೆ...

ಬೆಂಗಳೂರು : ಅಮೆರಿಕಾದಲ್ಲೊಂದು ಅಸೋಸಿಯೋಷನ್‌ ಆಫ್‌ ಕನ್ನಡ ಕೂಟಾಸ್‌ ಆಫ್‌ ಅಮೆರಿಕಾ (AKKA) ಎಂಬ ಸಂಸ್ಥೆ ಇದೆ ಎಂಬುದು ಕರ್ನಾಟಕದಲ್ಲಿ ಅನೇಕರಿಗೆ ತಿಳಿದಿರಲಿಲ್ಲ . ಆದರೆ, ಇವತ್ತು ರಾಜ್ಯದಲ್ಲಿ ಈ ಹೆಸರು ಜನಜನಿತ. ಇದ್ದಕ್ಕಿದ್ದಂತೆ ಈ ಅಕ್ಕನ ಹೆಸರು ಕರ್ನಾಟಕದ ಮಾಧ್ಯಮಗಳಲ್ಲಿ ಸುದ್ದಿಮಾಡಿದ್ದಕ್ಕೆ ಕಾರಣಗಳೇನು ಎನ್ನುವುದೂ ನಿಮಗೆ ಗೊತ್ತಿರಬಹುದು. ಇಡೀ ಪ್ರಕರಣದ ಒಳಹೊಕ್ಕು ನೋಡುವ ಮುನ್ನ ಎರಡು ಮಾತು.

ಕರ್ನಾಟಕದ ಮನೆಯನ್ನು ತೊರೆದು ಮಾರುದ್ದ ಹೋದ ನಮ್ಮ ಅಣ್ಣತಮ್ಮಂದಿರು , ಅಕ್ಕತಂಗಿಯರು ಅಮೆರಿಕದ ನಾನಾ ಪ್ರಾಂತ್ಯಗಳಲ್ಲಿ ಕನ್ನಡ ಕೂಟಗಳನ್ನು ಕಟ್ಟಿಕೊಂಡಿದ್ದಾರೆ. ಇಂಥ ಎಲ್ಲ ಕೂಟಗಳ ಮಾತೃ ಸಂಸ್ಥೆ AKKA. ನಮ್ಮವರು, ಅವರು ರಾಜ್ಯದ ಯಾವುದೇ ಜಿಲ್ಲೆಗೆ ಸೇರಿದವರಾಗಲಿ, ಅಮೆರಿಕಾಗೆ ಹೋದಮೇಲೆ ನಾವೆಲ್ಲ ಒಂದು ಎನ್ನುವ ಭಾವನೆಯನ್ನು ಮತ್ತೆ ಮೂಡಿಸಿಕೊಳ್ಳಲು ಕಟ್ಟಿಕೊಂಡ ಗೂಡು AKKA. ಈ ಸಂಸ್ಥೆಯ ಕೇಂದ್ರ ಕಚೇರಿ ವಾಷಿಂಗ್‌ಟನ್‌ ನಗರದಲ್ಲಿದೆ. ಹ್ಯೂಸ್ಟನ್‌ ನಗರದಲ್ಲಿ ಸೆಪ್ಟೆಂಬರ್‌ನಲ್ಲಿ ನಡೆದ ಸಹಸ್ರಮಾನ ವಿಶ್ವಕನ್ನಡ ಸಮ್ಮೇಳನವನ್ನು ವ್ಯವಸ್ಥೆ ಮಾಡಿದ್ದು ಈ ಸಂಸ್ಥೆಯೇ.

ತುಂಬ ಅಚ್ಚುಕಟ್ಟಾಗಿ, ಅರ್ಥಪೂರ್ಣವಾಗಿ ನಡೆದ ಈ ಕನ್ನಡ ಸಮ್ಮೇಳನಕ್ಕೆ ಕರ್ನಾಟಕದಿಂದ ಅನೇಕರು ಪ್ರತಿನಿಧಿಗಳಾಗಿ, ಆಹ್ವಾನಿತರಾಗಿ ಅಮೆರಿಕಾಗೆ ಹೋಗಿಬಂದರು. ಜ್ಞಾನಪೀಠ ಪ್ರಶಸ್ತಿ ವಿಜೇತ ಯು. ಆರ್‌. ಅನಂತಮೂರ್ತಿ ಸಮ್ಮೇಳನವನ್ನು ಉದ್ಘಾಟಿಸಿದ್ದರು. ಆ ಸಮ್ಮೇಳನದ ವರದಿಗಳನ್ನು ಕನ್ನಡ. ಇಂಡಿಯಾಇನ್‌ಫೊ ಪ್ರಕಟಿಸಿತ್ತು. ಅಂಥದೊಂದು ಸಮ್ಮೇಳನದ ಮೂಲಕ ಕರ್ನಾಟಕದಲ್ಲಿ ಸುದ್ದಿಮಾಡದ ಅಕ್ಕ ಇವತ್ತು ಜುಜೂಬಿ 4500 ಡಾಲರ್‌ ಚೆಕ್‌ನ ನೆಪದಲ್ಲಿ ಕರ್ನಾಟಕ ಎಲ್ಲ ಜನತೆಯ ನಾಲಗೆಗೆ ಬಿದ್ದಿದೆ.