ಸುಶಾಂತ್ ಸಿಂಗ್ ನಟಿಸಿದ್ದ ಸಿನಿಮಾ ರೀಮೆಕ್‌ನಲ್ಲಿ ರಜನಿಕಾಂತ್?

'ಕಾಯ್ ಪೋ ಚೆ' ರೀಮೆಕ್‌ನಲ್ಲಿ ತಲೈವಾ

ಐಶ್ವರ್ಯ ರಜನಿಕಾಂತ್ ನಿರ್ದೇಶನದ 'ಲಾಲ್ ಸಲಾಂ' ಬಾಲಿವುಡ್‌ನ 'ಕಾಯ್ ಪೋ ಚೆ' ರೀಮೆಕ್ ಎನ್ನಲಾಗುತ್ತಿದೆ. ಕತೆಯನ್ನು ಒಂದಷ್ಟು ಬದಲಾವಣೆ ಮಾಡಿಕೊಂಡು ತಮಿಳು ನೇಟಿವಿಟಿಗೆ ತಕ್ಕಂತೆ ಕಟ್ಟಿಕೊಡುವ ಪ್ರಯತ್ನ ನಡೀತಿದೆಯಂತೆ. ಈ ಚಿತ್ರದಲ್ಲಿ ರಜನಿಕಾಂತ್ ಅತಿಥಿ ಪಾತ್ರದಲ್ಲಿ ನಟಿಸುತ್ತಿದ್ದು ಪಾತ್ರಕ್ಕೆ ಬಹಳ ಮಹತ್ವ ಇದೆ ಎನ್ನಲಾಗುತ್ತದೆ. ಈ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ಚರ್ಚೆ ನಡೀತಿದೆ. ಆದರೆ ಈ ಬಗ್ಗೆ ಅಧಿಕೃತ ಮಾಹಿತಿ ಸಿಕ್ಕಿಲ್ಲ.

ಸುಶಾಂತ್ ನಟಿಸಿದ್ದ 'ಕಾಯ್ ಪೋ ಚೆ'

2013ರಲ್ಲಿ ಸುಶಾಂತ್ ಸಿಂಗ್ ನಟನೆಯ 'ಕಾಯ್ ಪೋ ಚೆ' ಸಿನಿಮಾ ತೆರೆಗೆ ಬಂದಿತ್ತು. ಚೇತನ್ ಭಗತ್ ಬರೆದ 'ದಿ ಥ್ರಿ ಮಿಸ್ಟೇಕ್ಸ್ ಆಫ್ ಮೈ ಲೈಫ್' ಕಾದಂಬರಿ ಆಧರಿಸಿ ಅಭಿಷೇಕ್ ಕಪೂರ್ ಈ ಸ್ಪೋರ್ಟ್ಸ್ ಡ್ರಾಮಾ ಚಿತ್ರ ಕಟ್ಟಿಕೊಟ್ಟಿದ್ದರು. ಸುಶಾಂತ್ ಜೊತೆಗೆ ಅಮಿತ್ ಸಾದ್ ಹಾಗೂ ರಾಜ್‌ಕುಮಾರ್ ರಾವ್ ಲೀಡ್‌ ರೋಲ್‌ಗಳಲ್ಲಿ ನಟಿಸಿದ್ದರು. ಕ್ರಿಕೆಟ್ ಜೊತೆಗೆ ಒಂದಷ್ಟು ರಾಜಕೀಯ ಅಂಶಗಳನ್ನು ಸೇರಿಸಿ ಸಿನಿಮಾ ಕಟ್ಟಿಕೊಡಲಾಗಿತ್ತು. ಸುಶಾಂತ್ ನಟನೆ ಬಗ್ಗೆ ಮೆಚ್ಚುಗೆ ವ್ಯಕ್ತವಾಗಿತ್ತು.

ಸೂಪರ್ ಸ್ಟಾರ್ ಭೇಟಿ ಮಾಡಿದ್ದ ಸುಶಾಂತ್

6 ವರ್ಷಗಳ ಹಿಂದೆ ಸುಶಾಂತ್ ಸಿಂಗ್ ರಜಪೂತ್ 'ಧೋನಿ' ಬಯೋಪಿಕ್‌ನಲ್ಲಿ ನಟಿಸಿದ್ದರು. ಕ್ರಿಕೆಟಿಗ ಮಹೇಂದ್ರ ಸಿಂಗ್ ಧೋನಿ ಹಾಗೂ ಸುಶಾಂತ್ ಸಿಂಗ್ ಇಬ್ಬರು ಸಿನಿಮಾ ಪ್ರಮೋಷನ್‌ಗಾಗಿ ಊರೂರು ಸುತ್ತಿದ್ದರು. ಚೆನ್ನೈಗೆ ಹೋದ ವೇಳೆ ರಜನಿಕಾಂತ್ ಅವರನ್ನು ಭೇಟಿ ಮಾಡಿದ್ದರು. ತಲೈವಾ 'ಧೋನಿ' ಚಿತ್ರಕ್ಕೆ ಶುಭ ಹಾರೈಸಿದ್ದರು. ಮೂವರು ಜೊತೆಗಿರುವ ಫೋಟೊಗಳು ವೈರಲ್ ಆಗಿತ್ತು. ಆ ಸಿನಿಮಾ ಸೂಪರ್ ಹಿಟ್ ಆಗಿದ್ದು ಗೊತ್ತೇಯಿದೆ.

ತಲೈವಾ ಅಭಿಮಾನಿಯಾಗಿ ಸುಶಾಂತ್

ಇನ್ನು ಸುಶಾಂತ್ ಸಿಂಗ್ 'ದಿಲ್ ಬೆಚಾರ' ಚಿತ್ರದಲ್ಲಿ ರಜನಿಕಾಂತ್ ಅಭಿಮಾನಿಯಾಗಿ ನಟಿಸಿದ್ದರು. ತಲೈವಾನ ಇಮಿಟೇಟ್ ಮಾಡುವ ಪ್ರಯತ್ನ ಮಾಡಿದ್ದರು. ಸುಶಾಂತ್ ಸಿಂಗ ಅಗಲಿಕೆಯ ನಂತರ ಈ ಸಿನಿಮಾ ಬಿಡುಗಡೆ ಆಗಿತ್ತು. ಆದರೆ ಕೊರೋನಾ ಹಾವಳಿ ಹಿನ್ನೆಲೆ ಥಿಯೇಟರ್ ಬದಲು ನೇರವಾಗಿ ಸಿನಿಮಾ ಓಟಿಟಿ ಫ್ಲಾಟ್‌ಫಾರ್ಮ್‌ಗೆ ಬಂದಿತ್ತು.