James Day 3 Box office Collection:'ಜೇಮ್ಸ್' 3ನೇ ದಿನದ ಬಾಕ್ಸಾಫೀಸ್ ಕಲೆಕ್ಷನ್ ವಿವರ

ಮೊದಲ ದಿನವೇ 30 ಕೋಟಿಯ ಗಡಿ ದಾಟಿದ 'ಜೇಮ್ಸ್'!

'ಜೇಮ್ಸ್' ಸಿನಿಮಾ ಮೊದಲ ದಿನವೇ ಕರ್ನಾಟಕ ಒಂದರಲ್ಲೇ ಸರಿ ಸುಮಾರು 35 ಕೋಟಿ ಗಳಿಸಿದೆ ಎಂದು ವರದಿ ಆಗಿತ್ತು. ಆದರೆ ಕರ್ನಾಟಕ ಹೊರತು ಪಡಿಸಿ, ವಿಶ್ವಾದ್ಯಂತ ಆಗಿರುವ ಕಲೆಕ್ಷನ್ ಎಲ್ಲವನ್ನೂ ಲೆಕ್ಕ ಹಾಕಿದರೆ ಇನ್ನೂ ಹೆಚ್ಚು ಹಣ 'ಜೇಮ್ಸ್' ಗಲ್ಲಾ ಪಟ್ಟೆಗೆ ಸೇರಿದೆ. ಮೊದಲ ದಿನವೇ 'ಜೇಮ್ಸ್' ಸಿನಿಮಾ ದಾಖಲೆ ಗಳಿಕೆ ಕಂಡಿರುವುದಂತೂ ಸತ್ಯ.

ಎರಡನೇ ದಿನಕ್ಕೆ 'ಜೇಮ್ಸ್' 100 ಕೋಟಿ!

ಇನ್ನು 'ಜೇಮ್ಸ್' ಚಿತ್ರದ ಅಬ್ಬರ ಎರಡನೇ ದಿನಕ್ಕೂ ಕಡಿಮೆ ಆಗಿರಲಿಲ್ಲ. ಎರಡನೇ ದಿನ ರಾಜ್ಯದಾದ್ಯಂತ 18 ಕೋಟಿಗೂ ಹೆಚ್ಚು ಹಣ ಕಲೆಕ್ಷನ್ ಮಾಡಿದೆ. ಎರಡನೇ ದಿನವೂ ಇಷ್ಟು ದೊಡ್ಡ ಮೊತ್ತ ಗಳಿಸಿರುವುದು ದಾಖಲೆಯೇ ಆಗಿದೆ. ಅಲ್ಲದೇ ಕರ್ನಾಟಕದ ಕಲೆಕ್ಷನ್ ಜೊತೆಗೆ ವಿಶ್ವಾದ್ಯಂತ 'ಜೇಮ್ಸ್' ಗಳಿಕೆಯ ಲೆಕ್ಕಾಚಾರವನ್ನು ಚಿತ್ರತಂಡ ಬಿಚ್ಚಿಟ್ಟಿಲ್ಲ. ಆದರೆ ಎರಡನೇ ದಿನಕ್ಕೇ 'ಜೇಮ್ಸ್' 100 ಕೋಟಿ ಕ್ಲಬ್ ಸೇರಿದೆ ಎಂದು ಹೇಳಲಾಗುತ್ತಿದೆ.

ಕರ್ನಾಟಕದಲ್ಲಿ 'ಜೇಮ್' 3ನೇ ದಿನದ ಕಲೆಕ್ಷನ್!

ಮೊದಲೆರಡು ದಿನ ದಾಖಲೆ ಮಟ್ಟದ ಕಲೆಕ್ಷನ್ ಮಾಡಿದ 'ಜೇಮ್ಸ್' ಚಿತ್ರತಂಡ, ಮೂರನೇ ದಿನಕ್ಕೂ ಅಬ್ಬರ ಮುಂದುವರೆದಿದೆ. ಕರ್ನಾಟಕದಲ್ಲಿ ಮೂರನೇ ದಿನದ ಕಲೆಕ್ಷನ್ 9 ಕೋಟಿ ಎನ್ನಲಾಗಿದೆ. ಇದರ ಜೊತೆಗೆ ಸ್ಯಾಟಲೈಟ್ ಹಕ್ಕು ಮಾರಾಟದ ಮೂಲಕವೂ ಭಾರಿ ಸದ್ದು ಮಾಡಿತು 'ಜೇಮ್ಸ್'.

'ಜೇಮ್ಸ್' ಚಿತ್ರದಲ್ಲಿ ಅಪ್ಪು ಜಾದು!

'ಜೇಮ್ಸ್' ಸಿನಿಮಾವು ಮಾರ್ಚ್ 17 ರಂದು ಬಿಡುಗಡೆ ಆಗಿದ್ದು ಸಿನಿಮಾದಲ್ಲಿ ಎರಡು ಶೇಡ್‌ಗಳಲ್ಲಿ ಪುನೀತ್ ರಾಜ್‌ಕುಮಾರ್ ನಟಿಸಿದ್ದಾರೆ. ಡ್ರಗ್ಸ್ ವಿರುದ್ಧ ಹೋರಾಟದ ಕತೆಯನ್ನು ಈ ಸಿನಿಮಾದಲ್ಲಿ ತರಲಾಗಿದೆ. ಜೊತೆಗೆ ಸ್ನೇಹದ ಬಗ್ಗೆ ಸಂದೇಶವನ್ನೂ ಸಾರುತ್ತಿದೆ. ಸಿನಿಮಾದಲ್ಲಿ ಪ್ರಿಯಾ ಆನಂದ್ ನಾಯಕಿಯಾಗಿ ನಟಿಸಿದ್ದಾರೆ. ಶ್ರೀಕಾಂತ್, ಶರತ್ ಕುಮಾರ್, ಆದಿತ್ಯ ಮೆನನ್ ಮುಖ್ಯ ವಿಲನ್‌ಗಳಾಗಿದ್ದಾರೆ. ರಂಗಾಯಣ ರಘು, ಅನು ಪ್ರಭಾಕರ್, ಚಿಕ್ಕಣ್ಣ, ತಿಲಕ್, ಶೈನ್ ಶೆಟ್ಟಿ, ಸಾಧು ಕೋಕಿಲ, ಸುಚೇಂದ್ರ ಪ್ರಸಾದ್, ಕಾಮಿಡಿ ಕಿಲಾಡಿಗಳು ನಯನ ಇನ್ನೂ ಹಲವಾರು ಮಂದಿ ಸಿನಿಮಾದಲ್ಲಿ ನಟಿಸಿದ್ದಾರೆ. ಸಿನಿಮಾವನ್ನು ಚೇತನ್ ಕುಮಾರ್ ನಿರ್ದೇಶನ ಮಾಡಿದ್ದಾರೆ.