ಸ್ಯಾಂಡಲ್ ವುಡ್ ಗೆ ನಾಟ್ಯ ಮಯೂರಿ ಮಾಧುರಿ ದೀಕ್ಷಿತ್?

ಬಾಲಿವುಡ್ ನ ಧಕ್ ಧಕ್ ಬೆಡಗಿ ಮಾಧುರಿ ದೀಕ್ಷಿತ್ ಸ್ಯಾಂಡಲ್ ವುಡ್ ಅಂಗಳಕ್ಕೆ ಅಡಿಯಿಡಲು ತಯಾರಿ ನಡೆದಿದೆ. ರಾಧಿಕಾ ಕುಮಾರಸ್ವಾಮಿ ನಿರ್ಮಿಸಲಿರುವ ಚಿತ್ರಕ್ಕೆ ಮಾಧುರಿಯ ಆಗಮನವಾಗಲಿದೆ ಎನ್ನುತ್ತವೆ ಮೂಲಗಳು.

ಸದ್ಯಕ್ಕೆ ರಾಧಿಕಾ ಕುಮಾರಸ್ವಾಮಿ ಅವರು 'ನಮಗಾಗಿ' ಚಿತ್ರದಲ್ಲಿ ಬಿಜಿಯಾಗಿದ್ದಾರೆ. ಚಿನ್ನಾರಿ ಮುತ್ತ ವಿಜಯ್ ರಾಘವೇಂದ್ರ ನಾಯಕನಟನಾಗಿರುವ ಚಿತ್ರ ಇದಾಗಿದ್ದು, 'ನಿನಗಾಗಿ' ಚಿತ್ರದ ಬಳಿಕ ಈ ಜೋಡಿ ಮತ್ತೆ ಒಂದಾಗಿರುವ ಚಿತ್ರ. ಡಿಪಿ ರಘುರಾಮ್ ಆಕ್ಷನ್ ಕಟ್ ಹೇಳುತ್ತಿರುವ ಚಿತ್ರ ಇದಾಗಿದೆ. [ಮಾಧುರಿ ದೀಕ್ಷಿತ್ ಬಗ್ಗೆ ನಿಮಗೆ ಗೊತ್ತಿಲ್ಲದ ಸಂಗತಿಗಳು]

ರಾಧಿಕಾ ಕುಮಾರಸ್ವಾಮಿ ನಿರ್ಮಾಣದ ಚಿತ್ರದ ಎಂದರೆ ಸ್ಯಾಂಡಲ್ ವುಡ್ ಗೆ ಮಾಧುರಿ ಬರುವುದು ಬಹುತೇಕ ಖಚಿತ ಎಂದುಕೊಳ್ಳಬಹುದು. ಚಿತ್ರದಲ್ಲಿ ಅವರದು ಸಣ್ಣ ಪಾತ್ರವಂತೆ. ಈಗಾಗಲೆ ಅವರೊಂದಿಗೆ ಮಾತುಕತೆಯಾಗಿದೆ. ಇನ್ನು ಅವರು ಗ್ರೀನ್ ಸಿಗ್ನಲ್ ಕೊಡುವುದು ಬಾಕಿ ಇದೆ.

ರಾಧಿಕಾ ಜೊತೆ ಮಾಧುರಿ ದೀಕ್ಷಿತ್ ಕುಣಿಯಲಿದ್ದಾರೆ ಎನ್ನುತ್ತವೆ ಮೂಲಗಳು. ಸ್ಯಾಂಡಲ್ ವುಡ್ ನಲ್ಲಿ ಮಾಧುರಿ ದೀಕ್ಷಿತ್ ನೃತ್ಯವನ್ನು ಕಣ್ತುಂಬಿಕೊಳ್ಳುವ ದಿನಗಳು ದೂರವಿಲ್ಲ. ಜೊತೆಗೆ ರಾಧಿಕಾ ಕುಮಾರಸ್ವಾಮಿ ಹೆಜ್ಜೆ ಹಾಕುತ್ತಿದ್ದರೆ ಕಣ್ಣಿಗೆ ಹಬ್ಬ ಅಲ್ಲವೇ? (ಏಜೆನ್ಸೀಸ್)