'ಕೆಜಿಎಫ್‌ 2'ಗೆ ನೂರಾರು ಕೋಟಿ ಆಫರ್ ನೀಡಿದ ಒಟಿಟಿ

ಚಿತ್ರಮಂದಿರದಲ್ಲಿಯೇ ಬಿಡುಗಡೆ ಆಗಬೇಕೆಂಬ ಇಂಗಿತ

ಆದರೆ 'ಕೆಜಿಎಫ್ 2' ಅನ್ನು ಚಿತ್ರಮಂದಿರಗಳಲ್ಲಿಯೇ ಬಿಡುಗಡೆ ಮಾಡಬೇಕು ಎಂಬುದು ಚಿತ್ರತಂಡದ ಆಸೆ. ನಟ ಯಶ್ ಅಂತೂ 'ಕೆಜಿಎಫ್ 2' ಸಿನಿಮಾ ಚಿತ್ರಮಂದಿರಗಳಲ್ಲಿಯೇ ಬಿಡುಗಡೆ ಆಗಬೇಕು ಎಂದು ಮೊದಲೇ ಹೇಳಿಬಿಟ್ಟಿದ್ದಾರೆ ಎನ್ನಲಾಗಿದೆ. ನಿರ್ಮಾಪಕ ವಿಜಯ್ ಕಿರಗಂದೂರು ಅವರಿಗೂ 'ಕೆಜಿಎಫ್ 2' ಸಿನಿಮಾವನ್ನು ಒಟಿಟಿಗೆ ನೀಡಲು ಸುತಾರಾಂ ಇಷ್ಟವಿಲ್ಲ. ಯಶ್ ಅಭಿಮಾನಿಗಳಿಗೂ 'ಕೆಜಿಎಫ್ 2' ಸಿನಿಮಾ ಒಟಿಟಿಯಲ್ಲಿ ಬಿಡುಗಡೆ ಆಗುವುದು ಸುತಾರಾಂ ಇಷ್ಟವಿಲ್ಲ. 'ಕೆಜಿಎಫ್ 2' ಅಬ್ಬರವನ್ನು ಚಿತ್ರಮಂದಿರದಲ್ಲಿಯೇ ಕಣ್ತುಂಬಿಕೊಳ್ಳುವ ಆಸೆ ಅವರದ್ದು.

ಒಂದೇ ತಿಂಗಳಿಗೆ ಒಟಿಟಿಗೆ ಬರಲಿದೆಯೇ?

ವಿಜಯ್ ಕಿರಗಂದೂರ್ ಅವರೇ ನಿರ್ಮಿಸಿದ್ದ 'ಯುವರತ್ನ' ಸಿನಿಮಾವನ್ನು ಬಿಡುಗಡೆ ಆದ ಒಂದು ವಾರಕ್ಕೆ ಒಟಿಟಿಗೆ ನೀಡಿದ್ದರು. ಅಂತೆಯೇ 'ಕೆಜಿಎಫ್ 2' ಅನ್ನು ಒಟಿಟಿಗೆ ನೀಡುತ್ತಾರಾ ಎಂದು ಕಾದು ನೋಡಬೇಕಿದೆ. ತಮಿಳಿನ ವಿಜಯ್ ನಟನೆಯ 'ಮಾಸ್ಟರ್', ಪವನ್ ಕಲ್ಯಾಣ್ ನಟನೆಯ 'ವಕೀಲ್ ಸಾಬ್' ಸಿನಿಮಾಗಳನ್ನು ಅವು ಬಿಡುಗಡೆ ಆದ ಒಂದು ತಿಂಗಳ ಒಳಗಾಗಿಯೇ ಒಟಿಟಿಗಳಿಗೆ ಭಾರಿ ದೊಡ್ಡ ಮೊತ್ತಕ್ಕೆ ಮಾರಾಟ ಮಾಡಲಾಗಿತ್ತು. 'ಕೆಜಿಎಫ್ 2' ಸಿನಿಮಾವನ್ನು ಹಾಗೆಯೇ ಮಾಡಲಾಗುತ್ತದೆ ಎನ್ನಲಾಗುತ್ತಿದೆ.

'ಕೆಜಿಎಫ್ 2' ಬಿಡುಗಡೆ ಯಾವಾಗ?

'ಕೆಜಿಎಫ್ 2' ಜುಲೈ 16ಕ್ಕೆ ಬಿಡುಗಡೆ ಆಗಲಿದೆ ಎಂದು ಈ ಹಿಂದೆ ಚಿತ್ರತಂಡ ಘೋಷಿಸಿತ್ತು. ಆದರೆ ಕೊರೊನಾ ಕಾರಣದಿಂದಾಗಿ ಸಿನಿಮಾದ ಬಿಡುಗಡೆ ಮುಂದೂಡಲಾಗಿದೆ. ಹೊಸ ಬಿಡುಗಡೆ ದಿನಾಂಕವನ್ನು ಈ ವರೆಗೆ ಘೋಷಿಸಿಲ್ಲ. ಕೆಲವು ಮೂಲಗಳ ಪ್ರಕಾರ 'ಕೆಜಿಎಫ್; ಚಾಪ್ಟರ್ 1' ಬಿಡುಗಡೆ ಮಾಡಿದ್ದ ಡಿಸೆಂಬರ್ ತಿಂಗಳಿನಲ್ಲಿಯೇ 'ಕೆಜಿಎಫ್ 2' ಬಿಡುಗಡೆಯೂ ಆಗಲಿದೆ ಎನ್ನಲಾಗುತ್ತಿದೆ. ಕೊರೊನಾ ಮೂರನೇ ಅಲೆಯ ಭಯವಿರುವ ಕಾರಣ 'ಕೆಜಿಎಫ್ 2' ಸಿನಿಮಾದ ಹೊಸ ದಿನಾಂಕ ಘೋಷಿಸಲು ಚಿತ್ರತಂಡ ಹಿಂದೆ-ಮುಂದೆ ನೋಡುತ್ತಿದೆ.

ಹಲವು ಸ್ಟಾರ್ ನಟರು ಸಿನಿಮಾದಲ್ಲಿದ್ದಾರೆ

'ಕೆಜಿಎಫ್ 1'ಗೆ ಹೋಲಿಸಿದರೆ 'ಕೆಜಿಎಫ್ 2' ಸಿನಿಮಾವು ಸಾಕಷ್ಟು ಅದ್ಧೂರಿತನ, ಭಿನ್ನತೆಗಳನ್ನು ಒಳಗೊಂಡಿದೆ ಎನ್ನಲಾಗುತ್ತಿದೆ. 'ಕೆಜಿಎಫ್ 2' ನಲ್ಲಿ ಯಶ್ ಜೊತೆಗೆ ಕಾದಾಡಲು ಬಾಲಿವುಡ್‌ನ ಸ್ಟಾರ್ ಸಂಜಯ್ ದತ್ ಇದ್ದಾರೆ. ಜೊತೆಗೆ ರವೀನಾ ಟಂಡನ್ ಸಹ ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಪ್ರಕಾಶ್ ರೈ, ತೆಲುಗಿನ ರಾವ್ ರಮೇಶ್ ಇನ್ನೂ ಹಲವು ನಟರು ಸಿನಿಮಾದಲ್ಲಿದ್ದಾರೆ. ಸಿನಿಮಾಕ್ಕೆ ರವಿ ಬಸ್ರೂರು ಸಂಗೀತ ನೀಡಿದ್ದಾರೆ. ಸಿನಿಮಾವು ಕನ್ನಡ ಸೇರಿದಂತೆ ಹಿಂದಿ, ತೆಲುಗು, ತಮಿಳು, ಮಲಯಾಳಂ ಭಾಷೆಗಳಲ್ಲಿ ಒಟ್ಟಿಗೆ ಬಿಡುಗಡೆ ಆಗಲಿದೆ. ಒಡಿಯಾ ಭಾಷೆಗೂ ಡಬ್ ಮಾಡಿ ಬಿಡುಗಡೆ ಮಾಡುವ ಸಾಧ್ಯತೆ ಇದೆ.