ನಟಿ ಪ್ರಿಯಾಮಣಿ ದಿನದ ಸಂಭಾವನೆ ಡಬಲ್!

'ಭಾಮಾ ಕಲಾಪಂ' ಚಿತ್ರದ ಬಳಿಕ ಹೆಚ್ಚಿದ ಸಂಭಾವನೆ!

ನಟಿ ಪ್ರಿಯಾಮಣಿ ಅಭಿನಯದ 'ಭಾಮಾ ಕಲಾಪಂ' ಚಿತ್ರದ ರಿಲೀಸ್ ಆಗಿದೆ. ಈ ಚಿತ್ರ ಒಟಿಟಿಯಲ್ಲಿ ತೆರೆಕಂಡಿದೆ. ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ಕೂಡ ಸಿಕ್ಕಿದೆ. ಈ ಚಿತ್ರದ ಮೂಕ ನಟಿ ಪ್ರಿಯಾಮಣಿ ಮತ್ತೊಮ್ಮೆ ಗೆಲುವಿನ ನಗೆ ಬೀರಿದ್ದಾರೆ. ಈ ಚಿತ್ರದಲ್ಲಿ ಪ್ರಿಯಾಮಣಿ ಗೃಹಿಣಿಯ ಪಾತ್ರ ಮಾಡಿದ್ದಾರೆ. ಚಿತ್ರದಲ್ಲಿ ಭಾಮಾ ಅಡುಗೆ ಮಾಡುವುದರಲ್ಲಿ ಸಿಕ್ಕಾಪಟ್ಟೆ ಫೇಮಸ್. ಆಕೆ ತಮ್ಮ ಯುಟ್ಯೂಬ್ ಚಾನಲ್ ಮೂಲಕ ಅಡುಗೆ ಮಾಡುವುದರಲ್ಲಿ ಬ್ಯುಸಿ ಆದರೆ ಇದ್ದಕ್ಕಿದ್ದ ಹಾಗೆ ಒಂದು ಇಕ್ಕಟ್ಟಿಗೆ ಸಿಲುಕಿ ಬಿಡುತ್ತಾಳೆ. ಹೀಗೆ ಸಿನಿಮಾ ಕತೆ ಸಾಗುತ್ತೆ. ಪ್ರಿಯಾಮಣಿ ಈ ಪಾತ್ರದ ಮೂಲಕ ವಿಭಿನ್ನವಾಗಿ ಗಮನ ಸೆಳೆದಿದ್ದಾರೆ. ಈ ಚಿತ್ರದ ಬಳಿಕ ಈಗ ಪ್ರಿಯಾಮಣಿ ಸಂಭಾವನೆ ಹೆಚ್ಚಿಸಿಕೊಂಡಿದ್ದಾರಂತೆ.

1.5 ಲಕ್ಷದಿಂದ 4 ಲಕ್ಷಕ್ಕೆ ಸಂಭಾವನೆ ಹೆಚ್ಚಳ!

ನಟಿ ಪ್ರಿಯಾಮಣಿ ಅವರು ತಮ್ಮ ಸಂಭಾವನೆಯನ್ನು ದುಪ್ಪಟ್ಟು ಮಾಡಿಕೊಂಡಿದ್ದಾರೆ ಎನ್ನುವ ಸುದ್ದಿ ಟಾಲಿವುಡ್‌ನಲ್ಲಿ ಹರಿದಾಡುತ್ತಲಿದೆ. ಪ್ರಿಯಾಮಣಿ ಅವರು ಈಗ ತಮ್ಮ ಸಂಭಾವನೆಯನ್ನು 4 ಲಕ್ಷಕ್ಕೆ ಹೆಚ್ಚಳ ಮಾಡಿಕೊಂಡಿದ್ದಾರಂತೆ. ಅಂದರೆ ಅವರ ಸಂಭಾವನೆ ಇಷ್ಟೇನಾ ಅಂತ ಅಚ್ಚರಿ ಪಡಬೇಡಿ. ಯಾಕೆಂದರೆ ಇದು ಅವರ ಒಂದು ದಿನದ ಸಂಭಾವನೆ. ಈ ಮೊದಲು ಪ್ರಿಯಾಮಣಿ ಅವರು ಒಂದು ದಿನಕ್ಕೆ 1.5 ಲಕ್ಷ ಸಂಭಾವನೆ ಪಡೆಯುತ್ತಿದ್ದರಂತೆ. ಈಗ ದಿನಕ್ಕೆ 3 ರಿಂದ 4 ಲಕ್ಷ ರೂ ಸಂಭಾವನೆ ಪಡೆದುಕೊಳ್ಳುತ್ತಾರಂತೆ. ಇದಕ್ಕೆ ಕಾರಣ ಆಗಿರುವುದು 'ಭಾಮಾ ಕಲಾಪಂ' ಸಿನಿಮಾ.

ನಟರ ಸಂಭಾವನೆ ವಿರುದ್ಧ ಗುಡುಗಿದ್ದ ಪ್ರಿಯಾಮಣಿ!

ಒಂದು ಸಿನಿಮಾ ಅಂತ ಬಂದಾಗ ಸಹಜವಾಗಿ ನಾಯಕರಿಗೆ ಹೆಚ್ಚಿನ ಸಂಭಾವನೆ ನೀಡಲಾಗುತ್ತದೆ. ಆದರೆ ನಾಯಕಿಯರಿಗೆ ನಾಯಕ ನಟರಿಗಿಂದತೂ ಅತಿ ಕಡಿಮೆ ಸಂಭಾನೆ ನೀಡಲಾಗುತ್ತದೆ. ಈ ಬಗ್ಗೆ ಪ್ರಿಯಾಮಣಿ ಈ ಹಿಂದೆ ಮಾತನಾಡಿದ್ದರು. "ಸಿನಿಮಾರಂಗದಲ್ಲಿ ಸಂಭಾವನೆಯ ವಿಚಾರದಲ್ಲಿ ತಾರತಮ್ಯ ನಡೆಯುತ್ತದೆ. ನಾಯಕ ನಟರಿಗೆ ಅತಿ ಹೆಚ್ಚು ಸಂಭಾವನೆ ನೀಡಲಾಗುತ್ತದೆ. ಅದರೆ ನಟಿಯರಿಗೆ ಕಡಿಮೆ ಸಂಭಾವನೆ ಕೊಡಲಾಗುತ್ತದೆ. ನಟಿಯರು ಕೂಡ ಸಿನಿಮಾ ಯಶಸ್ಸಿಗೆ ಕಾರಣ ಆಗಿರುತ್ತಾರೆ. ಸಿನಿಮಾ ಗೆದ್ದರೆ ಅದರಿಂದ ನಟಿಯರಿಗೆ ಯಾವುದೇ ಲಾಭ ಬರುವುದಿಲ್ಲ. ಅದು ಕೂಡ ನಟರ ಪಾಲಾಗುತ್ತದೆ." ಎಂದು ಹೇಳಿದ್ದರು.

ಪ್ರಿಯಾಮಣಿ ಕೈಯಲ್ಲಿ ಸಾಲು ಸಾಲು ಸಿನಿಮಾಗಳು!

ಕೆಲವು ದಿನಗಳು ರಿಯಾಲಿಟಿ ಶೋನಲ್ಲಿ ಜಡ್ಜ್ ಆಗಿದ್ದ ಪ್ರಿಯಾಮಣಿ, ಈಗ ಸಾಲು ಸಾಲು ಸಿನಿಮಾಗಳಲ್ಲಿ ಬ್ಯೂಸಿ ಆಗಿದ್ದಾರೆ. ರಾಣ ದಗ್ಗುಬಾಟಿ ಜೊತೆಗಿನ 'ವಿರಾಟ ಪರ್ವಂ', 'ಮೈದಾನ್' ಸಿನಿಮಾಗಳೂ ರಿಲೀಸ್‌ಗೆ ರೆಡಿ ಇದೆ. ಇವು ಬಿಟ್ಟರೆ, 'ಡಾಕ್ಟರ್ 56', 'ಕೊಟೇಷನ್ ಗ್ಯಾಂಗ್', ಕನ್ನಡದ 'ಕಾಯಿಮಾರಾ', ಮತ್ತು ಇನ್ನು ಹೆಸರಿಡದ ಅಟ್ಲಿ ಸಿನಿಮಾದಲ್ಲಿ ಪ್ರಿಯಾಮಣಿ ಬ್ಯೂಸಿ ಇದ್ದಾರೆ.