ಸ್ಟಾರ್ ನಟನೊಡನೆ ಬಾಲಿವುಡ್‌ಗೆ ಕಾಲಿಡಲಿದ್ದಾರೆ ಸಮಂತಾ!

ವರುಣ್ ಧವನ್ ಜೊತೆ ಸಂಮತಾ ಎಂಟ್ರಿ!?

ದೊಡ್ಡ ಸಿನಿಮಾ ಬ್ಯಾನರ್‌ ಒಂದರ ಸಿನಿಮಾದಲ್ಲಿ ಸಮಂತಾ ನಾಯಕಿಯಾಗಿ ನಟಿಸಲಿದ್ದಾರೆ. ಆ ಸಿನಿಮಾದಲ್ಲಿ ಬಾಲಿವುಡ್‌ನ ಸ್ಟಾರ್ ಯುವನಟ ವರುಣ್ ಧವನ್ ನಾಯಕಾಗಿರುತ್ತಾರೆ ಎನ್ನಲಾಗುತ್ತಿದೆ. ಸಿನಿಮಾಕ್ಕಾಗಿ ಈಗಾಗಲೇ ಒಪ್ಪಂದ ಮುಗಿದಿದ್ದು ಕೆಲವೇ ದಿನಗಳಲ್ಲಿ ಫೋಟೊ ಶೂಟ್ ಸಹ ನಡೆಯಲಿದೆ. ಇದಕ್ಕೆ ಸಾಕ್ಷಿಯೆಂಬಂತೆ ನಟ ವರುಣ್ ಧವನ್ ಹಾಗೂ ಸಮಂತಾ ಒಟ್ಟಿಗೆ ಮುಂಬೈನಲ್ಲಿ ಕಾಣಿಸಿಕೊಂಡಿದ್ದಾರೆ.

ತಾಪ್ಸಿ ಪನ್ನು ನಿರ್ಮಾಣದ ಸಿನಿಮಾದಲ್ಲಿ ಸ್ಯಾಮ್

ಸಮಂತಾ ಕೇವಲ ಒಂದು ಬಾಲಿವುಡ್ ಸಿನಿಮಾದಲ್ಲಿ ನಟಿಸುತ್ತಿಲ್ಲ ಬದಲಿಗೆ ಎರಡು ಆಫರ್‌ಗಳು ಅವರ ಮುಂದಿವೆ. ಬಾಲಿವುಡ್‌ನ ಡೇರಿಂಗ್ ನಟಿ ಎಂದೇ ಹೆಸರಾಗಿರುವ ತಾಪ್ಸಿ ಪನ್ನು ಸಿನಿಮಾ ಒಂದನ್ನು ನಿರ್ಮಾಣ ಮಾಡುತ್ತಿದ್ದು ಆ ಸಿನಿಮಾದಲ್ಲಿಯೂ ಸಮಂತಾ ಮುಖ್ಯಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಬಗ್ಗೆ ಸಂದರ್ಶನವೊಂದರಲ್ಲಿ ಮಾತನಾಡಿದ್ದ ತಾಪ್ಸಿ ಪನ್ನು, ''ಸಮಂತಾಗೆ ನಾನೊಂದು ಆಫರ್ ಕೊಟ್ಟಿದ್ದೇನೆ ಆ ಆಫರ್‌ ಅನ್ನು ಆಕೆ ನಿರಾಕರಿಸುವಂತಿಲ್ಲ'' ಎಂದಿದ್ದರು. ತಾಪ್ಸಿ ಪನ್ನು ನಿರ್ಮಾಣ ಮಾಡುತ್ತಿರುವ ಸಿನಿಮಾದಲ್ಲಿ ಸಮಂತಾ ಜೊತೆಗೆ ತಾಪ್ಸಿ ಸಹ ಮುಖ್ಯ ಪಾತ್ರದಲ್ಲಿರಲಿದ್ದಾರೆ.

ಹಾಲಿವುಡ್ ಸಿನಿಮಾದಲ್ಲಿ ಸಮಂತಾ!

ಸಮಂತಾ ಕೇವಲ ಬಾಲಿವುಡ್‌ ಮಾತ್ರವಲ್ಲ ಹಾಲಿವುಡ್ ಸಿನಿಮಾ ಒಂದರಲ್ಲಿಯೂ ನಟಿಸುತ್ತಿದ್ದಾರೆ. ಹಾಲಿವುಡ್ ನಿರ್ಮಾಣ ಸಂಸ್ಥೆಯು ಭಾರತೀಯ ನಿರ್ಮಾಣ ಸಂಸ್ಥೆಯ ಸಹಭಾಗಿತ್ವದಲ್ಲಿ ನಿರ್ಮಾಣ ಮಾಡುತ್ತಿರುವ ಇಂಗ್ಲಿಷ್ ಸಿನಿಮಾ ಒಂದರಲ್ಲಿ ಸಮಂತಾಗೆ ಪ್ರಮುಖ ಪಾತ್ರವಿದೆ. ತಿಮೇರಿ ಎನ್ ಮುರಾರಿ ಎಂಬುವರು ರಚಿಸಿರುವ 2004 ರ ಕಾದಂಬರಿ 'ಅರೇಂಜ್‌ಮೆಂಟ್ಸ್ ಆಫ್ ಲವ್' ಕತೆಯನ್ನು ಹಾಲಿವುಡ್ ನಿರ್ದೇಶಕ ಫಿಲಿಫ್ ಜಾನ್ ಅದೇ ಹೆಸರಲ್ಲಿ ತೆರೆಗೆ ತರುತ್ತಿದ್ದು ಸಿನಿಮಾದಲ್ಲಿ ಸಮಂತಾ ದ್ವಿಲಿಂಗಿಯ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾ ಬಗ್ಗೆ ಸಮಂತಾಗೆ ಭಾರಿ ನಿರೀಕ್ಷೆಗಳಿವೆ.

ಹಲವು ಸಿನಿಮಾಗಳಲ್ಲಿ ಸಮಂತಾ ಬ್ಯುಸಿ

ಇವುಗಳ ಹೊರತಾಗಿ ಸಮಂತಾ ನಟಿಸಿರುವ 'ಶಾಕುಂತಲಮ್' ಸಿನಿಮಾ ಕೆಲವೇ ತಿಂಗಳಲ್ಲಿ ಬಿಡುಗಡೆ ಆಗಲಿದೆ. ತಮಿಳಿನ 'ಕಾತುವಾಕು ರೆಂಡು ಕಾದಲ್' ಸಿನಿಮಾದಲ್ಲಿಯೂ ಸಮಂತಾ ನಟಿಸಿದ್ದು, ಈ ಸಿನಿಮಾದಲ್ಲಿ ಸಮಂತಾ ಜೊತೆಗೆ ನಯನತಾರಾ ಹಾಗೂ ವಿಜಯ್ ಸೇತುಪತಿ ಸಹ ಇದ್ದಾರೆ. ಹರಿ ಶಂಕರ್ ನಿರ್ದೇಶನದ 'ಯಶೋಧ' ಸಿನಿಮಾವನ್ನು ಸಹ ಸಮಂತಾ ಒಪ್ಪಿಕೊಂಡಿದ್ದಾರೆ. ಇವುಗಳ ಜೊತೆಗೆ 'ಪುಷ್ಪ 2' ಸಿನಿಮಾದಲ್ಲಿ ಮತ್ತೊಂದು ಐಟಂ ಹಾಡಿಗೆ ಸಮಂತಾ ಸೊಂಟ ಬಳುಕಿಸಲಿದ್ದಾರೆ ಎನ್ನಲಾಗುತ್ತಿದೆ.