ಯಶ್ - ಶಂಕರ್ ಕಾಂಬಿನೇಷನ್‌ ಚಿತ್ರಕ್ಕೆ ನೆಟ್‌ಫ್ಲಿಕ್ಸ್- ಕರಣ್ ಜೋಹರ್ ಬಂಡವಾಳ?

ಶಂಕರ್ ನಿರ್ದೇಶನದ ಚಿತ್ರದಲ್ಲಿ ಯಶ್?

'KGF' ನಂತರ ಅಂತದ್ದೇ ಯಶ್ ಅಂಥದ್ದೇ ಪ್ಯಾನ್ ಇಂಡಿಯಾ ಸಿನಿಮಾ ಮಾಡಬೇಕಿದೆ. ಪ್ರಾಜೆಕ್ಟ್‌ನ ಸರಿಯಾಗಿ ಡೀಲ್ ಮಾಡುವ ನಿರ್ದೇಶಕ ಬೇಕಾಗಿದೆ. ತಮಿಳಿನ ಖ್ಯಾತ ನಿರ್ದೇಶಕ ಶಂಕರ್ ನಿರ್ದೇಶನದಲ್ಲಿ ಯಶ್ ನಟಿಸ್ತಾರೆ ಅನ್ನಲಾಗ್ತಿದೆ. ಸದ್ಯ ಶಂಕರ್ RC15 ಹಾಗೂ ಇಂಡಿಯನ್-2 ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಮುಂದಿನ ವರ್ಷ ಯಶ್ ಸಿನಿಮಾ ಕೈಗೆತ್ತಿಕೊಳ್ತಾರೆ ಎನ್ನುವ ಗುಸುಗುಸು ಶುರುವಾಗಿದೆ.

ವೇಲ್‌ಪರಿ ಕಾದಂಬರಿ ಆಧರಿತ ಸಿನಿಮಾ

ತಮಿಳು ಸಾಹಿತಿ ಎಸ್. ವೆಂಕಟೇಶನ್ ಬರೆದ 'ವೇಲ್‌ಪರಿ' ಎನ್ನುವ ಐತಿಹಾಸಿಕ ಕಥಾಹಂದರದ ಕಾದಂಬರಿ ಆಧರಿಸಿ ಶಂಕರ್ ಸಿನಿಮಾ ಮಾಡ್ತಾರೆ ಎನ್ನಲಾಗ್ತಿದೆ. ಈ ಚಿತ್ರದಲ್ಲಿ ಸೂರ್ಯ ಹೀರೊ ಆಗಿ ನಟಿಸ್ತಾರೆ ಎನ್ನುವ ಮಾತುಗಳು ಕೇಳಿಬರ್ತಿದೆ. ಆದರೆ ರಾಜ ವೇಪ್‌ಪರಿ ಪಾತ್ರದಲ್ಲಿ ಯಶ್ ಬಣ್ಣ ಹಚ್ಚುವ ಸಾಧ್ಯತೆ ಇದೆ ಎಂದು ಕಾಲಿವುಡ್‌ನಲ್ಲಿ ಗುಲ್ಲಾಗಿದೆ. ಬಹುಕೋಟಿ ವೆಚ್ಚದಲ್ಲಿ ಈ ಸಿನಿಮಾ ನಿರ್ಮಾಣವಾಗುತ್ತೆ ಎನ್ನಲಾಗುತ್ತಿದೆ.

1000 ಕೋಟಿ ಬಜೆಟ್‌ನಲ್ಲಿ ಯಶ್‌-ಶಂಕರ್ ಪ್ರಾಜೆಕ್ಟ್?

ಶಂಕರ್ 'ವೇಲ್‌ಪರಿ' ಕಾದಂಬರಿಯನ್ನು 1000 ಕೋಟಿ ರೂ. ಬಜೆಟ್‌ನಲ್ಲಿ ತೆರೆಗೆ ತರುವ ಮನಸ್ಸು ಮಾಡಿದ್ದಾರಂತೆ. ಈಗಾಗಲೇ ಎಸ್. ವೆಂಕಟೇಶನ್ ಅವರಿಗೆ ಚಿತ್ರಕಥೆ ಬರೆಯಲು ಸೂಚಿಸಿದ್ದಾರೆ. 'ಬಾಹುಬಲಿ', 'ಪೊನ್ನಿಯಿನ್ ಸೆಲ್ವನ್' ರೀತಿಯ ಕಾಸ್ಟ್ಯೂಮ್ ಡ್ರಾಮಾ ಆಗಿರುವುದರಿಂದ ಚಿತ್ರಕ್ಕೆ ಭಾರೀ ಮೊತ್ತದ ಬಜೆಟ್ ಬೇಕು ಎನ್ನಲಾಗ್ತಿದೆ. ಅದ್ಧೂರಿ ಸೆಟ್‌ಗಳು, ಗ್ರಾಫಿಕ್ಸ್‌, ಕಲಾವಿದರ ಸಂಭಾವನೆ ಸೇರಿ ಬರೋಬ್ಬರಿ 1000 ಕೋಟಿ ರೂ. ಬಂಡವಾಳ ಬೇಕಾಗಬಹುದು ಎಂದು ಅಂದಾಜಿಸಲಾಗ್ತಿದೆ.

ನೆಟ್‌ಫ್ಲಿಕ್ಸ್‌- ಕರಣ್‌ ಜೋಹರ್ ಬಂಡವಾಳ?

'KGF' -2 ಸಿನಿಮಾ ಬರೋಬ್ಬರಿ 1200 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು. ಆದರೆ ಯಶ್ ಮುಂದಿನ ಸಿನಿಮಾ ಬಜೆಟ್ಟೇ 1000 ಕೋಟಿ. ರೂ ಎನ್ನಲಾಗ್ತಿದೆ. ಬಾಲಿವುಡ್ ನಿರ್ದೇಶಕ ನಿರ್ಮಾಪಕ ಈ ಚಿತ್ರಕ್ಕೆ ಬಂಡವಾಳ ಹೂಡುವ ಬಗ್ಗೆ ಮಾತುಕತೆ ನಡೀತಿದೆಯಂತೆ. ಕರಣ್ ಜೋಹರ್ ಜೊತೆಗೆ ನೆಟ್‌ಫಿಕ್ಸ್‌ ಕೈ ಜೋಡಿಸುತ್ತಿದ್ದು, ಭಾರತೀಯ ಚಿತ್ರರಂಗದಲ್ಲೇ ಇದು ಹೈಬಜೆಟ್ ಸಿನಿಮಾ ಆಗಬಹುದು ಎಂದು ಊಹಿಸಲಾಗ್ತಿದೆ. ಆದರೆ ಈ ಬಗ್ಗೆ ಖಚಿತ ಮಾಹಿತಿ ಸಿಗಬೇಕಿದೆ. ಅಥವಾ ಇದೆಲ್ಲಾ ಬರೀ ಅಂತೆ ಕಂತೆ ಸುದ್ದಿ ಅಷ್ಟೇನಾ ಎನ್ನುವುದನ್ನು ಕಾದು ನೋಡಬೇಕಿದೆ.