ರಿಲೀಸ್‌ಗೂ ಮೊದ್ಲೆ ದೇಶದಲ್ಲಿ 'ಅವತಾರ್'- 2 ಕಲೆಕ್ಷನ್ 12 ಕೋಟಿ: ಎಷ್ಟು ಸ್ಕ್ರೀನ್ಸ್, ಕಾಲಾವಧಿ ಎಷ್ಟು?

192 ನಿಮಿಷಗಳ ಸಿನಿಮಾ

ಇಷ್ಟು ದಿನ ಭಾರತದ ಫಿಲ್ಮ್ ಮೇಕರ್ಸ್‌ಗಳಿಗೆ ಎದುರಾಗುತ್ತಿದ್ದ ಸಮಸ್ಯೆ ಈಗ ಜೇಮ್ಸ್ ಕ್ಯಾಮರೂನ್‌ಗೂ ಎದುರಾದಂತೆ ಕಾಣುತ್ತಿದೆ. 'ಅವತಾರ್' - 2 ಸಿನಿಮಾ ಕಾಲಾವಧಿ ಬರೋಬ್ಬರಿ 3 ಗಂಟೆ 12 ನಿಮಿಷ. ಹಾಲಿವುಡ್ ಸಿನಿಮಾಗಳು ಸಾಮಾನ್ಯವಾಗಿ ಕಡಿಮೆ ಕಾಲಾವಧಿ ಇರುತ್ತವೆ. ಪ್ರೀಕ್ವೆಲ್ ಕೂಡ 2 ಗಂಟೆ 41 ನಿಮಿಷ ಇತ್ತು. ಸೀಕ್ವೆಲ್ ಅದಕ್ಕಿಂತ ಅರ್ಧ ಗಂಟೆ ದೊಡ್ಡದಾಗಿದೆ. ಇದು ಥಿಯೇಟರ್‌ಗಳಲ್ಲಿ ಸಿನಿಮಾ ಪ್ರದರ್ಶಿಸಲು ಸಮಸ್ಯೆ ತಂದೊಡ್ಡಿದೆ. ಜೊತೆಗೆ ಇಷ್ಟು ದೀರ್ಘಾವಧಿಯ ಸಿನಿಮಾ ಪ್ರೇಕ್ಷಕರನ್ನು ಆಕಳಿಸದಂತೆ ಹಿಡಿದಿಟ್ಟುಕೊಳ್ಳುತ್ತಾ ಎನ್ನುವ ಪ್ರಶ್ನೆಯೂ ಎದುರಾಗಿದೆ.

ಭಾರತದ 4000 ಸ್ಕ್ರೀನ್‌ಗಳಲ್ಲಿ ರಿಲೀಸ್

ದೇಶ್ಯಾದ್ಯಂತ ಬಹಳದ ದೊಡ್ಡಮಟ್ಟದಲ್ಲಿ 'ಅವತಾರ್: ದಿ ವೇ ಆಫ್ ವಾಟರ್' ಸಿನಿಮಾ ತೆರೆಗಪ್ಪಳಿಸ್ತಿದೆ. ಬಾಲಿವುಡ್‌ನ ದೊಡ್ಡ ಸಿನಿಮಾ ರೇಂಜ್‌ಗೆ ಈ ಹಾಲಿವುಡ್ ಸಿನಿಮಾ 4000 ಸ್ಕ್ರೀನ್‌ಗಳಲ್ಲಿ ರಿಲೀಸ್ ಆಗುತ್ತಿದೆ. ರಾಜ್ಯದಲ್ಲೂ ಬಹುತೇಕ ಮಲ್ಟಿಫ್ಲೆಕ್ಸ್, ಸಿಂಗಲ್ ಸ್ಕ್ರೀನ್‌ ಥಿಯೇಟರ್‌ಗಳಲ್ಲಿ 'ಅವತಾರ್- 2' ಸಿನಿಮಾ ಸದ್ದು ಮಾಡಲಿದೆ. ಇಂಗ್ಲೀಷ್ ಜೊತೆಗೆ ಹಿಂದಿ, ಕನ್ನಡ, ತಮಿಳು, ತೆಲುಗು, ಮಲಯಾಳಂ ಭಾಷೆಗಳಲ್ಲಿ ಸಿನಿಮಾ ಪ್ರೇಕ್ಷಕರನ್ನು ರಂಜಿಸಲಿದೆ.

12 ಕೋಟಿ ಕಲೆಕ್ಷನ್

ಕಳೆದ ಕೆಲ ದಿನಗಳಿಂದ 'ಅವತಾರ್- 2' ಚಿತ್ರದ ಆನ್‌ಲೈನ್ ಟಿಕೆಟ್ ಬುಕ್ಕಿಂಗ್ ಶುರುವಾಗಿದೆ. ಪ್ರೇಕ್ಷಕರು ಟಿಕೆಟ್ ಬುಕ್ ಮಾಡಲು ಮುಗಿಬಿದ್ದಿದ್ದಾರೆ. ಸಿನಿಮಾ ರಿಲೀಸ್‌ಗೂ ಮೊದಲೇ ದೇಶದಲ್ಲಿ 12 ಕೋಟಿ ರೂ.ಗೂ ಅಧಿಕ ಕಲೆಕ್ಷನ್ ಮಾಡಿದೆ. ಪ್ರೇಕ್ಷಕರು ಜೇಮ್ಸ್ ಕ್ಯಾಮರೂನ್ ದೃಶ್ಯಕಾವ್ಯ ನೋಡಲು ಬಹಳ ಉತ್ಸುಕರಾಗಿರುವುದು ಗೊತ್ತಾಗುತ್ತಿದೆ.

ಚಿತ್ರಕ್ಕೆ ಮಿಶ್ರ ಪ್ರತಿಕ್ರಿಯೆ

ಈಗಾಗಲೇ ಕೆಲವೆಡೆ 'ಅವತಾರ್- 2' ಚಿತ್ರದ ಪ್ರೀಮಿಯರ್ ಶೋಗಳು ನಡೆದಿದೆ. ಸಿನಿಮಾ ನೋಡಿದವರಿಗೆ ಮಿಶ್ರಪ್ರತಿಕ್ರಿಯೆ ಸಿಕ್ಕಿದೆ. ಕೆಲವರು ಅದ್ಭುತ ದೃಶ್ಯಕಾವ್ಯ ಎಂದರೆ ಮತ್ತೆ ಕೆಲವರು ಬೋರಿಂಗ್ ಸಿನಿಮಾ ಎಂದು ಹೇಳುತ್ತಿದ್ದಾರೆ. ಪ್ರೇಕ್ಷಕರು ಚಿತ್ರಕ್ಕೆ ಎಷ್ಟು ಅಂಕ ನೀಡುತ್ತಾರೆ ಎನ್ನುವುದು ಶೀಘ್ರದಲ್ಲೇ ಗೊತ್ತಾಗಲಿದೆ.