ಅರ್ಹತೆ ಪ್ರಶ್ನಿಸಿದ ಪತ್ರಕರ್ತನಿಗೆ ಪ್ರಿಯಾಂಕಾ ಚೋಪ್ರಾ ದಿಟ್ಟ ಉತ್ತರ

ನಟಿ ಪ್ರಿಯಾಂಕಾ ಚೋಪ್ರಾ ಹಾಗೂ ಅವರ ಪತಿ ನಿಕ್ ಜೋನಸ್ ಇತ್ತೀಚೆಗಷ್ಟೆ 93ನೇ ಆಸ್ಕರ್‌ ಪ್ರಶಸ್ತಿಯ ಅಂತಿಮ ಸುತ್ತಿಗೆ ಆಯ್ಕೆಯಾದ ಸಿನಿಮಾಗಳ ಪಟ್ಟಿಯನ್ನು ಪ್ರಕಟಿಸಿದರು.

ಹೀಗೆ ಆಸ್ಕರ್‌ ಪ್ರಶಸ್ತಿಯ ನಾಮಿನೇಷನ್‌ ಪಟ್ಟಿಯನ್ನು ಪ್ರಕಟಿಸಲು ಪ್ರಿಯಾಂಕಾ ಚೋಪ್ರಾಗೆ ಏನು ಅರ್ಹತೆ ಇದೆ ಎಂದು ವಿದೇಶಿ ಪತ್ರಕರ್ತರೊಬ್ಬರು ಸಾಮಾಜಿಕ ಜಾಲತಾಣದಲ್ಲಿ ಪ್ರಶ್ನಿಸಿದ್ದರು. ಆ ಪತ್ರಕರ್ತನಿಗೆ ಸೂಕ್ತ ಉತ್ತರವನ್ನು ಪ್ರಿಯಾಂಕಾ ನೀಡಿದ್ದಾರೆ.

ಆಸ್ಟ್ರೇಲಿಯಾದ ಪತ್ರಕರ್ತ ಪೀಟರ್ ಫೋರ್ಡ್ ಟ್ವೀಟ್ ಮಾಡಿ, 'ಸಿನಿಮಾರಂಗಕ್ಕೆ ಪ್ರಿಯಾಂಕಾ ಚೋಪ್ರಾ, ನಿಕ್ ಜೋನಸ್ ಅವರುಗಳು ನೀಡಿರುವ ಕೊಡುಗೆ ಏನು? ಆಸ್ಕರ್ ನಾಮಿನೇಷನ್ ಘೋಷಿಸುವ ಅರ್ಹತೆ ಅವರಿಗೆ ಏನಿದೆ?' ಎಂದು ಪೀಟರ್ ಫೋರ್ಡ್ ಪ್ರಶ್ನಿಸಿದ್ದಾರೆ.

ಇದಕ್ಕೆ ಉತ್ತರಿಸಿರುವ ನಟಿ ಪ್ರಿಯಾಂಕಾ ಚೋಪ್ರಾ, 'ಅರ್ಹತೆಯ ಮಾನದಂಡ ಏನು?' ಎಂದು ಪ್ರಶ್ನಿಸಿರುವ ನಿಮ್ಮ ಯೋಚನೆಯ ಬಗ್ಗೆ ಗೌರವವಿದೆ. ಇಲ್ಲಿ ನಾನು ನಟಿಸಿರುವ 60 ಕ್ಕೂ ಹೆಚ್ಚು ಸಿನಿಮಾಗಳ ಪಟ್ಟಿಯನ್ನು ನೀಡುತ್ತಿದ್ದೇನೆ, ನಿಮ್ಮ ಗಮನಕ್ಕಿರಲಿ' ಎಂದು ತಮ್ಮ ಸಿನಿಮಾಗಳ ಮಾಹಿತಿಯುಳ್ಳ ಕಿರು ವಿಡಿಯೋ ಅನ್ನು ಟ್ವಿಟ್ಟರ್‌ನಲ್ಲಿ ಹಂಚಿಕೊಂಡಿದ್ದಾರೆ ಪ್ರಿಯಾಂಕಾ ಚೋಪ್ರಾ.

ವಿಜಯ್ ಮುಖ್ಯ ಪಾತ್ರದಲ್ಲಿ ನಟಿಸಿದ್ದ ತಮಿಳು ಸಿನಿಮಾ 'ತಮಿಳನ್' ಮೂಲಕ ನಟನಾ ವೃತ್ತಿ ಆರಂಭಿಸಿದ ಪ್ರಿಯಾಂಕಾ ಚೋಪ್ರಾ ಈ ವರೆಗೆ 60 ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಇವುಗಳಲ್ಲಿ ಕೆಲವು ಹಾಲಿವುಡ್ ಸಿನಿಮಾಗಳು ಸಹ ಸೇರಿವೆ.

'ಫ್ಯಾಷನ್' ಸಿನಿಮಾದಲ್ಲಿನ ನಟನೆಗಾಗಿ ಪ್ರಿಯಾಂಕಾ ಚೋಪ್ರಾಗೆ ರಾಷ್ಟ್ರ ಪ್ರಶಸ್ತಿ ದೊರೆತಿದೆ. ಐದು ಫಿಲಂ ಫೇರ್‌ ಪ್ರಶಸ್ತಿಗಳು ಸಹ ಪ್ರಿಯಾಂಕಾ ಪಾಲಾಗಿವೆ. ಪೀಪಲ್ಸ್ ಚಾಯ್ಸ್ ಪ್ರಶಸ್ತಿ ಜೊತೆಗೆ ಪದ್ಮಶ್ರೀ ಗೌರವವನ್ನೂ ಪಡೆದಿದ್ದಾರೆ ಪ್ರಿಯಾಂಕಾ ಚೋಪ್ರಾ.

ಇದೀಗ ಪ್ರಿಯಾಂಕಾ ಚೋಪ್ರಾ ಸಹ ನಿರ್ಮಾಣ ಮಾಡಿ ಮುಖ್ಯ ಪಾತ್ರದಲ್ಲಿ ನಟಿಸಿರುವ 'ದಿ ವೈಟ್ ಟೈಗರ್' ಸಿನಿಮಾವು ಆಸ್ಕರ್‌ನ ಚಿತ್ರಕತೆ ರೂಪಾಂತರ (adapted screenplay) ವಿಭಾಗದಲ್ಲಿ ಅಂತಿಮ ಸುತ್ತಿಗೆ ಆಯ್ಕೆ ಆಗಿದೆ.