'ಕರಿಯ' ಮಾಡಿದ ಕೆಲೆಕ್ಷನ್ ಎಷ್ಟು? ಹಿಟ್ ಆಗಿದ್ದು ಹೇಗೆ? ಪ್ರೇಮ್ ಬಿಚ್ಚಿಟ್ಟ ಮಾಹಿತಿ

ಬೇರೆ ಚಿತ್ರ ಬಂದು ನಮ್ಮ ಸಿನಿಮಾ ತೆಗೆದುಬಿಟ್ಟರು: ಪ್ರೇಮ್

''2003ರಲ್ಲಿ ಸಿನಿಮಾ ಬಿಡುಗಡೆ ಆದಾಗ ಸಿನಿಮಾ ಚೆನ್ನಾಗಿ ಪ್ರದರ್ಶನ ಕಾಣುತ್ತಿತ್ತು. ಆದರೆ ಅದೇ ಸಮಯಕ್ಕೆ ಇನ್ನೊಂದು ಸಿನಿಮಾ ಬಂದ ಕಾರಣ ನಮ್ಮ ಸಿನಿಮಾವನ್ನು ತೆಗೆದುಬಿಟ್ಟರು. ಆಗೆಲ್ಲ ಚಿತ್ರಮಂದಿರಗಳ ರಾಜಕೀಯ ಬಹಳ ಇತ್ತು. ಈಗ ಹಾಗೇನೂ ಇಲ್ಲ. ಅದರಲ್ಲೂ ನನ್ನ ಸಿನಿಮಾ ಎಂದರೆ ರಾಜಕೀಯ ಹೆಚ್ಚಾಗಿಯೇ ಮಾಡೋರು. ಹಾಗಾಗಿ ಚೆನ್ನಾಗಿ ಓಡುತ್ತಿದ್ದ ನಮ್ಮ ಸಿನಿಮಾವನ್ನು ಇನ್ನೊಂದು ಸಿನಿಮಾ ಬಂತೆಂದು ತೆಗೆದುಬಿಟ್ಟರು'' ಎಂದು ನೆನಪು ಮಾಡಿಕೊಂಡರು ಪ್ರೇಮ್.

ಸಿನಿಮಾ ಹಿಟ್ ಆಗಿದ್ದು ಹೇಗೆ?

''ಮೊದಲಿಗೆ ಸಿನಿಮಾದ ವಿತರಣೆ ಹಕ್ಕು ರಜಸು ಕಂಬೈನ್ಸ್ ಬಳಿ ಇತ್ತು. ಅವರು ಈಗಲೂ ಇದ್ದಾರೆ. ರಜಸು ಅವರು ವಿತರಣೆ ಹಕ್ಕನ್ನು ಇಕ್ಬಾಲ್ ಫಿಲಮ್ಸ್‌ನವರಿಗೆ ಕೊಟ್ಟರು. ಅವರು ಸಿನಿಮಾಕ್ಕೆ ಚೆನ್ನಾಗಿ ಪ್ರಚಾರ ಮಾಡಿ ಸಿನಿಮಾವನ್ನು ಮತ್ತೆ ಬಿಡುಗಡೆ ಮಾಡಿದರು. ಆ ನಂತರ ಸಿನಿಮಾ ಸೂಪರ್ ಡೂಪರ್ ಹಿಟ್ ಆಗಿಬಿಟ್ಟಿತು. 'ಕರಿಯ' ಸಿನಿಮಾ ಆಗಿನ ಕಾಲಕ್ಕೆ ಒಂದು ವರ್ಷ ಓಡಿತು. ಭಾರಿ ದೊಡ್ಡ ಕಲೆಕ್ಷನ್ ಅನ್ನು ಆ ಸಿನಿಮಾ ಮಾಡಿತ್ತು'' ಎಂದರು ಪ್ರೇಮ್.

ಆ ವ್ಯಕ್ತಿಯ ಜೀವನವೇ ಬದಲಾಗಿ ಹೋಯ್ತು: ಪ್ರೇಮ್

''ಬಿ-ಸಿ ಸೆಂಟರ್‌ನಲ್ಲಿ ಸಿನಿಮಾ ಬಹಳ ಒಳ್ಳೆಯ ಪ್ರದರ್ಶನ ಕಂಡಿತು. ಆಗಿನ ಕಾಲಕ್ಕೆ 2.50 ಕೋಟಿಗೂ ಹೆಚ್ಚು ಕಲೆಕ್ಷನ್ ಆ ಸಿನಿಮಾ ಮಾಡಿತು. ಇಕ್ಬಾಲ್ ಅವರು ಈಗಲೂ ಅದನ್ನು ನೆನಪು ಮಾಡಿಕೊಳ್ಳುತ್ತಾರೆ. ಸೈಕಲ್‌ನಲ್ಲಿ ಗಾಂಧಿ ನಗರಕ್ಕೆ ಬರುತ್ತಿದ್ದೆ, ಸಣ್ಣ ಕಚೇರಿ ಇಟ್ಟುಕೊಂಡು ನಾಲ್ಕು ಸಿನಿಮಾ ಪೋಸ್ಟರ್ ಹಾಕಿಕೊಂಡು ವ್ಯವಹಾರ ಮಾಡುತ್ತಿದ್ದೆ. 'ಕರಿಯ' ಸಿನಿಮಾ ನನ್ನ ಜೀವನವನ್ನೇ ಬದಲಾಯಿಸಿಬಿಡ್ತು, ಮನೆ ಮಾಡಿಕೊಂಡೆ, ಮಕ್ಕಳ ಮದುವೆ ಮಾಡಿದೆ. ಆಸ್ತಿ ಖರೀದಿಸಿದೆ. ಸಾಲಗಳನ್ನೆಲ್ಲ ತೀರಿಸಿದೆ. ನಿಮ್ಮ ಫೋಟೊವನ್ನು ನಮ್ಮ ಮನೆಯಲ್ಲಿ ಇಟ್ಟುಕೊಂಡಿದ್ದೇನೆ ಎಂದು ಇಕ್ಬಾಲ್ ಹೇಳುತ್ತಾರೆ'' ಎಂದು ನಗುತ್ತ ನೆನಪು ಮಾಡಿಕೊಂಡರು ಪ್ರೇಮ್.

'ಎಕ್ಸ್‌ಕ್ಯೂಸ್ ಮೀ' ಮಾಡಲು ಕಾರಣವೇನು?

''ಕರಿಯ' ಸಿನಿಮಾ ಬಹಳ ದೊಡ್ಡ ಹಿಟ್ ಆಯ್ತು. ಆ ನಂತರ ನನ್ನ ಬಗ್ಗೆ ಗಾಂಧಿ ನಗರದಲ್ಲಿ ಟೀಕೆಗಳು, ಚರ್ಚೆಗಳು ಶುರುವಾಯ್ತು. ರೌಡಿಸಂ ಕತೆ ಇಟ್ಕೊಂಡು ಅದೃಷ್ಟದಲ್ಲಿ ಏನೋ ಮಾಡಿಬಿಟ್ಟಿದ್ದಾನೆ ಮುಂದೆ ಏನು ಮಾಡ್ತಾನೆ ಎಂದರು. ಚೆನ್ನಾಗಿ ಕಾಲೆಳೆದರು. ಅವರು ಹಾಗೆ ಮಾಡಿದ್ದರಿಂದಲೇ ಏನೋ ಅದನ್ನೇ ಸವಾಲಾಗಿ ತೆಗೆದುಕೊಂಡು ಹೊಸಬರನ್ನೇ ಹಾಕಿಕೊಂಡು ಮತ್ತೆ ಗೆದ್ದು ತೋರಿಸಬೇಕು, ನನ್ನ ಪ್ರತಿಭೆ ಪ್ರದರ್ಶನ ಮಾಡಬೇಕೆಂದು ನಿಶ್ಚಯಿಸಿ 'ಎಕ್ಸ್‌ಕ್ಯೂಸ್‌ ಮೀ' ಸಿನಿಮಾ ಮಾಡಿದೆ. ಹೊಸಬರನ್ನೇ ಹಾಕಿಕೊಂಡೆ, ಪ್ರೇಮಕತೆ ಸಿನಿಮಾ ಮಾಡಿದೆ ಆ ಸಿನಿಮಾ ಕೂಡ ಒಂದು ವರ್ಷ ಓಡಿಬಿಟ್ಟಿತು'' ಎಂದು ನೆನಪು ಮಾಡಿಕೊಂಡರು ಪ್ರೇಮ್. ಇದೀಗ ಪ್ರೇಮ್ ನಿರ್ದೇಶನದ ಹೊಸ ಸಿನಿಮಾ 'ಏಕ್ ಲವ್ ಯಾ' ಇಂದು (ಫೆಬ್ರವರಿ 24) ರಂದು ಬಿಡುಗಡೆ ಆಗಿದೆ.