ಧುರಂಧರ್ 2 ಚಿತ್ರದ ಐಷಾರಾಮಿ ಮನೆ ಎಲ್ಲಿದೆ ? ಕರಾಚಿ ಬಂಗಲೆಯ ಅಸಲಿ ವಿಳಾಸ ಇಲ್ಲಿದೆ

ರಣವೀರ್ ಸಿಂಗ್ ಅಭಿನಯದ 'ಧುರಂಧರ್ 2' ಸಿನಿಮಾ ಬಾಕ್ಸ್ ಆಫೀಸ್ ನಲ್ಲಿ ಧೂಳೆಬ್ಬಿಸುತ್ತಿದೆ. ಈ ಚಿತ್ರದ ಆಕ್ಷನ್ ಮತ್ತು ಕಥೆಗೆ ಅಭಿಮಾನಿಗಳು ಫಿದಾ ಆಗಿದ್ದಾರೆ. ಅದರಲ್ಲೂ ಚಿತ್ರದಲ್ಲಿ ಬರುವ ಹಮ್ಜಾ ಅಲಿ ಮಜಾರಿಯ ಐಷಾರಾಮಿ ಬಂಗಲೆ ಎಲ್ಲರ ಗಮನ ಸೆಳೆಯುತ್ತಿದೆ.

ಸಿನಿಮಾದಲ್ಲಿ ಈ ಬಂಗಲೆ ಪಾಕಿಸ್ತಾನದ ಕರಾಚಿಯಲ್ಲಿದೆ ಎಂದು ತೋರಿಸಲಾಗಿದೆ. ಹಮ್ಜಾ ತನ್ನ ಪತ್ನಿ ಯಲಿನಾಳಿಗಾಗಿ ಈ ಸುಂದರ ವಿಲ್ಲಾವನ್ನು ಖರೀದಿಸುತ್ತಾನೆ. ಆದರೆ ಈ ಅದ್ಭುತ ಮನೆ ನಿಜವಾಗಿಯೂ ಎಲ್ಲಿದೆ ಗೊತ್ತಾ? ಈ ರಹಸ್ಯ ಈಗ ಬಯಲಾಗಿದೆ.

ಈ ಸುಂದರ ಬಂಗಲೆ ಇರೋದು ನಮ್ಮ ಭಾರತದ ಪಂಜಾಬ್ ನಲ್ಲಿ. ಹೌದು, ಅಮೃತಸರದಲ್ಲಿರುವ ಈ ಮನೆಯೇ ಸಿನಿಮಾದಲ್ಲಿ ಲಿಯಾರಿ ಬಂಗಲೆಯಾಗಿ ಕಾಣಿಸಿಕೊಂಡಿದೆ. ಈ ಸುದ್ದಿಯನ್ನು ಸ್ವತಃ ಆ ಮನೆಯನ್ನು ವಿನ್ಯಾಸಗೊಳಿಸಿದ ವಾಸ್ತುಶಿಲ್ಪಿಗಳ ತಂಡ ಹಂಚಿಕೊಂಡಿದೆ.

ಬಂಗಲೆಯ ಅಸಲಿ ಹೆಸರೇನು? ಇದರ ವಿಶೇಷತೆ ಏನು?

ಅಮೃತಸರದಲ್ಲಿರುವ ಈ ಐಷಾರಾಮಿ ಮನೆಗೆ 'ಆನಂದ' ಎಂದು ಹೆಸರಿಡಲಾಗಿದೆ. '23DC ಆರ್ಕಿಟೆಕ್ಟ್ಸ್' ಎಂಬ ಸಂಸ್ಥೆ ಈ ಮನೆಯನ್ನು ವಿನ್ಯಾಸಗೊಳಿಸಿದೆ. ಸೋಶಿಯಲ್ ಮೀಡಿಯಾದಲ್ಲಿ ವಿಡಿಯೋ ಹಂಚಿಕೊಂಡಿರುವ ಅವರು, ತಮ್ಮ ಪ್ರಾಜೆಕ್ಟ್ ದೊಡ್ಡ ಪರದೆಯ ಮೇಲೆ ಮಿಂಚುತ್ತಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದೆ. ಆದಿತ್ಯ ಧರ್ ಅವರ ಸಿನಿಮೀಯ ಕಲ್ಪನೆಗೆ ಈ ಮನೆ ಹೇಳಿ ಮಾಡಿಸಿದಂತಿದೆ.

ಪ್ರಕೃತಿ ಮತ್ತು ಆಧುನಿಕತೆಯ ಅದ್ಭುತ ಸಮ್ಮಿಶ್ರಣ...

ಈ ಬಂಗಲೆಯ ವಿನ್ಯಾಸ ತುಂಬಾ ವಿಭಿನ್ನವಾಗಿದೆ. ಇದು ಆಧುನಿಕ ಶೈಲಿ ಮತ್ತು ಭಾರತೀಯ ಸೌಂದರ್ಯ ಎರಡನ್ನೂ ಒಳಗೊಂಡಿದೆ. ಮನೆಯ ಸುತ್ತಲೂ ಹಸಿರು ತುಂಬಿದೆ. ಪ್ರಕೃತಿಯನ್ನು ಸಂರಕ್ಷಿಸಿ ಈ ಮನೆಯನ್ನು ಕಟ್ಟಲಾಗಿದೆ. ಹಗಲಿನಲ್ಲಿ ನೈಸರ್ಗಿಕ ಬೆಳಕು ಮನೆತುಂಬಾ ಹರಿಯುವಂತೆ ವಿನ್ಯಾಸ ಮಾಡಲಾಗಿದೆ. ಇಲ್ಲಿನ ಅಂಗಳಗಳು ಕವಿತೆಯ ಸಾಲುಗಳಂತೆ ಸುಂದರವಾಗಿವೆ.

ಹೇಗಿದೆ ಗೊತ್ತಾ ಬಂಗಲೆಯ ಒಳಾಂಗಣ ವಿನ್ಯಾಸ?

ಮನೆಯ ಒಳಗೆ ಹೋದರೆ ರಾಜವೈಭೋಗದ ಅನುಭವವಾಗುತ್ತದೆ. ಪ್ರವೇಶ ದ್ವಾರದಲ್ಲೇ ಮರದ ಕೆತ್ತನೆಗಳು ಮತ್ತು ಬೂದು ಬಣ್ಣದ ಗೋಡೆಗಳು ಸ್ವಾಗತಿಸುತ್ತವೆ. ಅಂಗಳದಲ್ಲಿ ಕಲ್ಲಿನ ಶಿಲ್ಪಗಳು ಮತ್ತು ಗಾಜಿನ ಗೋಡೆಗಳು ಮನೆಯ ಅಂದವನ್ನು ಹೆಚ್ಚಿಸಿವೆ. ಭದ್ರತೆಗಾಗಿ ಎತ್ತರದ ಗೋಡೆಗಳನ್ನು ನಿರ್ಮಿಸಲಾಗಿದೆ. ಆದರೆ ಇದು ಮನೆಯ ಸೌಂದರ್ಯಕ್ಕೆ ಎಲ್ಲಿಯೂ ಅಡ್ಡಿಯಾಗಿಲ್ಲ.

ಕಪ್ಪು ಅಮೃತಶಿಲೆಯ ಮೆಟ್ಟಿಲು ಮತ್ತು ಸ್ಫಟಿಕದ ಗೊಂಚಲು

ಮನೆಯ ಮಧ್ಯಭಾಗದಲ್ಲಿರುವ ಸುರುಳಿಯಾಕಾರದ ಕಪ್ಪು ಅಮೃತಶಿಲೆಯ ಮೆಟ್ಟಿಲು ಎಲ್ಲರ ಕಣ್ಣು ಸೆಳೆಯುತ್ತದೆ. ಇದಕ್ಕೆ ಬಿಳಿ ಬಣ್ಣದ ಫ್ಲೋರಿಂಗ್ ಅದ್ಭುತವಾಗಿ ಮ್ಯಾಚ್ ಆಗಿದೆ. ಹಾಲ್ನಲ್ಲಿ ಹಾಕಲಾದ ದೊಡ್ಡ ಸ್ಫಟಿಕದ ಗೊಂಚಲು ಶ್ರೀಮಂತಿಕೆಯನ್ನು ಎತ್ತಿ ತೋರಿಸುತ್ತದೆ. ಪ್ರತಿಯೊಂದು ಮಲಗುವ ಕೋಣೆಯನ್ನು ಕೂಡ ತುಂಬಾ ಆರಾಮದಾಯಕವಾಗಿ ವಿನ್ಯಾಸಗೊಳಿಸಲಾಗಿದೆ.

ಈಜುಕೊಳ ಮತ್ತು ಸುಂದರ ಉದ್ಯಾನವನ

ಸಿನಿಮಾದಲ್ಲಿ ಹಮ್ಜಾ ಮತ್ತು ಯಲಿನಾ ಸಮಯ ಕಳೆಯುವ ಆ ಸುಂದರ ತಾಣವೇ ಈ ಗಾರ್ಡನ್. ವಿಶಾಲವಾದ ಈಜುಕೊಳ ಮತ್ತು ಅದರ ಪಕ್ಕದಲ್ಲೇ ಇರುವ ಕುಳಿತುಕೊಳ್ಳುವ ಜಾಗ ಮನಸ್ಸಿಗೆ ಹಿತ ನೀಡುತ್ತದೆ. ರಾಟನ್ ಆಸನಗಳು ಮತ್ತು ಸುತ್ತಲಿನ ಗಿಡಮರಗಳು ಮನೆಯನ್ನು ಒಂದು ರೆಸಾರ್ಟ್ ನಂತೆ ಕಾಣುವಂತೆ ಮಾಡಿವೆ. ಸಿನಿಮಾ ನೋಡುವ ಪ್ರೇಕ್ಷಕರಿಗೆ ಇದು ಪಾಕಿಸ್ತಾನದ ಮನೆ ಎಂದೇ ನಂಬುವಂತೆ ಮಾಡಿದೆ ಕಲಾ ನಿರ್ದೇಶನ.

ಒಟ್ಟಿನಲ್ಲಿ, ತೆರೆಯ ಮೇಲೆ ಕರಾಚಿಯ ಲಿಯಾರಿ ಗ್ಯಾಂಗ್ಗಳ ಸಾಮ್ರಾಜ್ಯದಂತೆ ಕಂಡರೂ, ವಾಸ್ತವದಲ್ಲಿ ಇದು ಪಂಜಾಬ್ನ ಹೆಮ್ಮೆಯ ವಾಸ್ತುಶಿಲ್ಪವಾಗಿದೆ. ರಣವೀರ್ ಸಿಂಗ್ ಅವರ ಅಬ್ಬರದ ನಟನೆಯ ನಡುವೆ ಈ ಬಂಗಲೆ ಕೂಡ ಒಂದು ಪ್ರಮುಖ ಪಾತ್ರದಂತೆ ಪ್ರೇಕ್ಷಕರ ಮನ ಗೆದ್ದಿದೆ.