ರವಿಚಂದ್ರನ್ ಜೊತೆ ಕನ್ನಡದಲ್ಲಿ ಮತ್ತೆ ನಿಖಿತಾ ಟ್ರಾಫಿಕ್

ನಟಿ ನಿಖಿತಾ ತುಕ್ರಲ್, ಮತ್ತೊಂದು ಕನ್ನಡ ಸಿನಿಮಾದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಕನ್ನಡದಲ್ಲಿ 'ಬ್ಯಾನ್' ಪ್ರಹಸನದ ನಂತರ ನಿಖಿತಾ ಹೆಚ್ಚು ತಮಿಳು ಸಿನಿಮಾದಲ್ಲಿ ಬ್ಯುಸಿಯಾಗಿದ್ದರು. ಬ್ಯಾನ್ ಪ್ರಕರಣಕ್ಕೂ ಮೊದಲು, ದರ್ಶನ್ ನಾಯಕತ್ವದ 'ಸಂಗೊಳ್ಳಿ ರಾಯಣ್ಣ' ಚಿತ್ರದ ನಾಯಕಿ ಆಗಿದ್ದರು ನಿಖಿತಾ. ಆಮೇಲೆ ನಿಖಿತಾ ವೃತ್ತಿಜೀವನ ಕನ್ನಡದಲ್ಲಿ ಡೋಲಾಯಮಾನ ಎಂಬಂತಾಗಿತ್ತು.

ನಂತರ ಹೆಚ್ಚು ತಮಿಳು ಚಿತ್ರಗಳನ್ನು ಒಪ್ಪಿಕೊಳ್ಳುವ ಮೂಲಕ ನಿಖಿತಾ ತನಗೆ ಚಿತ್ರಗಳಿಗೇನೂ ಬರವಿಲ್ಲ ಎಂಬುದನ್ನು ನಿರೂಪಿಸಿದ್ದರು. ಇದೀಗ ಮಲೆಯಾಳಂ ಚಿತ್ರ 'ಟ್ರಾಫಿಕ್' ಕನ್ನಡದಲ್ಲಿ ರಿಮೇಕ್ ಆಗುತ್ತಿದೆ. ಅದಕ್ಕೆ ನಾಯಕರಾಗಿ ರವಿಚಂದ್ರನ್ ಹಾಗೂ ನಾಯಕಿ ನಿಖಿತಾ ತುಕ್ರಲ್. ಅಲ್ಲಿಗೆ ವಿವಾದದಿಂದ ನಿಖಿತಾಗೇನೂ ನಷ್ಟವಾಗಿಲ್ಲ ಎಂದಂತಾಗಿದೆ.

ಸದ್ಯಕ್ಕೆ ರವಿಚಂದ್ರನ್ ಹಾಗೂ ನಿಖಿತಾ ಇಬ್ಬರ ಕೈನಲ್ಲೂ ಸಾಕಷ್ಟು ಚಿತ್ರಗಳಿದ್ದು ಅವೆಲ್ಲಾ ಮುಗಿದ ಮೇಲೆ ಈ ಚಿತ್ರದ ಶೂಟಿಂಗ್ ಪ್ರಾರಂಭ. ಮಲೆಯಾಳಂ ನಲ್ಲಿ ಟ್ರಾಫಿಕ್ ಆಗಿದ್ದ ಹೆಸರು, ಕನ್ನಡದಲ್ಲಿಯೂ ಹಾಗೇ ಇರುವ ಸಂಭವ ಇದೆ. ಬದಲಾದರೆ ಹೇಗೂ ತಿಳಿಯುತ್ತದೆ. ಒಟ್ಟಿನಲ್ಲಿ ನಿಖಿತಾಗೆ ಅವಕಾಶಗಳಿಂದ 'ಟ್ರಾಫಿಕ್' ಜಾಮ್ ಆಗದಿದ್ದರೆ ಸಾಕು.