Filmfare: 70ನೇ ಫಿಲ್ಮ್‌ಫೇರ್ ಅವಾರ್ಡ್ಸ್ ಸೌತ್ 2026; ಕೊಚ್ಚಿಯಲ್ಲಿ ಆ ಸಮಾರಂಭಕ್ಕೆ ವೇದಿಕೆ ರೆಡಿ

ಕೇರಳ ಪ್ರವಾಸೋದ್ಯಮದ ಸಹಯೋಗದೊಂದಿಗೆ 70ನೇ ಫಿಲ್ಮ್‌ಫೇರ್ ಅವಾರ್ಡ್ಸ್ ಸೌತ್ ಪ್ರಶಸ್ತಿ ಪ್ರದಾನ ಸಮಾರಂಭ ರಂಗೇರಿದೆ. ಅಡ್ಲಕ್ಸ್ ಇಂಟರ್ನ್ಯಾಷನಲ್ ಕನ್ವೆನ್ಷನ್ ಸೆಂಟರ್‌ನಲ್ಲಿ ಕಾರ್ಯಕ್ರಮ ಇಂದು (ಫೆಬ್ರವರಿ 21) ರಾತ್ರಿ ಕೊಚ್ಚಿ ಎಲ್ಲರ ಗಮನ ಸೆಳೆಯುತ್ತಿದೆ. ಈ ರೆಡ್-ಕಾರ್ಪೆಟ್ ಸಮಾರಂಭವು 2024ರ ಅತ್ಯುತ್ತಮ ದಕ್ಷಿಣ ಭಾರತೀಯ ಚಲನಚಿತ್ರಗಳನ್ನು ಗೌರವಿಸಲಿದೆ. ದಕ್ಷಿಣದ 4 ಭಾಷೆಯ ಚಿತ್ರರಂಗದಲ್ಲಿ ಯಾರಿಗೆಲ್ಲಾ ಪ್ರಶಸ್ತಿ ಸಿಗುತ್ತದೆ ಎನ್ನುವ ಕುತೂಹಲ ಮೂಡಿದೆ.

ಅಂಕಮಾಲಿಯ ವಿಶಾಲವಾದ ಅಡ್ಲಕ್ಸ್ ಇಂಟರ್ನ್ಯಾಷನಲ್ ಕನ್ವೆನ್ಷನ್ ಸೆಂಟರ್‌ನಲ್ಲಿ ಇಂದು ಸಂಜೆ ನಿಗದಿಯಾಗಿರುವ ಈ ಸಮಾರಂಭವು, ಕೊಚ್ಚಿಯಲ್ಲಿ ಫಿಲ್ಮ್‌ಫೇರ್ ಅವಾರ್ಡ್ಸ್ ಸೌತ್ ಆಯೋಜನೆಯಾಗುತ್ತಿರುವ ಮೊದಲ ಇವೆಂಟ್ ಆಗಿದೆ. ಫಿಲ್ಮ್‌ಫೇರ್ ಮತ್ತು ದಿ ಟೈಮ್ಸ್ ಗ್ರೂಪ್ ಆಯೋಜಿಸಿರುವ ಈ ಕಾರ್ಯಕ್ರಮವು ಮಲಯಾಳಂ, ತಮಿಳು, ತೆಲುಗು ಮತ್ತು ಕನ್ನಡ ಚಿತ್ರರಂಗದ ಶ್ರೇಷ್ಠತೆಯನ್ನು ಗುರುತಿಸುತ್ತದೆ. ಆದರೆ ಇದು ಕೇರಳದಲ್ಲಿ ನಡೆಯುತ್ತಿರುವುದರಿಂದ ಮಲಯಾಳಂ ಸಿನಿಮಾಗಳಿಗೆ ಸಿಗುವ ಪ್ರಶಸ್ತಿಗಳು ಹೆಚ್ಚು ಗಮನ ಸೆಳೆಯುತ್ತಿವೆ.

ಫಿಲ್ಮ್‌ಫೇರ್ ಅವಾರ್ಡ್ಸ್: ದಿನಾಂಕ, ಸಮಯ, ಸ್ಥಳ ಮತ್ತು ಪ್ರಸಾರ

ಪ್ರಶಸ್ತಿ ಪ್ರದಾನ ಸಮಾರಂಭವು ಇಂದು, ಫೆಬ್ರವರಿ 21, 2026 ರಂದು ನಡೆಯುತ್ತಿದ್ದು, ಮುಖ್ಯ ಸಮಾರಂಭಕ್ಕೂ ಮೊದಲು ತಾರೆಯರು ರೆಡ್ ಕಾರ್ಪೆಟ್ ಮೇಲೆ ಆಗಮಿಸುವುದರೊಂದಿಗೆ ಸಂಜೆ ಸಂಭ್ರಮಾಚರಣೆಗಳು ಪ್ರಾರಂಭವಾಗಲಿವೆ. ಡಿಸ್ನಿ ಸ್ಟಾರ್‌ನ ಪ್ರಾದೇಶಿಕ ಚಲನಚಿತ್ರ ಟಿವಿ ಚಾನೆಲ್‌ಗಳಲ್ಲಿ ಕಾರ್ಯಕ್ರಮ ಪ್ರಸಾರವಾಗಲಿದೆ ಎಂದು ಫಿಲ್ಮ್‌ಫೇರ್ ಘೋಷಿಸಿದೆ. ಕೇರಳದಲ್ಲಿ ಏಷ್ಯಾನೆಟ್ ಮೂವೀಸ್ ವಾಹಿನಿಯಲ್ಲಿ ಕೂಡ ವೀಕ್ಷಿಸಬಹುದು. ಇದು ಕೇರಳದಾದ್ಯಂತದ ಅಭಿಮಾನಿಗಳು ಈ ಕಾರ್ಯಕ್ರಮದ ಕ್ಷಣಗಳನ್ನು ಮತ್ತೆ ವೀಕ್ಷಿಸಲು ಅನುವು ಮಾಡಿಕೊಡುತ್ತಿದೆ.

ಆಯೋಜಕರು ಕಾರ್ಯಕ್ರಮ ಪ್ರಸಾರ ಯಾವಾಗ ಎಂದು ಖಚಿತಪಡಿಸದಿದ್ದರೂ, ಹಿಂದಿನ ಆವೃತ್ತಿಗಳು ಸಾಮಾನ್ಯವಾಗಿ ಕಾರ್ಯಕ್ರಮ ನಡೆದ ಕೆಲವು ವಾರಗಳ ನಂತರ, ವೀಕ್ಷಕರ ಸಂಖ್ಯೆಯನ್ನು ಹೆಚ್ಚಿಸಲು ವಾರಾಂತ್ಯದ ಪ್ರೈಮ್-ಟೈಮ್ ಸ್ಲಾಟ್‌ಗಳಲ್ಲಿ ಪ್ರಸಾರವಾಗಿವೆ. ಮಲಯಾಳಂ ಪ್ರೇಕ್ಷಕರಿಗಾಗಿ ಏಷ್ಯಾನೆಟ್ ಮೂವೀಸ್ ಎಡಿಟ್ ಮಾಡಿದ ಪ್ರಸಾರವನ್ನು ಹೊತ್ತು ತರುವ ನಿರೀಕ್ಷೆಯಿದೆ. ಡಿಜಿಟಲ್ ತುಣುಕುಗಳು ಮತ್ತು ರೆಡ್-ಕಾರ್ಪೆಟ್ ಝಲಕ್ ಫಿಲ್ಮ್‌ಫೇರ್‌ನ ಸೋಶಿಯಲ್ ಮೀಡಿಯಾ ಹ್ಯಾಂಡಲ್‌ಗಳು ಮತ್ತು ಹಲವು ವೇದಿಕೆಗಳಲ್ಲಿ ಮೊದಲೇ ಕಾಣಿಸಿಕೊಳ್ಳಲಿವೆ.

ಮಲಯಾಳಂ ಫಿಲ್ಮ್‌ಫೇರ್ ನಾಮಿನೇಟ್ ಲಿಸ್ಟ್

ಮಲಯಾಳಂ ಚಿತ್ರರಂಗದಲ್ಲಿ ಅದ್ಭುತ ಸಿನಿಮಾಗಳು ನಿರ್ಮಾಣವಾಗುತ್ತಿದೆ. ಅದು ಫಿಲ್ಮ್‌ಫೇರ್ ನಾಮನಿರ್ದೇಶನಗಳಲ್ಲಿ ಪ್ರತಿಫಲಿಸುತ್ತದೆ. ಸರ್ವೈವಲ್ ಡ್ರಾಮಾ 'ಆಡುಜೀವಿತಂ' ಅತ್ಯುತ್ತಮ ಚಿತ್ರ ಮತ್ತು ಅತ್ಯುತ್ತಮ ನಿರ್ದೇಶಕ ಸೇರಿದಂತೆ ಎಂಟು ನಾಮನಿರ್ದೇಶನಗಳೊಂದಿಗೆ ಮಲಯಾಳಂ ವಿಭಾಗದಲ್ಲಿ ಮುಂಚೂಣಿಯಲ್ಲಿದೆ. 'ಮಂಜುಮ್ಮೆಲ್ ಬಾಯ್ಸ್', 'ಆವೇಶಂ', 'ಭ್ರಮಯುಗಂ', 'ಪ್ರೇಮಲು', 'ಉಳ್ಳೊಳುಕ್ಕು', 'ಆಟ್ಟಂ', 'ಕಿಷ್ಕಿಂಧಾ ಕಾಂಡಂ' ಮತ್ತು 'ಆಲ್ ವಿ ಇಮ್ಯಾಜಿನ್ ಆಸ್ ಲೈಟ್' ಕೂಡ ಉನ್ನತ ಗೌರವಗಳಿಗಾಗಿ ಸ್ಪರ್ಧಿಸುತ್ತಿವೆ. ಅತ್ಯುತ್ತಮ ನಟ ವಿಭಾಗದಲ್ಲಿ ಪ್ರಶಸ್ತಿಗಾಗಿ ಮಮ್ಮುಟ್ಟಿ, ಫಹಾದ್ ಫಾಸಿಲ್, ಪೃಥ್ವಿರಾಜ್ ಸುಕುಮಾರನ್, ಟೊವಿನೋ ಥಾಮಸ್, ಆಸಿಫ್ ಅಲಿ ಮತ್ತು ಬಾಸಿಲ್ ಜೋಸೆಫ್ ಹೆಸರುಗಳು ನಾಮಿನೇಟ್ ಆಗಿದೆ.

ಕೊಚ್ಚಿಯಲ್ಲಿ ಫಿಲ್ಮ್‌ಫೇರ್ ಸೌತ್ ಆಯೋಜನೆ

ಕೊಚ್ಚಿಯಲ್ಲಿ ಫಿಲ್ಮ್‌ಫೇರ್ ಅವಾರ್ಡ್ಸ್ ಸೌತ್ ಅನ್ನು ಆಯೋಜಿಸುವುದು ರಾಷ್ಟ್ರೀಯ ಮಟ್ಟದ ಚಿತ್ರರಂಗದ ಚರ್ಚೆಯಲ್ಲಿ ಕೇರಳದ ಬೆಳೆಯುತ್ತಿರುವ ಪ್ರಭಾವದ ಗುರುತಾಗಿ ನೋಡಲಾಗುತ್ತಿದೆ. ದಕ್ಷಿಣ ಭಾರತದ ಅತಿದೊಡ್ಡ ಕನ್ವೆನ್ಷನ್ ಸೆಂಟರ್‌ಗಳಲ್ಲಿ ಒಂದೆಂದು ಕರೆಯಲ್ಪಡುವ ಅಡ್ಲಕ್ಸ್ ವೇದಿಕೆಯು, ಕೇರಳದ ಸ್ಥಳಗಳು, ಪ್ರವಾಸೋದ್ಯಮದ ಉತ್ತೇಜನ ಮೂಲಸೌಕರ್ಯಗಳನ್ನು ಮುನ್ನೆಲೆಗೆ ತರುವ ಜೊತೆಗೆ ಇತರ ಮೆಟ್ರೋ ನಗರಗಳಿಗೆ ಸಮಾನವಾದ ಪ್ರಮಾಣದಲ್ಲಿ ಕಾರ್ಯಕ್ರಮವನ್ನು ನಡೆಸಲು ಅನುವು ಮಾಡಿಕೊಡುತ್ತದೆ.

ಇತ್ತೀಚಿನ ಕೇರಳ ರಾಜ್ಯ ಚಲನಚಿತ್ರ ಪ್ರಶಸ್ತಿಗಳಲ್ಲಿ 'ಮಂಜುಮ್ಮೆಲ್ ಬಾಯ್ಸ್' ಪ್ರಾಬಲ್ಯ ಸಾಧಿಸಿತ್ತು. ಮಮ್ಮುಟ್ಟಿ ತಮ್ಮ ಸುದೀರ್ಘ ಪ್ರಶಸ್ತಿಗಳ ಪಟ್ಟಿಗೆ ಮತ್ತೊಂದು ಅತ್ಯುತ್ತಮ ನಟ ಗೌರವವನ್ನು ಸೇರಿಸಿಕೊಂಡಿದ್ದರು. ಒಟ್ಟಾರೆಯಾಗಿ, ಈ ಮೈಲಿಗಲ್ಲುಗಳು ಮಲಯಾಳಂ ಕಥೆ ಹೇಳುವ ರೀತಿ ಮತ್ತು ಕಲೆ ಭಾಷೆಯ ಗಡಿಗಳನ್ನು ಮೀರಿ ಸಾಗುತ್ತಿದ್ದರೂ, ಸ್ಥಳೀಯ ಪ್ರೇಕ್ಷಕರೊಂದಿಗೆ ಸಂಭ್ರಮಿಸಲು ಮರಳಿ ಮನೆಗೆ ಬರುತ್ತಿರುವ ಹಂತವನ್ನು ಸೂಚಿಸುತ್ತವೆ.

ಕಾರ್ಯಕ್ರಮದ ಹೈಲೆಟ್ಸ್

ಇಂದಿನ ರಾತ್ರಿಯ ಸಮಾರಂಭವನ್ನು ವಿಷ್ಣು ವಾರಿಯರ್, ರಂಜಿನಿ ಹರಿದಾಸ್ ಮತ್ತು ಆರ್‌ಜೆ ಮಿಥುನ್ ನಿರೂಪಣೆ ಮಾಡಲಿದ್ದಾರೆ. ಎಲ್ಲಾ ಭಾಷೆಯ ಪ್ರೇಕ್ಷಕರನ್ನು ಗಮನದಲ್ಲಿಟ್ಟುಕೊಂಡು ಇಂಗ್ಲಿಷ್ ಮತ್ತು ಪ್ರಾದೇಶಿಕ ಭಾಷೆಯಲ್ಲಿ ಮಾತು ಹರಟೆ ನಡೆಸುವ ನಿರೀಕ್ಷೆಯಿದೆ. ವೇದಿಕೆಯ ಮೇಲೆ ಸಾನ್ಯಾ ಮಲ್ಹೋತ್ರಾ, ನಿಧಿ ಅಗರ್ವಾಲ್, ಅಪರ್ಣಾ ಬಾಲಮುರಳಿ ಮತ್ತು ಪ್ರಣಿತಾ ಸುಭಾಷ್ ನೃತ್ಯ ಪ್ರದರ್ಶನಗಳನ್ನು ನೀಡಲಿದ್ದಾರೆ.

ಪ್ರಮುಖ ಮಲಯಾಳಂ ಚಿತ್ರಗಳು ಪರಸ್ಪರ ಪೈಪೋಟಿ ನಡೆಸುತ್ತಿರುವುದರಿಂದ, ಕೆಲವು ವಿಭಾಗಗಳಲ್ಲಿ, ವಿಶೇಷವಾಗಿ ಅತ್ಯುತ್ತಮ ಚಿತ್ರ ಮತ್ತು ನಟನಾ ಗೌರವಗಳಿಗಾಗಿ ತೀವ್ರ ಪೈಪೋಟಿ ಇರಲಿದೆ ಎಂದು ಚಿತ್ರರಂಗದ ವಿಶ್ಲೇಷಕರು ನಿರೀಕ್ಷಿಸಿದ್ದಾರೆ. ಕೇರಳದ ವೀಕ್ಷಕರಿಗೆ, ಸ್ವಂತ ರಾಜ್ಯದ ವೇದಿಕೆ, ಪರಿಚಿತ ನಿರೂಪಕರು ಮತ್ತು ಬಲಿಷ್ಠ ಮಲಯಾಳಂ ನಾಮನಿರ್ದೇಶನಗಳ ಪಟ್ಟಿಯು ಇಂದಿನ ರಾತ್ರಿಯ ಕವರೇಜ್, ಲೈವ್ ಅಪ್‌ಡೇಟ್‌ಗಳು ಮತ್ತು ನಂತರದ ಪ್ರಸಾರವನ್ನು ವಿಶೇಷವಾಗಿ ಆಕರ್ಷಕವಾಗಿಸಲಿದೆ. ಏಕೆಂದರೆ ಕೊಚ್ಚಿ ಸ್ವಲ್ಪ ಸಮಯದವರೆಗೆ ದಕ್ಷಿಣ ಭಾರತದ ಚಿತ್ರರಂಗದ ರಾಜಧಾನಿಯಾಗಲಿದೆ.