ಮತ್ತೊಂದು ಥ್ರಿಲ್ಲರ್ ಯಾನಕ್ಕೆ ತಯಾರಾಗಿ: ಬರಲಿದೆ ದೃಶ್ಯಂ 2

ಬರಲಿದೆ ದೃಶ್ಯಂ 2, ಮೋಹನ್‌ಲಾಲ್ ನಾಯಕ

ಹೌದು, ದೃಶ್ಯಂ 2 ಸಿನಿಮಾ ತಯಾರಾಗುತ್ತಿದ್ದು, ಈ ಬಗ್ಗೆ ನಟ ಮೋಹನ್‌ಲಾಲ್ ಅವರೇ ಅಧಿಕೃತವಾಗಿ ಮಾಹಿತಿ ನೀಡಿದ್ದಾರೆ. ಅಷ್ಟೆ ಅಲ್ಲದೆ ಸಿನಿಮಾದ ಟ್ರೇಲರ್ ಅನ್ನು ಸಹ ಬಿಡುಗಡೆ ಮಾಡಿದ್ದಾರೆ.

ಟ್ರೇಲರ್ ಬಿಡುಗಡೆ ಮಾಡಿದ ಮೋಹನ್‌ ಲಾಲ್

ಇಂದು ಮೋಹನ್ ಲಾಲ್ ಅವರ ಹುಟ್ಟುಹಬ್ಬ. ಇಂದೇ ಮೋಹನ್ ಲಾಲ್ ಅವರು ದೃಶ್ಯಂ 2 ಚಿತ್ರದ ಟ್ರೇಲರ್ ಬಿಡುಗಡೆ ಮಾಡಿದ್ದಾರೆ. ಆದರೆ ಈ ಟ್ರೇಲರ್‌ನಲ್ಲಿ ಹೆಚ್ಚಿನ ಮಾಹಿತಿ ಏನೂ ಇಲ್ಲ ಬದಲಿಗೆ ದೃಶ್ಯಂ 2 ಹೆಸರು ಮತ್ತು ತಂತ್ರಜ್ಞರ ಹೆಸರಿದೆ.

ಜೀತು ಜೋಸೆಫ್ ಅವರದ್ದೇ ನಿರ್ದೇಶನ

ದೃಶ್ಯಂ ಸಿನಿಮಾವನ್ನು ನಿರ್ದೇಶಿಸಿದ್ದ ಜೀತು ಜೋಸೆಫ್ ಅವರೇ ದೃಶ್ಯಂ 2 ಸಿನಿಮಾವನ್ನೂ ನಿರ್ದೇಶಿಸುತ್ತಿದ್ದಾರೆ. ಈಗಾಗಲೇ ಕತೆ ಸಿದ್ಧಗೊಂಡಿದ್ದು, ಲಾಕ್‌ಡೌನ್ ಅಂತ್ಯವಾದ ಬಳಿಕ ಸಿನಿಮಾದ ಚಿತ್ರೀಕರಣ ಪ್ರಾರಂಭವಾಗಲಿದೆ.

ಬಹುತೇಕ ದೃಶ್ಯಂ ತಂಡವನ್ನೇ ಉಳಿಸಿಕೊಳ್ಳಲಾಗಿದೆ

ದೃಶ್ಯಂ ಸಿನಿಮಾ ನಿರ್ಮಿಸಿದ್ದ ಆಂಥೊಣಿ ಪೆರಂಬವೂರ್ ಅವರೇ ದೃಶ್ಯಂ 2 ಸಿನಿಮಾವನ್ನು ನಿರ್ಮಿಸುತ್ತಿದ್ದಾರೆ. ಆಶೀರ್ವಾದ್ ಸಿನಿಮಾಸ್ ಮೂಲಕವೇ ಈ ಸಿನಿಮಾ ಬಿಡುಗಡೆ ಆಗಲಿದೆ. ದೃಶ್ಯಂ 2 ಸಿನಿಮಾ ಬರಲಿದೆ ಎಂಬ ಸುದ್ದಿ ದೃಶ್ಯಂ ಅಭಿಮಾನಿಗಳಿಗೆ ಭಾರಿ ಸಂತಸ ತಂದಿದೆ.