ಸಿನಿಮಾ ನೋಡಿ ಪ್ರಭಾವಿತಗೊಂಡು ಗಂಡನ ಹಿಗ್ಗಾ-ಮುಗ್ಗಾ ಥಳಿಸಿದ ಪತ್ನಿ: ದೂರು ದಾಖಲು

ಸಿನಿಮಾ ನೋಡಿ ಪತಿಯನ್ನು ಹೊಡೆದ ಪತ್ನಿ!

ಈ ಸಿನಿಮಾದ ನಾಯಕ ನಟ, ಬಾಸಿಲ್ ಜೋಸೆಫ್ ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಮಾತನಾಡುತ್ತಾ, ತಮ್ಮ ಸಿನಿಮಾ ನೋಡಿ, ಮಹಿಳೆಯೊಬ್ಬಾಕೆ ತನ್ನ ಪತಿಯ ಮೇಲೆ ಹಲ್ಲೆ ಮಾಡಿದ ಘಟನೆಯ ಬಗ್ಗೆ ಹೇಳಿದ್ದಾರೆ. ''ನಾನು ವ್ಯಕ್ತಿಯ ಹೆಸರು ಹೇಳಲಾರೆ, ಆದರೆ 'ಜಯ ಜಯ ಜಯ ಹೇ' ಸಿನಿಮಾ ನೋಡಿದ ಮಹಿಳೆಯೊಬ್ಬಾಕೆ ತನ್ನ ಪತಿಯನ್ನು ಹಿಗ್ಗಾ ಮುಗ್ಗ ಥಳಿಸಿರುವ ಘಟನೆ ನಡೆದಿದೆ. ಆ ಬಗ್ಗೆ ಪೊಲೀಸ್ ಠಾಣೆಯಲ್ಲಿ ದೂರು ಸಹ ದಾಖಲಾಗಿದೆ'' ಎಂದಿದ್ದಾರೆ.

'ಕರಾಟೆ ಕ್ಲಾಸ್‌ಗೆ ಸೇರಿಸಿದ್ದೇವೆಂದು ಹೇಳುತ್ತಿದ್ದಾರೆ'

ಅದೇ ಸಂದರ್ಶನದಲ್ಲಿ ಮುಂದುವರೆದು ಮಾತನಾಡಿರುವ ಬಾಸಿಲ್, ''ಜಯ ಜಯ ಜಯ ಹೇ, ಹಿಂದಿಯ 'ಡಾರ್ಲಿಂಗ್ಸ್' ರೀತಿಯ ಕಮರ್ಷಿಯಲ್ ಸಿನಿಮಾಗಳ ಶಕ್ತಿಯೆಂದರೆ ಅವು ವ್ಯಂಗ್ಯವಾಗಿ ನಿಜವನ್ನು ಪ್ರಸ್ತುತಿ ಪಡಿಸುತ್ತವೆ. ಇವು ಪ್ರೇಕ್ಷಕರ ಮೇಲೆ ಹೆಚ್ಚು ಪ್ರಭಾವ ಬೀರುತ್ತವೆ. ನನಗೆ ಹಲವು ಕರೆಗಳು ಬರುತ್ತವೆ, ಎಷ್ಟೋ ಮಂದಿ ಪೋಷಕರು ಕರೆ ಮಾಡಿ, ಮಗಳನ್ನು ಈಗಾಗಲೇ ಕರಾಟೆ ಕ್ಲಾಸ್‌ಗೆ ಸೇರಿಸಿದ್ದೇವೆ ಎಂದು ಹೇಳುತ್ತಾರೆ. ಈಗಿನ ಪೀಳಿಗೆಯ ಹೆಣ್ಣು ಮಕ್ಕಳಿಗೆ ಇದು ಅವಶ್ಯಕ ಸಹ'' ಎಂದಿದ್ದಾರೆ.

'ಡ್ಯಾನ್ಸ್ ಮಾಡುತ್ತಾ ಸಿನಿಮಾ ನೋಡುತ್ತಿದ್ದಾರೆ ಮಹಿಳೆಯರು'

''ನನಗೆ ಸಾಕಷ್ಟು ಮಹಿಳೆಯರ ಕರೆಗಳು ಬರುತ್ತವೆ. ಸಿನಿಮಾ ನೋಡುತ್ತಿದ್ದರೆ ನನ್ನದೇ ಕತೆ ಎನಿಸುತ್ತದೆ ಎಂದು ಹೇಳುತ್ತಾರೆ. ಸಿನಿಮಾ ಪ್ರದರ್ಶನವಾಗುತ್ತಿರುವ ಚಿತ್ರಮಂದಿರಗಳಿಗೆ ನಾನು ಭೇಟಿ ನೀಡಿದಾಗ ನನಗೇ ಆಶ್ಚರ್ಯವಾಗುತ್ತದೆ. ಮಹಿಳೆಯರು ಹೆಚ್ಚಿನ ಸಂಖ್ಯೆಯಲ್ಲಿ ನಮ್ಮ ಸಿನಿಮಾಕ್ಕೆ ಬರುತ್ತಿದ್ದಾರೆ. ಸಿನಿಮಾ ನೋಡುವಾಗ ಹಾಡು-ಡ್ಯಾನ್ಸ್ ಮಾಡುತ್ತಾ ಸಿನಿಮಾವನ್ನು ಎಂಜಾಯ್ ಮಾಡುತ್ತಿದ್ದಾರೆ'' ಎಂದಿದ್ದಾರೆ ಬಾಸಿಲ್.

ವಿಪಿನ್ ದಾಸ್ ನಿರ್ದೇಶನ ಮಾಡಿರುವ ಸಿನಿಮಾ

'ಜಯ ಜಯ ಜಯ ಹೇ' ಸಿನಿಮಾವನ್ನು ವಿಪಿನ್ ದಾಸ್ ನಿರ್ದೇಶನ ಮಾಡಿದ್ದಾರೆ. ದರ್ಶನಾ ರಾಜೇಂದ್ರ ನಾಯಕಿಯ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಸಿನಿಮಾದ ನಾಯಕ ನಟ ಬಾಸಿಲ್ ಜನಪ್ರಿಯ ನಿರ್ದೇಶಕರೂ ಆಗಿದ್ದು, 'ಮಿನಲ್ ಮುರಲಿ', 'ಗೋಧಾ', 'ಕುಂಜಿರಮಯನಂ' ಸಿನಿಮಾಗಳನ್ನು ನಿರ್ದೇಶನ ಮಾಡಿದ್ದಾರೆ. 'ಜಯ ಜಯ ಜಯ ಹೇ' ಸಿನಿಮಾವು ಮಹಿಳೆಯ ಮೇಲಿನ ಗೃಹಹಿಂಸೆಯ ವಿರುದ್ಧವಾದ ಕತೆಯನ್ನು ಹೊಂದಿದ್ದು, ಹಾಸ್ಯದ ಧಾಟಿಯಲ್ಲಿ ಕತೆಯನ್ನು ಪ್ರಸ್ತುತಪಡಿಸುತ್ತಿದೆ. ಕೇವಲ 5 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣ ಮಾಡಲಾಗಿರುವ ಈ ಸಿನಿಮಾ ಈಗಾಗಲೇ 50 ಕೋಟಿ ಹಣ ಗಳಿಸಿದೆ. ಇನ್ನೂ ಚಿತ್ರಮಂದಿರಗಳಲ್ಲಿ ಒಳ್ಳೆಯ ಪ್ರದರ್ಶನ ಕಾಣುತ್ತಿದೆ.