ಕನ್ನಡಕ್ಕೆ ಹೊಸ ಹಾರ್ಸ್ ಪವರ್ ತುಂಬಿದ ಸುಬ್ಬಣ್ಣನ ಗೀತೆ!

ಶಿವಮೊಗ್ಗ ಸುಬ್ಬಣ್ಣ (73) ತಮ್ಮ ಕಂಚಿನ ಕಂಠದಿಂದ ಹಾಡಿರುವ ಈ ಹಾಡಿಗೆ ರಾಷ್ಟ್ರಪತಿಗಳ ಫಲಕ ಕೂಡ ಸಿಕ್ಕಿತು. ಈ ಹಾಡಿನ ಬಳಿಕ ಅವರು ಕಾಡು ಕುದುರೆ ಸುಬ್ಬಣ್ಣ ಎಂದೇ ಜನಜನಿತರಾದರು.

ಇಲ್ಲಿ ಕಾಡು ಕುದುರೆ ಎಂಬುದನ್ನು ಒಂದು ಸಂಕೇತ ರೂಪಕವಾಗಿ ಕಂಬಾರರು ಚಿತ್ರಿಸಿದ್ದಾರೆ. ಈ ಹಾಡಿನ ಎರಡು ಚರಣಗಳನ್ನು ಸುಬ್ಬಣ್ಣ ಹಾಡಿದ್ದರೆ ಇನ್ನೊಂದನ್ನು ಕಲ್ಪನಾ ಶಿರೂರು ಹಾಡಿದ್ದಾರೆ. ವಿಶೇಷ ಎಂದರೆ ಈ ಹಾಡಿನ ಚಿತ್ರೀಕರಣ ನಡೆದದ್ದು ಬೆಂಗಳೂರಿನಲ್ಲಿ. 1978ರಲ್ಲಿ ಕಾಡು ಕುದುರೆ ಚಿತ್ರ ಬಿಡುಗಡೆಯಾಗಿತ್ತು.

ಕಂಬಾರರಿಗೆ ಜ್ಞಾನಪೀಠ ಬಂದಾಗ ಸುಬ್ಬಣ್ಣ ಸುವರ್ಣ ವಾಹಿನಿಯ ಸ್ಟುಡಿಯೋದಿಂದ ಮಾತನಾಡುತ್ತಿದ್ದರು. ಗೌರೀಶ್ ಅಕ್ಕಿಯೊಂದಿಗೆ ಮಾತನಾಡುತ್ತಿದ್ದ ಸುಬ್ಬಣ್ಣ ಅಂದು 1978ರಲ್ಲಿ ಹಾಡಿದ ಹುರುಪಿನಲ್ಲೇ 'ಕಾಡು ಕುದುರೆ' ಹಾಡನ್ನು ಹಾಡಿದರು. ಸುಬ್ಬಣ್ಣನ ಹಾರ್ಸ್ ಪವರ್ ಕೇಳುಗರನ್ನು ಮಂತ್ರಮುಗ್ಧಗೊಳಿಸಿತ್ತು. ಎಷ್ಟೇ ಆಗಲಿ ಕನ್ನಡ ಚಿತ್ರಗೀತೆಗಳಿಗೆ ಹೊಸ ಹಾರ್ಸ್ ಪವರ್ ತಂದ ಗೀತೆ ಇದಲ್ಲವೆ?