'ಅಮರ್' ಚಿತ್ರದ ಪ್ರಮುಖ ವಿಡಿಯೋ ಸಾಂಗ್ ರಿಲೀಸ್ : ನಾಗಶೇಖರ್ ಹೊಸ ಪ್ಲಾನ್

ನಟ ಅಭಿಷೇಕ್ ಅಂಬರೀಶ್ ಅಭಿನಯದ 'ಅಮರ್' ಸಿನಿಮಾ ಕಳೆದ ಶುಕ್ರವಾರ ಬಿಡುಗಡೆಯಾಗಿತ್ತು. ಆದರೆ, ಸಿನಿಮಾ ಒಂದು ವಾರ ಪೂರ್ಣ ಮಾಡುವುದರ ಒಳಗೆ ಚಿತ್ರದ ಪ್ರಮುಖ ವಿಡಿಯೋ ಹಾಡು ಬಿಡುಗಡೆ ಮಾಡಲಾಗಿದೆ.

ಚಿತ್ರದ ಬಿಡುಗಡೆಗೆ ಮೊದಲು, ಬಿಡುಗಡೆ ಬಳಿಕ ವಿಡಿಯೋ ಹಾಡನ್ನು ರಿಲೀಸ್ ಮಾಡುವುದು ಸಾಮಾನ್ಯದ ವಿಷಯವೇ. ಆದರೆ, ಯಾವ ನಿರ್ದೇಶಕನೂ ಸಿನಿಮಾದ ಪ್ರಮುಖ ಘಟ್ಟದ ವಿಡಿಯೋವನ್ನು ಇಷ್ಟು ಬೇಗ ಪ್ರೇಕ್ಷಕರ ಮುಂದೆ ಇಡಲು ಬಯಸುವುದು ತೀರಾ ಕಡಿಮೆ.

ಸಿನಿಮಾಗೆ ಕೆಲವು ನೆಗೆಟಿವ್ ರಿವ್ಯೂ ಬಂದಿದ್ದು, ಚಿತ್ರದ ಮೇಲೆ ಪರಿಣಾಮ ಬೀರುತ್ತಿರಬಹುದು. ಇದರಿಂದ ಚಿತ್ರದ ವಿಡಿಯೋ ಹಾಡಿನ ಮೂಲಕ ಪ್ರೇಕ್ಷಕರನ್ನು ಚಿತ್ರಮಂದಿರಕ್ಕೆ ಸೆಳೆಯುವ ಪ್ರಯತ್ನ ನಡೆಯುತ್ತಿರಬಹುದು.

'ಮರೆತು ಹೋಯಿತೆ ನನ್ನೆಯ ಹಾಜರಿ..' ಹಾಡನ್ನು ಸಂಚಿತ್ ಹೆಗ್ಡೆ ಹಾಡಿದ್ದು, ಸೂಪರ್ ಹಿಟ್ ಆಗಿತ್ತು. ಈ ಹಾಡು ಚಿತ್ರದ ಸೆಕೆಂಡ್ ಹಾಫ್ ನಲ್ಲಿ ಬರುತ್ತಿದೆ. ಈ ಹಾಡಿನ ಜನಪ್ರಿಯತೆ ಮೂಲಕ ಪ್ರೇಕ್ಷಕರ ವರ್ಗವನ್ನು ಹೆಚ್ಚು ಮಾಡುವ ಪ್ಲಾನ್ ಅನ್ನು ನಾಗಶೇಖರ್ ಮಾಡಿರಬಹುದು.

ಅಂದಹಾಗೆ, ಅರ್ಜುನ್ ಜನ್ಯ ಸಂಗೀತದ ಹಾಡುಗಳು ಹಿಟ್ ಆಗಿದೆ. ಸಿನಿಮಾದ ಕಥೆ, ನಿರೂಪಣೆ, ನಟನೆ ಬಗ್ಗೆ ಕೆಲವರು ಬೇಸರ ವ್ಯಕ್ತಪಡಿಸಿದ್ದರು, ಹಾಡುಗಳ ಬಗ್ಗೆ ಯಾರು ಕೆಟ್ಟ ಮಾತನ್ನು ಆಡಿಲ್ಲ.