ಕೊಡವರಿಗೆ ದರ್ಶನ್-ಅಭಿಷೇಕ್ ಕೊಟ್ಟ ಗಿಫ್ಟ್ ಇದು

ಯಂಗ್ ರೆಬೆಲ್ ಸ್ಟಾರ್ ಅಭಿಷೇಕ್ ಅಂಬರೀಶ್ ಅಭಿನಯದ ಅಮರ್ ಸಿನಿಮಾ ಹಾಡುಗಳಿಂದ ಸದ್ದು ಮಾಡ್ತಿದೆ. ಈಗಾಗಲೇ ಮೂರು ರೋಮ್ಯಾಂಟಿಕ್ ಹಾಡು ಬಿಡುಗಡೆ ಮಾಡಿ ಎಲ್ಲರ ಗಮನ ಸೆಳೆದಿದ್ದ ಅಮರ್, ಈಗ ನಾಲ್ಕನೇ ಹಾಡು ರಿಲೀಸ್ ಮಾಡಿದೆ.

ಈ ಹಾಡು ರೆಗ್ಯುಲರ್ ಶೈಲಿ ಬಿಟ್ಟು ಕೊಡವರ ಶೈಲಿಯಲ್ಲಿರುವುದು ವಿಶೇಷ. ಒಂದು ರೀತಿ ಈ ಹಾಡು ಕೊಡವರಿಗೆ ಗಿಫ್ಟ್ ಅಂತಾನೇ ಹೇಳಬಹುದು. ಸಾಮಾನ್ಯವಾಗಿ ಸ್ಯಾಂಡಲ್ ವುಡ್ ಸಿನಿಮಾಗಳಲ್ಲಿ ಕೊಡವ ಭಾಷೆ, ಸಂಸ್ಕೃತಿ, ವೇಷ-ಭೂಷಣವನ್ನ ತೋರಿಸಲಾಗುತ್ತೆ. ಆದ್ರೆ, ಪೂರ್ತಿ ಹಾಡನ್ನ ಕೊಡವ ಭಾಷೆಯಲ್ಲಿ ಪ್ರಸ್ತುತ ಪಡಿಸಿರೋದು ಅಪರೂಪ.

'ಜೋರು ಪಾಟ್ಟು....' ಪಾರ್ಟಿ ಹಾಡಾಗಿದ್ದು, ಕೊಡವ ಭಾಷೆ ಅರ್ಥವಾಗದೇ ಇರೋರಿಗೆ ಕೂಡ ಈ ಸಾಂಗ್ ಇಷ್ಟವಾಗುವಂತಿದೆ. ಅದಕ್ಕೆ ಕಾರಣ ಅರ್ಜುನ್ ಜನ್ಯ ಅವರ ಸಂಗೀತ ಮತ್ತು ಜೆಸ್ಸಿ ಗಿಫ್ಟ್ ಅವರು ಗಾಯನ ಹಾಗೂ ಕಿರಣ್ ಕಾವೇರಪ್ಪ ಬರೆದಿರುವ ಸಾಹಿತ್ಯ. ಹಾಗ್ನೋಡಿದ್ರೆ, ವಿಷ್ಣುವರ್ಧನ್ ಮತ್ತು ಸುಹಾಸಿನ ಅಭಿನಯಿಸಿದ್ದ 'ಮುತ್ತಿನಹಾರ' ಸಿನಿಮಾದ ಹಾಡಿನಲ್ಲೂ ಕೊಡವ ಸಾಹಿತ್ಯ ಬಳಸಲಾಗಿತ್ತು.

ಈ ಹಾಡಿನ ಮತ್ತೊಂದು ಸರ್ಪ್ರೈಸ್ ಅಂದ್ರೆ ಅಭಿಷೇಕ್ ಹಾಗೂ ತಾನ್ಯ ಹೋಪ್ ಜೊತೆಯಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್, ಡಿಂಪಲ್ ಕ್ವೀನ್ ರಚಿತಾ ರಾಮ್, ಹಿರಿಯ ನಟ ದೇವರಾಜ್, ರಂಗಿತರಂಗ ಖ್ಯಾತಿಯ ನಿರೂಪ್ ಭಂಡಾರಿ, ಅರ್ಜುನ್ ಜನ್ಯ ಕೂಡ ಈ ಹಾಡಿನಲ್ಲಿ ಹೆಜ್ಜೆ ಹಾಕಿದ್ದಾರೆ.

ಇನ್ನುಳಿದಂತೆ ಸಂದೇಶ್ ಕಂಬೈನ್ಸ್ ನಲ್ಲಿ ಈ ಚಿತ್ರ ನಿರ್ಮಾಣವಾಗುತ್ತಿದ್ದು, ಮೈನಾ ಖ್ಯಾತಿಯ ನಾಗಶೇಖರ್ ನಿರ್ದೇಶನ ಮಾಡುತ್ತಿದ್ದಾರೆ. ಅಭಿಷೇಕ್ ಗೆ ಜೋಡಿಯಾಗಿ ತಾನ್ಯ ಹೋಪ್ ನಟಿಸಿದ್ದಾರೆ. ಎಲ್ಲ ಅಂದುಕೊಂಡಂತೆ ಆದ್ರೆ ಈ ತಿಂಗಳ ಅಂತ್ಯಕ್ಕೆ ಅಮರ್ ಸಿನಿಮಾ ತೆರೆಗೆ ಬರಲಿದೆ.