'ಕೆಜಿಎಫ್ 2' ಹಾಡಿನಲ್ಲಿ ರಾಹುಲ್ ಗಾಂಧಿ! ಬೆಂಗಳೂರು ಪೊಲೀಸರಿಂದ ಪ್ರಕರಣ ದಾಖಲು

ಯಶವಂತಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲು

ವಿಡಿಯೋ ಮಾಡಿರುವ ಕಾಂಗ್ರೆಸ್ ಪಕ್ಷದ ಸಾಮಾಜಿಕ ಜಾಲತಾಣ ವಿಭಾಗವು ಹಾಡಿನ ಹಕ್ಕು ಹೊಂದಿರುವ ಎಂಆರ್‌ಟಿ ಅವರ ಬಳಿ ಅನುಮತಿ ಪಡೆಯದೇ ಹಾಡನ್ನು ತಮ್ಮ ವಿಡಿಯೋದಲ್ಲಿ ಬಳಸಿದ್ದಾರೆ. ಘಟನೆಗೆ ಸಂಬಂಧಿಸಿದಂತೆ ಬೆಂಗಳೂರಿನ ಯಶವಂತಪುರ ಪೊಲೀಸರು ಕಾಂಗ್ರೆಸ್ ಪಕ್ಷ ಸೇರಿದಂತೆ ಪಕ್ಷದ ಪ್ರಮುಖರಾದ ಜೈ ರಾಮ್‌ರಮೇಶ್, ಸುಪ್ರಿಯಾ ಶ್ರೀನಾಥ್ ಹಾಗೂ ರಾಹುಲ್ ಗಾಂಧಿ ಅವರುಗಳ ವಿರುದ್ಧ ದೂರು ದಾಖಲಿಸಿಕೊಂಡಿದ್ದಾರೆ.

ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾಗಿದೆ

ರಾಹುಲ್ ಗಾಂಧಿ ಸ್ಲೋ ಮೋಷನ್‌ನಲ್ಲಿ ನಡೆದುಕೊಂಡು ಹೋಗುತ್ತಿರುವ ವಿಡಿಯೋಗೆ ಹಿನ್ನೆಲೆಯಾಗಿ 'ಕೆಜಿಎಫ್ 2' ಸಿನಿಮಾದ ಹಿಂದಿ ಹಾಡನ್ನು ಬಳಸಿಕೊಳ್ಳಲಾಗಿದೆ. ವಿಡಿಯೋದಲ್ಲಿ 'ಭಾರತ್ ಜೋಡೋ ಯಾತ್ರ' ಎಂದು ಬರೆಯಲಾಗಿದೆ. ಇದೇ ವಿಡಿಯೋವನ್ನು ಕಾಂಗ್ರೆಸ್‌ನ ಸಾಮಾಜಿಕ ಜಾಲತಾಣ ಖಾತೆಗಳಲ್ಲಿ ಹಂಚಿಕೊಳ್ಳಲಾಗಿದೆ. ವಿಡಿಯೋವನ್ನು ಈಗಾಗಲೇ ಹಲವಾರು ಮಂದಿ ನೋಡಿದ್ದಾರೆ. ವಿಡಿಯೋವನ್ನು ಡೌನ್‌ಲೋಡ್ ಮಾಡಿಕೊಂಡು ವಾಟ್ಸ್‌ಆಪ್‌ಗಳಲ್ಲಿ ಹಂಚಿಕೊಳ್ಳಲಾಗುತ್ತಿದೆ.

ಮಾದರಿಯಾಗಬೇಕಿತ್ತು ಕಾಂಗ್ರೆಸ್: ಎಂಆರ್‌ಟಿ

ಈ ಬಗ್ಗೆ ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿರುವ ಎಂಆರ್‌ಟಿ ಸಂಸ್ಥೆಯ ನವೀನ್‌ ಕುಮಾರ್, ''ಕಾಂಗ್ರೆಸ್‌ನಂಥಹ ಪಕ್ಷವು ಭಾರತೀಯ ನಾಗರಿಕರಿಗೆ ಮಾದರಿಯಾಗಿ ಇರಬೇಕಿತ್ತು, ಆದರೆ ಈ ಸನ್ನಿವೇಶದಲ್ಲಿ, ಅದು ಸ್ವತಃ ಈ ನೆಲದ ಕಾನೂನುಗಳನ್ನು ಉಲ್ಲಂಘಿಸಿದೆ. ನಮ್ಮ ಹಕ್ಕುಸ್ವಾಮ್ಯ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳನ್ನು ಉಲ್ಲಂಘಿಸಿದೆ. ನಾವು ಆ ಹಾಡಿನ ಹಕ್ಕನ್ನು ದೊಡ್ಡ ಹೂಡಿಕೆ ಮಾಡಿ ಪಡೆದುಕೊಂಡಿದ್ದೇವೆ. ಕಾಂಗ್ರೆಸ್ ಪಕ್ಷ ಈಗ ಮಾಡಿರುವ ಕಾನೂನು ಉಲ್ಲಂಘನೆಯು ಸಾರ್ವಜನಿಕರಿಗೆ ತಪ್ಪು ಸಂದೇಶವನ್ನು ರವಾನಿಸುತ್ತಿದೆ. ಮತ್ತು ಹಕ್ಕುಸ್ವಾಮ್ಯ ರಕ್ಷಣೆ ಕಾನೂನಿಗೆ ವಿರುದ್ಧವಾಗಿದೆ ಎಂದಿದ್ದಾರೆ.

ಹಲವು ಹಾಡುಗಳ ಹಕ್ಕು ಹೊಂದಿರುವ ಎಂಆರ್‌ಟಿ

ಎಂಆರ್‌ಟಿ ಸಂಸ್ಥೆಯು ಬೆಂಗಳೂರು ಮೂಲದ ಸಂಸ್ಥೆಯಾಗಿದ್ದು, ಕನ್ನಡ, ತೆಲುಗು, ತಮಿಳು ಹಾಗೂ ಹಿಂದಿ ಭಾಷೆಗಳ ಹಲವು ಆಡಿಯೋಗಳ ಹಕ್ಕುಗಳನ್ನು ಹೊಂದಿದೆ. 'ಕೆಜಿಎಫ್' ಸಿನಿಮಾದ ಕನ್ನಡ ಹಾಡುಗಳು ಹಾಗೂ ಸಂಗೀತದ ಹಕ್ಕು ಲಹರಿ ಖರೀದಿಸಿದ್ದರೆ ಹಿಂದಿಯ ಹಕ್ಕುಗಳನ್ನು ಎಂಆರ್‌ಟಿ ಖರೀದಿಸಿದೆ.