'ಜೈ ಶ್ರೀರಾಮ್' ಎಂದು ಹೋಳಿಯಾಡಲಿದ್ದಾರೆ ದರ್ಶನ್ ಅಭಿಮಾನಿಗಳು!

ಹೋಳಿಯಂದು 'ರಾಬರ್ಟ್' ಓಕುಳಿಯಾಟ

'ರಾಬರ್ಟ್' ಚಿತ್ರದ ಮತ್ತೊಂದು ಹಾಡು 'ಜೈ ಶ್ರೀರಾಮ್'ನ ಲಿರಿಕಲ್ ವಿಡಿಯೋ ಮಾರ್ಚ್ 9ರಂದು ಅಭಿಮಾನಿಗಳ ಮುಂದೆ ಬರುತ್ತಿದೆ. ಅಂದು ಮಧ್ಯಾಹ್ನ 12.03ಕ್ಕೆ ಹಾಡನ್ನು ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ತಿಳಿಸಿದೆ. ಸೋಮವಾರ ಹೋಳಿ ಹಬ್ಬ ಇರುವುದರಿಂದ ಅಂದು 'ರಾಬರ್ಟ್'ನ ಹಾಡಿನ ರಂಗಿನಾಟ ನಡೆಯಲಿದೆ.

ರಾಮ-ಆಂಜನೇಯನ ಅವತಾರ

'ರಾಬರ್ಟ್' ಚಿತ್ರದ ಪೋಸ್ಟರ್‌ಗಳು ಸಾಕಷ್ಟು ಕುತೂಹಲ ಕೆರಳಿಸಿದ್ದವು. ಅದರಲ್ಲಿಯೂ ಶ್ರೀರಾಮನನ್ನು ಹೊತ್ತುಕೊಂಡು ಆಂಜನೇಯನ ಅವತಾರದಲ್ಲಿ ದರ್ಶನ್, ಬಾಲಕನೊಬ್ಬನನ್ನು ಹೆಗಲ ಮೇಲೆ ಕೂರಿಸಿಕೊಂಡಿರುವ ಪೋಸ್ಟರ್ ಬಗ್ಗೆ ತುಂಬಾ ಚರ್ಚೆ ನಡೆದಿತ್ತು. ಈ ಪೋಸ್ಟರ್ ಅವತಾರಕ್ಕೆ ಸಂಬಂಧಿಸಿದ ಹಾಡು ಬಿಡುಗಡೆಯಾಗುತ್ತಿದೆ.

ಏಪ್ರಿಲ್ 9 ರ ಆಟ: ದರ್ಶನ್ ಗೆ ಎದುರು ಗೆಲ್ಲುತ್ತಾರಾ ವಿಜಯ್?

ನಿರ್ಮಾಪಕರಿಂದಲೇ ವಿತರಣೆ

ರಾಬರ್ಟ್ ಚಿತ್ರವನ್ನು ನಿರ್ಮಾಪಕ ಉಮಾಪತಿ ಶ್ರೀನಿವಾಸ್ ಗೌಡ ಅವರೇ ವಿತರಣೆ ಮಾಡಲಿದ್ದಾರೆ ಎಂಬ ಮಾಹಿತಿ ಹೊರಬಂದಿದೆ. ಈ ಹಿಂದೆ ಕೂಡ ಉಮಾಪತಿ ಸಿನಿಮಾ ಹಂಚಿಕೆ ಮಾಡಿದ್ದರು. 'ಹೆಬ್ಬುಲಿ' ಚಿತ್ರವನ್ನು ಸಹಭಾಗಿತ್ವದಲ್ಲಿ ವಿತರಣೆ ಮಾಡಿದ್ದರು. ಆದರೆ ಈ ಬಾರಿ ತಾವೇ ಸಂಪೂರ್ಣವಾಗಿ ವಿತರಣೆಯ ಹೊಣೆಗಾರಿಕೆ ಹೊತ್ತುಕೊಂಡಿದ್ದಾರೆ.

67 ಕೋಟಿ ರೂ. ಗಳಿಕೆ

ಬಿಡುಗಡೆಗೂ ಮುನ್ನವೇ ರಾಬರ್ಟ್ ದಾಖಲೆಯ ಗಳಿಕೆಯತ್ತ ಸಾಗಿದೆ. ಆಡಿಯೋ, ಡಿಜಿಟಲ್ ಮತ್ತು ಉಪಗ್ರಹ ಹಕ್ಕುಗಳ ಮಾರಾಟದಿಂದ ಈಗಾಗಲೇ ರಾಬರ್ಟ್ ಚಿತ್ರ 67 ಕೋಟಿ ರೂ. ಗಳಿಕೆ ಮಾಡಿದೆ. ಇನ್ನು ಡಬ್ಬಿಂಗ್ ಹಾಗೂ ಚಿತ್ರಮಂದಿರ ಬಿಡುಗಡೆಯ ಲಾಭಗಳು ಸೇರಿದರೆ ಚಿತ್ರ ಉತ್ತಮ ಗಳಿಕೆ ಮಾಡಲಿದೆ.