ಅಮ್ಮಂದಿರಿಗಾಗಿ ಅನುರಾಧ ಭಟ್ ಹಾಡಿರುವ ಹೊಸ ಹಾಡು ಕೇಳಿ

ಖ್ಯಾತ ಗಾಯಕಿ ಅನುರಾಧ ಭಟ್ ಹಾಡಿರುವ 'ಅಪ್ಪ ಐ ಲವ್ ಯೂ' ಹಾಡು ಕನ್ನಡ ಚಿತ್ರರಂಗದಲ್ಲಿ ಹೊಸ ಮೈಲಿಗಲ್ಲಾಗಿದೆ. ಅಪ್ಪನ ಕುರಿತು ಮೂಡಿ ಬಂದಿದ್ದ ಈ ಹಾಡು ಎಲ್ಲ ಅಪ್ಪಂದಿರಿಗೂ ಅರ್ಪಣೆ ಮಾಡಲಾಗಿತ್ತು.

ಇದೀಗ 'ಅಸತೋಮ ಸದ್ಗಮಯ' ಚಿತ್ರತಂಡ ಎಲ್ಲ ಅಮ್ಮಂದಿರಿಗಾಗಿ ಒಂದು ವಿಶೇಷವಾದ ಹಾಡನ್ನ ಅರ್ಪಣೆ ಮಾಡಿದೆ. ಈ ಹಾಡನ್ನ ಕೂಡ ಅನುರಾಧ ಭಟ್ ಅವರೇ ಹಾಡಿರುವುದು ವಿಶೇಷ. ಸದ್ಯ, ಈ ಹಾಡಿನ ಲಿರಿಕಲ್ ವಿಡಿಯೋ ಸಾಂಗ್ ಬಿಡುಗಡೆಯಾಗಿದ್ದು, ಕೇಳುಗರ ಮೆಚ್ಚುಗೆಗೆ ಪಾತ್ರವಾಗಿದೆ.

ವಹಾಬ್ ಸಲೀಂ ಅವರು ಬರೆದಿರುವ ''ನಾ ತೆರೆದೆ....ತುಂಬಾ ಹಳೆಯ ಪುಟವಾ....''ಎಂಬ ಸಾಲುಗಳು ಈಗ ಸಂಗೀತ ಪ್ರಿಯರ ಕಿವಿಯಲ್ಲಿ ಗುನುಗುತ್ತಿದೆ. ಈ ಅರ್ಥಪೂರ್ಣ ಸಾಲುಗಳಿಗೆ ಗಾಯಕಿ ಅನುರಾಧ ಭಟ್ ಅವರು ಅಷ್ಟೇ ಮುದ್ದಾಗಿ ಜೀವ ತುಂಬಿದ್ದಾರೆ.

ಅಂದ್ಹಾಗೆ, ಇದು ತಾಯಿ ಮಮತೆ, ಪ್ರೀತಿ, ಆರೈಕೆಯ ಬಗ್ಗೆ ಮೂಡಿಬಂದಿರುವ ಹಾಡು. ಈ ಹಾಡಿಗೆ ಸಾಹಿತ್ಯ ಬರೆದಿರುವ ವಹಾಬ್ ಸಲೀಂ ಅವರೇ ಸಂಗೀತ ಒದಗಿಸಿದ್ದಾರೆ.

ಇನ್ನುಳಿದಂತೆ ರಾಧಿಕಾ ಚೇತನ್, ಕಿರಣ್ ರಾಜ್, 'ಬಿಗ್ ಬಾಸ್' ಖ್ಯಾತಿಯ ಲಾಸ್ಯ, 'ಡ್ರಾಮಾ ಜೂನಿಯರ್ಸ್' ಖ್ಯಾತಿ ಚಿತ್ರಾಲಿ ಸೇರಿದಂತೆ ಹಲವರು ಮುಖ್ಯ ಭೂಮಿಕೆಯಲ್ಲಿ ಅಭಿನಯಿಸಿದ್ದಾರೆ.

ರಾಜೇಶ್ ವೇಣೂರು ಈ ಚಿತ್ರವನ್ನ ನಿರ್ದೇಶನ ಮಾಡಿದ್ದು, ಅಶ್ವಿನ್ ಜೆ ಪಿರೇರಾ ಬಂಡವಾಳ ಹೂಡಿದ್ದಾರೆ. ಕಿಶೋರ್ ಕುಮಾರ್ ಅವರ ಛಾಯಾಗ್ರಾಹಣ ಹಾಗೂ ರವಿಚಂದ್ರನ್ ಅವರ ಸಂಕಲನ ಚಿತ್ರಕ್ಕಿದೆ. ಜೂನ್ 6 ರಂದು 'ಅಸತೋಮ ಸದ್ಗಮಯ' ಸಿನಿಮಾ ರಾಜ್ಯಾದ್ಯಂತ ತೆರೆಕಾಣುತ್ತಿದೆ.