ಈ 'RRR' ಹೀರೋಗೆ 'ಕೆಜಿಎಫ್' ಸಂಗೀತ ಜೀವನ ಪೂರ್ತಿ ಜೊತೆಯಾಗಿರಬೇಕಂತೆ!

ನಿಜ ಜೀವನದ ಹಿನ್ನೆಲೆ ಸಂಗೀತ ಯಾವುದಾಗಿರಬೇಕು?

'RRR' ಸಿನಿಮಾ ಕಳೆದ ಶುಕ್ರವಾರ ಬಿಡುಗಡೆ ಆಯ್ತು. ಸಿನಿಮಾ ಬಿಡುಗಡೆಗೆ ಮುನ್ನ ರಾಜಮೌಳಿ, ಜೂ ಎನ್‌ಟಿಆರ್ ಹಾಗೂ ರಾಮ್ ಚರಣ್ ಅವರುಗಳು ಹಲವೆಡೆ ಸಂದರ್ಶನಗಳಲ್ಲಿ ಪಾಲ್ಗೊಂಡರು. ಇಂಥಹಾ ಸಂದರ್ಶನಗಳಲ್ಲೊಂದರಲ್ಲಿ ಸಂದರ್ಶಕಿ, ರಾಮ್ ಚರಣ್ ತೇಜ ಅವರನ್ನುದ್ದೇಶಿಸಿ, 'ನಿಮ್ಮ ನಿಜ ಜೀವನದಲ್ಲಿ ನಿಮಗೆ ಒಂದು ಹಿನ್ನೆಲೆ ಸಂಗೀತ ಇರಬೇಕಾದರೆ ಅದು ಯಾವ ಸಂಗೀತ ಅಥವಾ ಹಾಡು ಆಗಿರುತ್ತದೆ. ಆ ಹಾಡು ನೀವು ಹೋದಲ್ಲೆಲ್ಲ ನಿಮ್ಮ ಹಿನ್ನೆಲೆ ಸಂಗೀತ ಆಗಿರುತ್ತದೆ. ಅದನ್ನು ಬದಲಾಯಿಸಲಾರಿರಿ ಎನ್ನುವುದಾದರೆ ಯಾವ ಹಾಡನ್ನು ನೀವು ಆರಿಸಿಕೊಳ್ಳುತ್ತೀರಿ'' ಎಂದು ಪ್ರಶ್ನೆ ಮಾಡುತ್ತಾರೆ.

'ಮಗಧೀರ' ಹಾಡು ಸ್ಲೋ ಎಂದ ರಾಮ್ ಚರಣ್

ರಾಮ್ ಚರಣ್ ಪ್ರಶ್ನೆಗೆ ಉತ್ತರ ಯೋಚಿಸುತ್ತಿರಬೇಕಾದರೆ, ಪಕ್ಕದಲ್ಲೇ ಇದ್ದ ಜೂ ಎನ್‌ಟಿಆರ್, ರಾಮ್ ಚರಣ್ ನಟಿಸಿರುವ ಸೂಪರ್ ಹಿಟ್ ಸಿನಿಮಾ 'ಮಗಧೀರ'ದ 'ಧೀರ ಧೀರ ಧೀರ' ಹಾಡು ನೆನಪಿಸುತ್ತಾರೆ. ಆಗ ರಾಮ್ ಚರಣ್ 'ಹೇ ಅದು ಬೇಡ ನಾನು ನಿಜ ಜೀವನದಲ್ಲಿ ಅಷ್ಟು ಸ್ಲೋ ಅಲ್ಲ' ಎನ್ನುತ್ತಾರೆ. ಬಳಿಕ ಇನ್ನು ಸ್ವಲ್ಪ ಯೋಚಿಸಿ, 'ಕೆಜಿಎಫ್' ಸಿನಿಮಾದ ಹಿನ್ನೆಲೆ ಸಂಗೀತ ಇದೆಯಲ್ಲ ಅದು ನನ್ನ ಜೀವನದ ಹಿನ್ನೆಲೆ ಸಂಗೀತ ಆಗಿರಬೇಕು ಎಂದುಕೊಳ್ಳುತ್ತೇನೆ. ಆ ಹಿನ್ನೆಲೆ ಸಂಗೀತ ಅದ್ಭುತವಾಗಿದೆ. ನಾನು ಹೋದಲ್ಲೆಲ್ಲ ನನ್ನ ಹಿನ್ನೆಲೆ ಸಂಗೀತವಾಗಿ ಅದು ಗುನುಗುತ್ತಿರಬೇಕು'' ಎಂದಿದ್ದಾರೆ.

ಒಟ್ಟಾರೆ ಇವನಿಗೆ 'ಧೀರ' ಎಂದಿರಬೇಕು: ಜೂ ಎನ್‌ಟಿಆರ್

ಆಗ ಪಕ್ಕದಲ್ಲೇ ಇದ್ದ ಜೂ ಎನ್‌ಟಿಆರ್, 'ಧೀರ ಧೀರ ಧೀರ ಈ ಸುಲ್ತಾನ' ಎಂದು ಹಾಡುತ್ತಾರೆ. ನಂತರ ನೋಡಿ, ಇವನಿಗೆ ಒಟ್ಟಿನಲ್ಲಿ ಹಾಡಿನಲ್ಲಿ ಧೀರ ಎಂಬುದಿರಬೇಕು. 'ಮಗಧೀರ' ನಲ್ಲೂ 'ಕೆಜಿಎಫ್'ನಲ್ಲೂ ಧೀರ ಇದೆ'' ಎಂದು ಕಾಲೆಳೆಯುತ್ತಾರೆ. ರಾಮ್ ಹಾಗೂ ಜೂ ಎನ್‌ಟಿಆರ್ ಇಬ್ಬರೂ ಜೋರಾಗಿ ನಗುತ್ತಾರೆ. ಆಗ ಮತ್ತೊಮ್ಮೆ ರಾಮ್ ಚರಣ್, 'ಕೆಜಿಎಫ್' ಸಿನಿಮಾದ ಹಿನ್ನೆಲೆ ಸಂಗೀತ ಅದರಲ್ಲಿಯೂ ಆ 'ಧೀರ ಧೀರ ಧೀರ ಈ ಸುಲ್ತಾನ' ಹಾಡು ನನಗೆ ಬಹಳ ಇಷ್ಟ ಎನ್ನುತ್ತಾರೆ.

'ಕೆಜಿಎಫ್' ಸಿನಿಮಾಕ್ಕೆ ರವಿ ಬಸ್ರೂರು ಸಂಗೀತ

'ಕೆಜಿಎಫ್' ಸಿನಿಮಾಕ್ಕೆ ರವಿ ಬಸ್ರೂರು ಸಂಗೀತ ನೀಡಿದ್ದಾರೆ. ಸಿನಿಮಾದ ಹಾಡುಗಳು ಅದರಲ್ಲಿಯೂ ವಿಶೇಷವಾಗಿ ಸಿನಿಮಾದ ಹಿನ್ನೆಲೆ ಸಂಗೀತ ದೊಡ್ಡ ಹಿಟ್ ಆಗಿದೆ. ಇದೀಗ 'ಕೆಜಿಎಫ್ 2' ಸಿನಿಮಾಕ್ಕೂ ರವಿ ಬಸ್ರೂರು ಸಂಗೀತ ನೀಡಿದ್ದು, ಈಗಾಗಲೇ ಬಿಡುಗಡೆ ಆಗಿರುವ 'ತೂಫಾನ್' ಹಾಡು ದೊಡ್ಡ ಹಿಟ್ ಆಗಿದೆ. ಸಿನಿಮಾದ ಟ್ರೇಲರ್‌ನಲ್ಲಿ, ಟೀಸರ್‌ನಲ್ಲಿ ಈಗಾಗಲೇ ಹಿನ್ನೆಲೆ ಸಂಗೀತ ಗಮನ ಸೆಳೆಯುತ್ತಿದೆ. ಸಿನಿಮಾವು ಏಪ್ರಿಲ್ 14 ರಂದು ತೆರೆಗೆ ಬರಲಿದೆ.