ಅಪಘಾತದಲ್ಲಿ ಸುದೀಪ್‌ಗೆ ಗಾಯ

ಸುದೀಪ್‌ ಅಪಾಯದಿಂದ ಪಾರಾಗಿದ್ದಾರೆ !'ರಂಗ ಎಸ್‌ಎಸ್‌ಎಲ್‌ಸಿ" ಕನಸು ಕಾಣುತ್ತಿರುವ ನಟ ಸುದೀಪ್‌ಗೆ ಬೆಂಗಳೂರಿನ ಮಹಾತ್ಮಗಾಂಧಿ ರಸ್ತೆಯಲ್ಲಿ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ಸಣ್ಣಪುಟ್ಟ ಗಾಯಗಳಾಗಿವೆ. ಫೆ.1 ಭಾನುವಾರ ರಾತ್ರಿ 12ರ ಸುಮಾರಿಗೆ ಈ ಅವಘಡ ಸಂಭವಿಸಿದೆ.

ರೆಸ್ಟೋರೆಂಟ್‌ ಮುಂಭಾಗದಲ್ಲಿ ಗೆಳೆಯರೊಂದಿಗೆ ಸುದೀಪ್‌ ಉಪಾಹಾರ ಸೇವಿಸುತ್ತಿದ್ದಾಗ ಅಪಘಾತ ಸಂಭವಿಸಿದೆ. ಕಾವೇರಿ ಹ್ಯಾಂಡಿಕ್ರಾಫ್ಟ್ಸ್‌ ಕಡೆಯಿಂದ ವೇಗವಾಗಿ ಬಂದ ಕಾರೊಂದು ರೆಸ್ಟೋರೆಂಟ್‌ ಮುಂಭಾಗದಲ್ಲಿ ನಿಲ್ಲಿಸಿದ್ದ ವಾಹನಗಳಿಗೆ ಡಿಕ್ಕಿ ಹೊಡೆದಿದ್ದು , ಈ ವಾಹನಗಳು ಬಲವಾಗಿ ತಗುಲಿ ಸುದೀಪ್‌ ಹಾಗೂ ಗೆಳೆಯರು ಗಾಯಗೊಂಡಿದ್ದಾರೆ. ಸುದೀಪ್‌ಗೆ ಸಣ್ಣಪುಟ್ಟ ಗಾಯಗಳಾಗಿವೆ. 'ಸಣ್ಣಪುಟ್ಟ ಗಾಯಗಳಾಗಿವೆ ಅಷ್ಟೆ . ದೇವರ ದಯದಿಂದ ಹೆಚ್ಚು ಅಪಾಯವಾಗಲಿಲ್ಲ " ಎಂದು ಅಪಘಾತದ ಕುರಿತು ಸುದೀಪ್‌ ಪ್ರತಿಕ್ರಿಯಿಸಿದ್ದಾರೆ.

ಅಪಘಾತಕ್ಕೆ ಕಾರಣವಾದ ಸ್ಯಾಂಟ್ರೋ ಕಾರನ್ನು ಕೆಲವರು ಬೆಂಬತ್ತಿದರೂ, ಅತಿವೇಗದಲ್ಲಿ ಪಯಣಿಸಿರುವ ಸ್ಯಾಂಟ್ರೋಕಾರು ಚಾಲಕ ಪರಾರಿಯಾಗಿದ್ದಾನೆ. ಪೊಲೀಸರು ಅಪಘಾತದ ಕುರಿತು ತನಿಖೆ ನಡೆಸುತ್ತಿದ್ದು , ಕಾರನ್ನು ಪತ್ತೆ ಹಚ್ಚುವ ಪ್ರಯತ್ನದಲ್ಲಿದ್ದಾರೆ.

ಸುದೀಪ್‌ ಗಾಯಗೊಂಡಿರುವ ಸುದ್ದಿ ತಿಳಿದ ಅಭಿಮಾನಿಗಳು ಜಮಾಯಿಸಿದ್ದರಿಂದಾಗಿ, ಎಂಜಿ ರಸ್ತೆಯಲ್ಲಿ ಕೆಲಕಾಲ ಸಂಚಾರ ಅಸ್ತವ್ಯಸ್ತಗೊಂಡಿತ್ತು .(ಇನ್ಫೋ ವಾರ್ತೆ)