ಸಿನಿಮಾ ನನ್ನ ಧರ್ಮ,ಕಮಲಹಾಸನ್

*ಜೇಕಬ್ ವರ್ಗೀಸ್, ಗೋವಾ

ಗೋವಾದಲ್ಲಿ ನಡೆಯುತ್ತಿದ್ದ 39ನೇ ಅಂತರರಾಷ್ಟ್ರೀಯ ಚಿತ್ರೋತ್ಸವಕ್ಕೆ ತೆರೆಬಿದ್ದಿದೆ. ಉತ್ಸವದ ಆರಂಭದಲ್ಲಿ ಉತ್ಸಾಹ ಎದ್ದುಕಂಡರೆ, ಕೊನೆಯ ದಿನಗಳಲ್ಲಿ ವಿಷಾದದ ಛಾಯೆಯಿತ್ತು. ಅದು ಮುಂಬೈ ಕರಾಳ ನೆನಪಿನ ವಿಷಾದ.

'ಯಾವುದನ್ನಾದರೂ ಸಾಧಿಸಲಿಕ್ಕೆ ನಾವು ಬದುಕಬೇಕು" ಎನ್ನುವ ಕಮಲಹಾಸನ್‌ರ ಮಾತಿಗೆ ಹಲವು ಅರ್ಥ. ಸಮಾರೋಪ ಸಮಾರಂಭದ ಮುಖ್ಯ ಅತಿಥಿಯವರು. ಅವರ ಮಾತುಗಳಲ್ಲಿ ಸಿನಿಮಾ- ಮಾನವೀಯತೆ- ಹಿಂಸೆಯ ಕುರಿತ ಜಿಜ್ಞಾಸೆಯಿತ್ತು. 'ಸಿನಿಮಾ ನನ್ನ ಶಾಲೆ. ಅದೇ ಜಗತ್ತು. ಅದು ನನ್ನ ಧರ್ಮ. ಆ ಕಾರಣಕ್ಕೇ ಇಂಥ ಸಿನಿಮಾ ಹಬ್ಬ ಮುಖ್ಯವೆನ್ನಿಸುತ್ತದೆ. ಸಮಸ್ಯೆ, ಪ್ರಶ್ನೆಗಳು ಎಲ್ಲೆಡೆ ಇರುತ್ತವೆ. ನಾವು ಎಲ್ಲವನ್ನೂ ಬಗೆಹರಿಸಿಕೊಂಡು ನಡೆಯಬೇಕು" ಎಂದರು ಕಮಲ್.

ಗೋವಾ ಮುಖ್ಯಮಂತ್ರಿ ದಿಗಂಬರ ಕಾಮತ್ ಚಿತ್ರೋತ್ಸವಕ್ಕೆ ಗೋವಾ ಶಾಶ್ವತ ಸ್ಥಳವಾಗಬೇಕೆಂಬ ಹಂಬಲ ವ್ಯಕ್ತಪಡಿಸಿದರು. ಈ ನಿಟ್ಟಿನಲ್ಲಿ ಗೋವಾ ಸರ್ಕಾರ ಸಿನಿಮಾ ತರಬೇತಿ ಸಂಸ್ಥೆ, ರವೀಂದ್ರ ಭವನದಲ್ಲಿ ಸುಸಜ್ಜಿತ ಚಿತ್ರಮಂದಿರ ನಿರ್ಮಿಸಲು ಉದ್ದೇಶಿಸಿದೆ.