ನೂರಿಪ್ಪತ್ತು ಥಿಯೇಟರಿನಲ್ಲಿ ಮರ್ಯಾದೆ ರಾಮಣ್ಣ!

ಈ ಚಿತ್ರ ಕರ್ನಾಟಕದಲ್ಲಿ 120 ಥಿಯೇಟರ್ ನಲ್ಲಿ ಬಿಡುಗಡೆಯಾಗಲಿದೆ. ಹಾಸ್ಯನಟನೊಬ್ಬನ ಚಿತ್ರ ಈ ರೀತಿಯ ಭಾಗ್ಯ ಕಂಡಿದ್ದು ಅಚ್ಚರಿಯೇ ಸರಿ. ಮರ್ಯಾದೆ ರಾಮಣ್ಣನಿಗೆ ಸಿಕ್ಕಾಪಟ್ಟೆ ಮರ್ಯಾದೆ ದಕ್ಕಿದೆ. ಹಾಸ್ಯನಟರಾದರೂ ನಾಯಕರನ್ನೇ ಮೀರಿ ಬೆಳೆದು ನಿಂತಿರುವ ಕೋಮಲ್, ಕೋಟಿ ಮೇಲೆ ಟಿವಿ ರೈಟ್ಸ್ ಗಿಟ್ಟಿಸಿಕೊಂಡು ಅಚ್ಚರಿ ಹುಟ್ಟಿಸಿದ್ದರು. ಇದೀಗ ಅಚ್ಚರಿಯ ಡಬಲ್!!

ರಾಜಮೌಳಿ ನಿರ್ದೇಶನ, ಸುನಿಲ್-ಸಲೋನಿ ತಾರಾಜೋಡಿಯ ಮೂಲಚಿತ್ರ ತೆಲಗು ಮರ್ಯಾದ ರಾಮಣ್ಣ, ಈಗಾಗಲೇ ಸೂಪರ್ ಹಿಟ್ ಲೀಸ್ಟ್ ನಲ್ಲಿ ಸೇರಿದ್ದು, 'ಬೆಸ್ಟ್ ಫ್ಯಾಮಿಲಿ ಎಂಟರ್ ಟೈನರ್' ಎಂಬ ಹೊಗಳಿಕೆಗೂ ಪಾತ್ರವಾಗಿದೆ.

ಕನ್ನಡದ ಮರ್ಯಾದೆ ರಾಮಣ್ಣ ಚಿತ್ರದ ಆಡಿಯೋ ರಿಲೀಜ್ ಆಗಿ ಹಾಡುಗಳು ಈಗಾಗಲೇ ಜನರ ಬಾಯಲ್ಲಿವೆ. ಈ ರಿಮೇಕ್ ಚಿತ್ರ ಕನ್ನಡದಲ್ಲಿ ಹೇಗೆ ಓಡೀತು ಎಂಬ ಸಂದೇಹ ಯಾರಿಗೂ ಇಲ್ಲ. ಏಕೆಂದರೆ ಕೋಮಲ್ ಕ್ರೇಜ್ ಕನ್ನಡದಲ್ಲಿ ಸಾಕಷ್ಟಿದೆ.

ಸ್ವತಃ ಕೋಮಲ್ ಕೂಡ ಸಾಕಷ್ಟು ನಿರೀಕ್ಷೆ ಇಟ್ಟಿರುವ ಈ ಚಿತ್ರ ಜನರಲ್ಲಿ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ. 120 ಥಿಯೇಟರಿನಲ್ಲಿ ಬಿಡುಗಡೆ ಮಾಡ ಹೊರಟಿರುವ ನಿರ್ಮಾಪಕರ ಧೈರ್ಯವೇ ಚಿತ್ರ ಚೆನ್ನಾಗಿದೆ ಎನ್ನುವುದಕ್ಕೆ ಸಾಕ್ಷಿ ಎನ್ನಬಹುದಲ್ಲವೇ!