‘ಒಡಹುಟ್ಟಿದವಳು’ ಚಿತ್ರದಲ್ಲಿ ರವಿಚಂದ್ರನ್‌, ರಕ್ಷಿತಾ, ರಾಧಿಕಾ!

ರವಿ ಮಾಮನ ಹೊಸ ಪ್ರಯೋಗ ಆರಂಭಗೊಂಡಿದೆ. ಕನಸುಗಾರ ರವಿಚಂದ್ರನ್‌ ಏನು ಮಾಡಿದರೂ ಸಖತ್ತಾಗಿಯೇ ಸುದ್ದಿಯಾಗುತ್ತದೆ. ರವಿಯ ಹೊಸ ಚಿತ್ರ ‘ಒಡಹುಟ್ಟಿದವಳು’ ಚಿತ್ರದಲ್ಲಿ ಸಾಕಷ್ಟು ಮಿಂಚುಗಳಿವೆ.

ಕರಾವಳಿ ಬೆಡಗಿ ರಾಧಿಕಾ ಮತ್ತು ಸುಂಟರಗಾಳಿ ರಕ್ಷಿತಾ ಈ ಚಿತ್ರದಲ್ಲಿದ್ದು, ಮೂರು ‘ರ’(ರವಿಚಂದ್ರನ್‌, ರಾಧಿಕಾ, ರಕ್ಷಿತಾ)ಗಳ ಮಿಲನ ಎಂತಹ ಫಲಿತಾಂಶ ನೀಡುತ್ತದೆಯೇ ಕಾದು ನೋಡಬೇಕು. ತಮಿಳಿನ ‘ಪೋರ್ಕಾಲಂ’(ಚೆರಣ್‌ರ ಈ ಸೂಪರ್‌ ಹಿಟ್‌ ಸಿನಿಮಾದಲ್ಲಿ ಮುರಳಿ, ಮೀನಾ, ಸಾಂಘವಿ ನಟಿಸಿದ್ದರು)ಕನ್ನಡದಲ್ಲಿ ‘ಒಡಹುಟ್ಟಿದವಳು’ ರೂಪ ತಾಳುತ್ತಿದೆ.

ಕಂಠೀರವ ಸ್ಟುಡಿಯೋದಲ್ಲಿ ಚಿತ್ರದ ಮುಹೂರ್ತ ನೆರವೇರಿತು. ಗ್ಲಾಮರಸ್‌ ಪಾತ್ರಗಳ ಮೂಲಕ ಸ್ಯಾಂಡಲ್‌ವುಡ್‌ನಲ್ಲಿ ಬಳುಕುತ್ತಿದ್ದ ರಕ್ಷಿತಾ ಮತ್ತು ರಾಧಿಕಾ, ಈ ಚಿತ್ರದಲ್ಲಿ ವಿಭಿನ್ನ ಪಾತ್ರದ ಮೂಲಕ ಪ್ರೇಕ್ಷಕರ ಗಮನ ಸೆಳೆಯಲಿದ್ದಾರೆ.

ಕನಸುಗಾರ ರವಿಚಂದ್ರನ್‌ ಈ ಚಿತ್ರದಲ್ಲಿ ಕನಿಷ್ಠ ಐದು ಕಡೆ ಪ್ರೇಕ್ಷಕರು ಕಣ್ಣೀರು ಸುರಿಸುವಂತೆ ಮಾಡಲಿದ್ದಾರಂತೆ! ಸಂಗೀತ ಮತ್ತು ಸಾಹಿತ್ಯ ಸಹಾ ಅವರದೇ. ಚಿತ್ರದ ನಿರ್ಮಾಣದ ಹೊಣೆಯನ್ನು ಮಂಜು ಹೊತ್ತಿದ್ದಾರೆ.

ಮುಖಪುಟ / ಸ್ಯಾಂಡಲ್‌ವುಡ್‌