ಸದ್ಯದಲ್ಲೇ ಡಾ ರಾಜ್ ಕಂಚಿನ ಪ್ರತಿಮೆ ಅನಾವರಣ

ಡಾ ರಾಜ್ ಸಮಾಧಿ ಅಭಿವೃದ್ಧಿಗಾಗಿ ಸರ್ಕಾರ 10 ಕೋಟಿ ರು. ಘೋಷಿಸಿತ್ತು. ಅದರಲ್ಲಿ 7 ಕೋಟಿ ರು. ಬಿಡುಗಡೆಯಾಗಿದೆ. ಈಗಾಗಲೇ 5.5 ಕೋಟಿಯ ಒಂದು ಹಂತದ ಅಭಿವೃದ್ಧಿ ಕಾಮಗಾರಿ ಪೂರ್ಣಗೊಂಡಿದೆ. ಸಮಾಧಿ ಸುತ್ತ ಹೂವಿನ ತೋಟ, ಎದುರಿಗೆ ಕಂಚಿನ ಪ್ರತಿಮೆ, ಪ್ರವೇಶ ದ್ವಾರದಲ್ಲಿ ಸ್ಮರಣ ಫಲಕಗಳನ್ನು ಇರಿಸಲಾಗಿದೆ. ಎರಡೂ ಬದಿಗಳಲ್ಲಿ 6 ಅಡಿ ಉದ್ದ, 3 ಅಡಿ ಅಗಲದ 20 ಕಲ್ಲಿನ ಫಲಕಗಳನ್ನು ಇಡಲಾಗಿದೆ. ಅವು ರಾಜ್ ಅಭಿನಯದ ಚಿತ್ರಗಳನ್ನು ನೆನಪಿಸುವಂತಿವೆ.

ಕೈಕಟ್ಟಿಕೊಂಡು ಮುಗುಳ್ನಗುತ್ತಿರುವ 3 ಅಡಿ ಉದ್ದದ ಕಂಚಿನ ಪ್ರತಿಮೆಯ ಅನಾವರಣಕ್ಕೆ ಸರ್ಕಾರದ ಅನುಮತಿಗಾಗಿ ಕಾಯಲಾಗುತ್ತಿದೆ. ಸದ್ಯದಲ್ಲೇ ಅದು ಲೋಕಾರ್ಪಣೆಯಾಗಲಿದೆ. ಡಾ ರಾಜ್ ಹುಟ್ಟುಹಬ್ಬದ ನಿಮಿತ್ತ ಇದೇ ಏಪ್ರಿಲ್ 24 ರಂದು ಆ ಪ್ರತಿಮೆಯನ್ನು ಲೋಕಾರ್ಪಣೆ ಮಾಡಲು ಚಿಂತನೆ ನಡೆಸಲಾಗುತ್ತಿದೆ. (ಒನ್ ಇಂಡಿಯಾ ಕನ್ನಡ)