ಸ್ಟೈಲ್ ಕಿಂಗ್ ರಜನಿಕಾಂತ್‌ಗೆ ಹುಟ್ಟುಹಬ್ಬದ ಸಂಭ್ರಮ

ರಜನಿಕಾಂತ್

ತನ್ನ ಐದನೇ ವಯಸ್ಸಿನಲ್ಲೇ ತಾಯಿಯನ್ನು ಕಳೆದುಕೊಂಡ ದುರ್ದೈವಿ ರಜನಿ. ಒಪ್ಪತ್ತಿನ ಊಟಕ್ಕೆ ನಾನಾ ಕಷ್ಟಗಳನ್ನು ಪಡುತ್ತಾ ಸರ್ಕಾರಿ ಶಾಲೆಯಲ್ಲಿ ಕನ್ನಡ ಮಾಧ್ಯಮದಲ್ಲಿ ಓದಿದರು. ಬಳಿಕ ಜೀವನ ಸಂಘರ್ಷದಲ್ಲಿ ಅನೇಕ ಕಷ್ಟಗಳನ್ನು ಎದುರಿಸಬೇಕಾಯಿತು. ಮೂಟೆ ಹೊರೆಯುವ ಕೂಲಿಯಾಗಿ, ಆ ಬಳಿಕ ಬಸ್ ಕಂಡಕ್ಟರ್ ಆಗಿ ಕೆಲಸ ಮಾಡಿದರು.

ರಂಗಭೂಮಿ ಮೇಲಿನ ಆಕರ್ಷಣೆಗೆ ಒಳಗಾಗಿ ಅನೇಕ ನಾಟಕಗಳಲ್ಲಿ ಅಭಿನಯಿಸಿದರು. ಗೆಳೆಯರ ಪ್ರೋತ್ಸಾಹದಿಂದ ಮದ್ರಾಸ್ ಫಿಲಂ ಇನ್ಸಿಟಿಟ್ಯೂಟ್‌ನಲ್ಲಿ ಸೇರಿದರು. ಖ್ಯಾತ ನಿರ್ದೇಶಕ ಬಾಲಚಂದರ್ ಕಣ್ಣಿಗೆ ಬೀಳುವ ಮೂಲಕ 'ಅಪೂರ್ವ ರಾಗಂಗಲ್' ಚಿತ್ರದ ಮೂಲಕ 1975ರಲ್ಲಿ ಬೆಳ್ಳಿತೆರೆಗೆ ಅಡಿಯಿಟ್ಟರು. ಅಲ್ಲಿಂದ ಆರಂಭವಾದ ರಜನಿ ಸಿನಿ ಜೀವನದಲ್ಲಿ ಇದುವರೆಗೂ 150 ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.

ರಜನಿ ಅಭಿಮಾನಿಗಳು ಡಿ.12ನ್ನು World Style Day ಎಂದು ಸೆಲಿಬ್ರೇಟ್ ಮಾಡುತ್ತಾರೆ. ಈ ವರ್ಷ ರಜನಿಕಾಂತ್ ಆರೋಗ್ಯ ಕೈಕೊಟ್ಟ ಕಾರಣ ಅವರು ಅಷ್ಟಾಗಿ ಚಿತ್ರಗಳಲ್ಲಿ ತೊಡಗಿಕೊಳ್ಳಲು ಸಾಧ್ಯವಾಗಲಿಲ್ಲ. ಅವರ ಮುಂಬರುವ 'ರಾಣಾ' ಚಿತ್ರಕ್ಕಾಗಿ ಪ್ರೇಕ್ಷಕರು ಜಾತಕಪಕ್ಷಿಯಂತೆ ಕಾಯುತ್ತಿದ್ದಾರೆ. 'ತಲೈವರ್' ರಜನಿಕಾಂತ್‌ಗೆ ಹುಟ್ಟುಹಬ್ಬದ ಶುಭಾಶಯಗಳು. (ಒನ್‌ಇಂಡಿಯಾ ಕನ್ನಡ)