ಪುಟ್ಟಣ್ಣ 'ಶುಭಮಂಗಳ' ರಿಮೇಕ್; ರಮ್ಯಾ-ಕಿಟ್ಟಿ ಜೋಡಿ

By Srinath

| Published: Sunday, June 12, 2011, 11:50 [IST]

ದಶಕಗಳ ಹಿಂದಿನ ಪುಟ್ಟಣ್ಣ ಕಣಗಾಲರ ಸೂಪರ್ ಹಿಟ್ 'ಶುಭಮಂಗಳ' ಚಿತ್ರ ಮತ್ತೆ ಬೆಳ್ಳಿತೆರೆಗೆ ಹೊಸ ಅವತಾರದಲ್ಲಿ ಬರಲಿದೆ. ಪ್ರಣಯರಾಜ ಶ್ರೀನಾಥ್, ರಂಗನಾಯಕಿ ಆರತಿ ಮತ್ತು ಶಿವರಾಂ ಪ್ರಮುಖ ಭೂಮಿಕೆಯಲ್ಲಿದ್ದ ಆ ಚಿತ್ರ ಭರ್ಜರಿ ಪ್ರದರ್ಶನ ನೀಡಿತ್ತು. ನಿರ್ಮಾಪಕ ದಿನೇಶ್ ಗಾಂಧಿ ಮತ್ತು ನಿರ್ದೇಶಕ ಶ್ರೀನಿವಾಸ್ ರಾಜು ಈ ಪ್ರಯತ್ನಕ್ಕೆ ಕೈಹಾಕಲಿದ್ದಾರೆ.

ಇಲ್ಲಿ ಪ್ರಣಯರಾಜನ ಪಾತ್ರವನ್ನು ಶ್ರೀನಗರ ಕಿಟ್ಟಿ ನಿರ್ವಹಿಸುವುದು ಹೆಚ್ಚುಕಮ್ಮಿ ಖಾತ್ರಿ. ಆರತಿ ನಿರ್ವಹಿಸಿದ ಪಾತ್ರಕ್ಕಾಗಿ ರಮ್ಯಾ ಜೊತೆ ಮಾತುಕತೆ ನಡೆಯುತ್ತಿದೆ. ಉತ್ತರಕರ್ನಾಟಕ ಭಾಗದಲ್ಲಿ ಉತ್ತಮ ಯಶಸ್ಸು ಗಳಿಸಿದ ಪ್ರಜ್ವಲ್ ದೇವರಾಜ್ ಅಭಿನಯದ 'ಕೋಟೆ' ಚಿತ್ರ ನಿರ್ದೇಶಿಸಿದ್ದ ಶ್ರೀನಿವಾಸ್ ರಾಜು ಮೂಲ ಚಿತ್ರದ ದೃಶ್ಯ ಸನ್ನಿವೇಶಗಳನ್ನು ಯಥಾವತ್ತಾಗಿ ಚಿತ್ರೀಕರಿಸಲು ನಿರ್ಧರಿಸಿದ್ದಾರೆ.

ಶುಭಮಂಗಳ ಚಿತ್ರಕ್ಕೆ ವಿಜಯಭಾಸ್ಕರ್ ಸಂಗೀತ ನೀಡಿದ್ದರು. ವಿಜಯನಾರಸಿಂಹ, ಉದಯಶಂಕರ್, ಕಣಗಾಲ್ ಪ್ರಭಾಕರ್ ಶಾಸ್ತ್ರಿ ಮತ್ತು ಎಂಎನ್ ವ್ಯಾಸ ರಾವ್ ರ ಸಾಹಿತ್ಯದಲ್ಲಿ ಮೂಡಿದ ಬಂದ 'ಸೂರ್ಯಂಗು ಚಂದ್ರಂಗು ಬಂದಾರೆ ಮುನಿಸು.. ಸ್ನೇಹದ ಕಡಲಲ್ಲಿ ನೆನಪಿನ ದೋಣಿಯಲಿ.. ಹೂವೊಂದು ಬಳಿಬಂದು...' ಮುಂತಾದ ಹಾಡುಗಳು ಇಂದಿಗೂ ಬಹಳ ಜನಪ್ರಿಯ. ಇಲ್ಲೂ ಮೂಲ ಹಾಡುಗಳ ಟ್ಯೂನ್ ಮತ್ತು ಸಾಹಿತ್ಯವನ್ನು ಹಾಗೆ ಬಳಸಿಕೊಳ್ಳುತ್ತಾರೋ ಇಲ್ಲವೋ ಎಂದು ನಿರ್ದೇಶಕರು ಇನ್ನಷ್ಟೇ ಸ್ಪಷ್ಟಪಡಿಸಬೇಕಿದೆ.