ತಮಿಳುನಾಡಿನಲ್ಲಿ ಕನ್ನಡತಿಗೆ ಓಟು ಹಾಕಿದ ರಜನಿಕಾಂತ್!

ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಮತದಾನ ಗುಪ್ತವಾಗಿ ನಡೆಯುತ್ತದೆ ಎಂಬುದು ಹೈಸ್ಕೂಲ್ ವಿದ್ಯಾರ್ಥಿಗಳಿಗೂ ಗೊತ್ತು. ವ್ಯಕ್ತಿಯೊಬ್ಬ ಯಾರಿಗೆ ಮತ ಹಾಕಿದ್ದಾನೆ ಎಂಬ ಅಂಶವನ್ನು ಗೋಪ್ಯವಾಗಿಡಲಾಗುತ್ತದೆ. ಆದರೆ ತಮಿಳು ಸೂಪರ್ ಸ್ಟಾರ್ ರಜನಿಕಾಂತ್ ವಿಚಾರದಲ್ಲಿ ಈ ವಿವರಗಳು ಬಹಿರಂಗವಾಗಿವೆ. ತಮಿಳುನಾಡು ವಿಧಾನಸಭಾ ಚುನಾವಣೆಯಲ್ಲಿ ರಾಜಕೀಯ ರಂಗೇರಿದೆ.

ರಜನಿಕಾಂತ್ ಅವರು ಮತದಾನ ಮಾಡುತ್ತಾರೆ ಎಂದ ಮೇಲೆ ಮಾಧ್ಯಮಗಳು ಕಣ್ಣುಮುಚ್ಚಿ ಕುಳಿತುಕೊಳ್ಳಲು ಸಾಧ್ಯವೆ. ಸೀದಾ ಮತಗಟ್ಟೆಗೆ ದೌಡಾಯಿಸಿದ ಪತ್ರಕರ್ತರು ಅವರು ಓಟು ಹಾಕುವುದನ್ನು ಸೆರೆಹಿಡಿದು ಬಿಟ್ಟಿದ್ದಾರೆ. ರಜನಿ ಮತದಾನ ಮಾಡಿದ ದೃಶ್ಯಗಳು ಟಿವಿಗಳಲ್ಲಿ ಪ್ರಸಾರ ಭಾಗ್ಯವನ್ನು ಕಂಡು ಅವರು ಯಾರಿಗೆ ಓಟು ಹಾಕಿದ್ದಾರೆ ಎಂಬ ಅಂಶಗಳು ಬಟಾ ಬಯಲಾಗಿವೆ.

ಮುಂಬರು ಎರಡು ವರ್ಷಗಳಲ್ಲಿ ರಜನಿ ಬಿಜೆಪಿಗೆ ಸೇರುತ್ತಾರೆ ಎಂಬ ಸುದ್ದಿಯಿದೆ. ಆದರೆ ಅವರು ಬುಧವಾರ ನಡೆದ ಚುನಾವಣೆಯಲ್ಲಿ ತಮ್ಮ ಅಮೂಲ್ಯ ಮತವನ್ನು ತಮಿಳುನಾಡಿಗೆ ವಲಸೆ ಹೋದ ಕನ್ನಡತಿಗೆ ಹಾಕಿದ್ದಾರೆ! ಯಾರು ಎಂದಿರಾ? ಅದೇ ಸ್ವಾಮಿ ಎರಡು ಎಲೆ ಚಿಹ್ನೆಯ ಎಐಎಡಿಎಂಕೆ ಪಕ್ಷದ ಅಭಿನೇತ್ರಿ ಜಯಲಲಿತಾ ಅವರ ಹೆಗ್ಗುರುತಿಗೆ ರಜನಿ ಮತದಾನ ಮಾಡಿದ್ದಾರೆ ಎನ್ನುತ್ತವೆ ಮೂಲಗಳು!