ಅಂಬರೀಶ್ ಗೆ ಆಂಧ್ರ ಸರಕಾರದ ನಂದಿ ಪ್ರಶಸ್ತಿ

ರೆಬೆಲ್ ಸ್ಟಾರ್ ಅಂಬರೀಶ್ ಗೆ 2005ನೇ ಸಾಲಿನ ಆಂಧ್ರ ಸರಕಾರದ ಪ್ರತಿಷ್ಠಿತ "ನಂದಿ" ಪ್ರಶಸ್ತಿ ಲಭಿಸಿದೆ. ಭಾನುವಾರ ಹೈದರಾಬಾದ್ ನ ಲಾಲ್ ಬಹಾದ್ದೂರ್ ಶಾಸ್ತ್ರೀ ಕ್ರೀಡಾಂಗಣ ದಲ್ಲಿ ನಡೆದ ವರ್ಣರಂಜಿತ ಸಮಾರಂಭದಲ್ಲಿ ಅಂಬರೀಶ್ ಗೆ ಈ ಪ್ರಶಸ್ತಿ ಯನ್ನು ಆಂಧ್ರ ಪ್ರದೇಶ ಸರಕಾರದ ಮುಖ್ಯಮಂತ್ರಿ ವೈ. ಎಸ್. ರಾಜಶೇಕರ ರೆಡ್ಡಿ ಪ್ರದಾನ ಮಾಡಿದರು. ಪ್ರಶಸ್ತಿ 5 ಲಕ್ಷ ರುಪಾಯಿ ನಗದು, ನೆನಪಿನ ಕಾಣಿಕೆ ಮತ್ತು ಸನ್ಮಾನ ಪತ್ರಗಳನ್ನು ಒಳಗೊಂಡಿದೆ.

ಪ್ರಶಸ್ತಿ ಸ್ವೀಕರಿಸಿದ ನಂತರ ಅಂಬರೀಶ್ ಮಾತನಾಡುತ್ತಾ, ''ಆಂಧ್ರ ಸರಕಾರ ನೀಡಿದ ಈ ಪ್ರಶಸ್ತಿ ಗೆ ನಾನು ಆಭಾರಿ ಆಗಿದ್ದೇನೆ. ನನ್ನ ಮಡದಿ ಕೂಡ ತೆಲುಗಿನವರಾಗಿದ್ದು ಕನ್ನಡ ಮತ್ತು ತೆಲುಗುಚಿತ್ರರಂಗದ ನಂಟು ಬಹಳ ಹಿಂದಿನದು'' ಎಂದು ಸಂಪೂರ್ಣ ತೆಲುಗಿನಲ್ಲಿ ಮಾತನಾಡಿದರು.

ಜೀವಮಾನ ಶ್ರೇಷ್ಠ ಸಾಧನೆಗಾಗಿ ನೀಡುವ ಈ ಪ್ರಶಸ್ತಿಯನ್ನು 2003,2004,2005 ಮತ್ತು 2006 ರ ಸಾಲಿಗೆ ಕ್ರಮವಾಗಿ ತೆಲುಗು ನಟ ಕೃಷ್ಣ, ಖ್ಯಾತ ಸಂಗೀತ ಸಂಯೋಜಕ ಇಳಯರಾಜ, ಕನ್ನಡ ನಟ ಅಂಬರೀಶ್ ಮತ್ತು ಹಿಂದಿ ನಟಿ ವಹೀದಾ ರೆಹಮಾನ್ ಗೆ ನೀಡಲಾಯಿತು.

ಬಹಳ ಅದ್ದೂರಿಯಾಗಿ ನಡೆದ ಈ ಕಾರ್ಯಕ್ರಮ ಸಂಪೂರ್ಣ ಕಾಂಗ್ರೆಸ್ ಮಯವಾಗಿತ್ತು. ತೆಲುಗು ಚಿತ್ರರಂಗಕ್ಕೆ ನೀಡಿದ ಪ್ರಶಸ್ತಿ ಕೂಡ ಕಾಂಗ್ರೆಸ್ ಬೆಂಬಲಿಸುವ ಕಲಾವಿದರಿಗೆ ನೀಡಲಾಗಿದೆ ಎಂಬ ಅಪಸ್ವರವೂ ಕೇಳಿಬಂದಿದೆ.

(ದಟ್ಸ್ ಕನ್ನಡ ಚಿತ್ರವಾರ್ತೆ)