ಕಿಚ್ಚನ ‘ನಂ. 73 ಶಾಂತಿನಿವಾಸ’ದ ಹಾಡುಗಳು ಹೇಗಿವೆ?

By Super

| Updated: Friday, July 12, 2013, 17:02 [IST]

ಕಿಚ್ಚ ಸುದೀಪ್‌ ಅಭಿನಯ ಹಾಗೂ ನಿರ್ದೇಶನದ ಬಹು ನಿರೀಕ್ಷೆಯ ಚಿತ್ರ 'ನಂ. 73 ಶಾಂತಿ ನಿವಾಸ" ಚಿತ್ರದ ಸುಂದರ ಗೀತೆಗಳನ್ನು ಕೇಳಿದರೆ, ಮತ್ತೆ ಮತ್ತೆ ಕೇಳಬೇಕೆನಿಸುತ್ತದೆ. ಸವಿ ಸವಿ ನೆನಪು ಸಾವಿರ ನೆನಪನ್ನು ಮೂಡಿಸುತ್ತದೆ. 'ನಂ. 73 ಶಾಂತಿ ನಿವಾಸ" ಚಿತ್ರಕ್ಕೆ ಸುಂದರ ಗೀತೆಗಳನ್ನು ಕೆ. ಕಲ್ಯಾಣ್‌ ರಚಿಸಿದ್ದಾರೆ. ಭಾರಧ್ವಾಜ್‌ ಅವರ ಸಂಗೀತ ಕೂಡ ಮೆಚ್ಚುಗೆಯಾಗುತ್ತದೆ. ಈ ಚಿತ್ರದಲ್ಲಿ ಒಟ್ಟು 9 ಹಾಡುಗಳಿವೆ. ಎಸ್‌ಪಿ ಬಾಲಸುಬ್ರಮಣ್ಯ ಹಾಡಿರುವ 'ಗೀಯ ಗೀಯ ತಿರುಗು ಭೂಮಿ . .. " ಎಂಬ ಹಾಡು ತನ್ನ ಸಾಹಿತ್ಯದಿಂದ ಮತ್ತೆ ಮತ್ತೆ ಗುನುಗುವಂತೆ ಮಾಡುತ್ತದೆ.

ಪ್ರೀತಿಯ ಪರಿಣಾಮಗಳನ್ನು ವಿವರಿಸುವ 'ಪ್ರೀತಿಯೆಂದರೆ ಹೀಗೇನೆ. . . " ಹಾಡನ್ನು ರಾಜೇಶ್‌ ಹಾಡಿದ್ದಾರೆ. ಶಾಸ್ತ್ರೀಯ ಸಂಗೀತದ ಧಾಟಿಯಲ್ಲಿ ಸುಮಧುರವಾಗಿದೆ. 'ಥೈಯತ... ಥೈಯತ. . .." ಎಂಬ ಹಾಡನ್ನು ರಾಜೇಶ್‌ ಹಾಗೂ ಕಲ್ಯಾಣಿ ಹಾಡಿದ್ದಾರೆ. ಪ್ರೀತಿಸಿದವರ ಮನದಲ್ಲಿ ಸುಳಿಯುವ ಹಲವು ಭಾವನೆಗಳನ್ನು ವ್ಯಕ್ತಪಡಿಸುತ್ತಾ ಸಾಗುವ ಈ ಹಾಡು ಸುಮಧುರವಾಗಿದೆ.

ಹಿಂದಿ ಹಾಡಿನ ಟ್ಯೂನ್‌ ಹೋಲುವ 'ಆದದ್ದೆಲ್ಲಾ ಒಳ್ಳೆದಾಯ್ತು. . .. " ಹಾಡು ರಾಜೇಶ್‌, ಲ.ನಾ. ಶಾಸ್ತ್ರಿ, ಮಾಸ್ಟರ್‌ ಹಿರಣ್ಣಯ್ಯ, ನಂದಿತಾ, ಅರ್ಚನಾ ಉಡುಪ ಹಾಗೂ ಅರುಣ್‌ ಸಾಗರ್‌ ಅವರ ದನಿಯಲ್ಲಿ ಚೆನ್ನಾಗಿ ಮೂಡಿ ಬಂದಿದ್ದು, ಒಮ್ಮೆ ಕೇಳುವಂತಿದೆ.

'ಹೃದಯ .. ಹೃದಯ. ... "ಎಂಬ ಹಾಡನ್ನು ಶ್ರೀನಿವಾಸ್‌ ಹಾಡಿದ್ದಾರೆ. ಹಾಡಿನ ವೇಗಕ್ಕೊ ಏನೋ.. . ಉಳಿದವುಕ್ಕೆ ಹೋಲಿಸಿದರೆ ಸಾಧಾರಣವಾದ ಹಾಡು ಅನಿಸುತ್ತದೆ. 'ಪ್ರೀತಿಯೆಂದರೆ ಹೀಗೇನೆ . . " ಹಾಡು ಮತ್ತೆ ಸಂಗೀತ ನಿರ್ದೇಶಕ ಭಾರದ್ವಾಜ್‌ ಅವರ ದನಿಯಲ್ಲಿ ವಿಭಿನ್ನವಾಗಿ ಮೂಡಿಬಂದು, ಕೇಳುವಂತಿದೆ.

ಎಲ್ಲಾ ಸುಮಧುರ ಗೀತೆಗಳ ನಡುವೆ 'ತಿರುಗು ಭೂಮಿ . .. " ಹಾಡಿನ ರಿಮಿಕ್ಸ್‌ ಗೀತೆಯನ್ನು ಸೇರಿಸಲಾಗಿದೆ. ಅಬ್ಬರದ ದನಿಯಲ್ಲಿ ಸಂಗೀತ ಕೇಳುವವರಿಗೆ ಖಂಡಿತಾ ಇಷ್ಟ ಆಗುತ್ತದೆ. ಇನ್ನು 'ಬಂದ ನೋಡು ಹಾಡು. ... " ನಾಯಕ ಸುದೀಪ್‌ ಅವರನ್ನು ಪರಿಚಯಿಸುವ ಗೀತೆಯಾಗಿದ್ದು, ಭಾರದ್ವಾಜ್‌ ಹಾಡಿದ್ದಾರೆ.

ಈ ಅಲ್ಬಂನ ವಿಶೇಷ ಗೀತೆ 'ಒಂದು ಒಳ್ಳೆ ಕಥೆಯ ಹೇಳುವೆ . . .. " ಗೀತೆ ಶಿವರಾಜ್‌ಕುಮಾರ್‌ ಹಾಗೂ ಸುದೀಪ್‌ ಕಂಠದಿಂದ ಹೊಮ್ಮಿದೆ. ಮಧ್ಯೆ ಸುದೀಪ್‌ ಹಾಗೂ ಶಿವರಾಜ್‌ ಕುಮಾರ್‌ ಅವರ ಸಂಭಾಷಣೆಯಾಂದಿಗೆ ಬೆರೆತ ಈ ಹಾಡು, ಮುದ ನೀಡುತ್ತದೆ. ಒಟ್ಟಿನಲ್ಲಿ ಕೊಟ್ಟ ಕಾಸಿಗೆ ಮೋಸವಾಗದಂತಿದೆ ಈ ಚಿತ್ರದ ಹಾಡುಗಳು, ಒಮ್ಮೆ ಕೇಳಿ ನೋಡಿ.