»   » ಮಿಲನಹಾಡುಗಳು ಚೆನ್ನಾಗಿವೆ, ನಿಜಕ್ಕೂ ಚೆನ್ನಾಗಿವೆ!

ಮಿಲನಹಾಡುಗಳು ಚೆನ್ನಾಗಿವೆ, ನಿಜಕ್ಕೂ ಚೆನ್ನಾಗಿವೆ!

Posted By: Staff
Subscribe to Filmibeat Kannada

ಮನೋಮೂರ್ತಿ ಸಂಗೀತಧಾರೆ ಮುಂಗಾರು ಮಳೆನಂತರ, ನಿಲ್ಲದೆ ಇನ್ನೂ ಸಾಗುತ್ತಿದೆ. ಪುನೀತ್ ಅಭಿನಯದ ಮಿಲನ ಚಿತ್ರದ ಹಾಡುಗಳು ಇಂಪಾದ ರಸಧಾರೆಯನ್ನು ಹರಿಸಿವೆ. ಆನಂದ್ ಆಡಿಯೋ ಮಿಲನ ಆಡಿಯೋವನ್ನು ಹೊರತಂದಿದ್ದು, ಮಾರಾಟ ಭರದಿಂದ ಸಾಗಿದೆ.

ಈ ಆಲ್ಬಂ ಶುರುವಾಗುವುದು "ನಿನ್ನಿಂದಲೇ ನಿನ್ನಿಂದಲೇ" ಎಂಬ ಸುಮಧುರ ಸಾಹಿತ್ಯವಿರುವ ಹಾಡಿನಿಂದ. ಈ ಹಾಡಿನ ಇಂಪಿಗೆ ತಲೆದೂಗುವಂತೆ ಮಾಡುವಲ್ಲಿ ಸೋನು ನಿಗಮ್ ಯಶಸ್ವಿಯಾಗಿದ್ದಾರೆ. ಮತ್ತೆ ಮತ್ತೆ ಕೇಳಬೇಕೆನಿಸುತ್ತದೆ.

"ಅಂತೂ ಇಂತೂ" ಯುಗಳ ಗೀತೆಗೆ ಉದಿತ್ ನಾರಾಯಣ್ ಹಾಗೂ ಚಿತ್ರಾ ದನಿಯಾಗಿದ್ದಾರೆ. ಕನ್ನಡದಲ್ಲಿ ಈಗಾಗಲೇ ಅನೇಕ ಹಾಡು ಹಾಡಿದ್ದರೂ ಕೂಡ ಉದಿತ್ ನಾರಾಯಣ್ ಉಚ್ಚಾರ ಕೆಲವೆಡೆ ಕೇಳುವಂತಿಲ್ಲ. ಈ ಹಾಡಿನ ಸಾಹಿತ್ಯ ಕೂಡ ಅಷ್ಟಾಗಿ ಮೆಚ್ಚುಗೆ ಪಡೆಯುವುದು ಕಷ್ಟ.

ಇತ್ತೀಚೆಗೆ ಯುಗಳಗೀತೆಗಳ ಹುಚ್ಚು ಹಿಡಿಸುವ ಜೋಡಿಯಾಗಿರುವ ಸೋನು ನಿಗಮ್ ಹಾಗೂ ಶ್ರೇಯಾ ಗೋಸಲ್ ಹಾಡಿರುವ ನಿಧಾನಗತಿಯ " ಮಳೆ ನಿಂತು ಹೋದ ಮೇಲೆ" ಗೀತೆ ಉತ್ತಮ ಸಾಹಿತ್ಯ ಹೊಂದಿದೆ.

ಕುನಾಲ್ ಗಂಜಾವಾಲ ಹಾಡಿರುವ "ಕಿವಿಮಾತು" ಜೀವನದ ಏಳಿಗೆ ಬಗ್ಗೆ ಕಿವಿಮಾತು ನೀಡುವ ಒಳ್ಳೆ ಸಾಹಿತ್ಯದಿಂದ ಕೂಡಿದೆ. ಈ ಹಾಡಿಗೆ ವಾದ್ಯಗಳ ಬಳಕೆ ಚೆನ್ನಾಗಿ ಹೊಂದಿಕೊಂಡಿದೆ.

"ನಿನ್ನಿಂದಲೇ...." ರಿಮಿಕ್ಸ್ ಆವೃತ್ತಿ ಸ್ವಲ್ಪ ಫಾಸ್ಟ್ ಬೀಟ್ಸ್ ಜೊತೆ ಕೇಳಬಹುದು.

"ಮದರಂಗಿಯಲಿ" ಮದುವೆ ದಿಬ್ಬಣದ ಸಂಭ್ರಮವನ್ನು ಸೂಚಿಸುವ ಹಾಡು. ರಾಜೇಶ್ ಕೃಷ್ಣನ್ ಜತೆ ಶ್ರೇಯಾ ಗೋಸಲ್ ಸೊಗಸಾಗಿ ಹಾಡಿದ್ದಾರೆ. ಈ ಹಾಡು ಕೇಳಿದ ಮೇಲೆ ರಾಜೇಶ್ ಇನ್ನೂ ಒಂದೆರೆಡು ಹಾಡು ನೀಡಬಹುದಿತ್ತು ಎನಿಸುತ್ತದೆ.

"ಮಳೆ ನಿಂತು ಹೋದ ಮೇಲೆ" ಹಾಡು ಮತ್ತೆ ಶ್ರೇಯಾ ಗೋಸಲ್ ದನಿಯಲ್ಲಿ ಇಂಪಾಗಿ ಮೂಡಿ ಬಂದಿದೆ.
" ಕದ್ದು ಕದ್ದು.." ವಿ. ನಾಗೇಂದ್ರ ಪ್ರಸಾದ್ ಬರೆದಿರುವ ಹಾಡಾಗಿದ್ದು, ಕುಣಿತಕ್ಕೆ ಹೇಳಿ ಮಾಡಿಸಿದಂತಿದೆ. ಸುರೇಶ್ ಪೀಟರ್, ಚೈತ್ರಾ ಹಾಗೂ ಸ್ಟೀಫನ್ ಹಾಡಿರುವ ಈ ಹಾಡಿಗೆ, ಮನೋ ಮೂರ್ತಿ ವಿಭಿನ್ನ ಬಗೆಯ ಸಂಗೀತ ಒದಗಿಸಿದ್ದಾರೆ. ಇತ್ತೀಚಿನ ಅವರ ಸಂಗೀತ ಸಂಯೋಜನೆಗಿಂತ ಈ ಹಾಡು ಕೊಂಚ ಭಿನ್ನ ಎನಿಸುತ್ತದೆ.

ಒಟ್ಟಿನಲ್ಲಿ ಇಂಪಾದ ಹಾಡುಗಳನ್ನು ಕೇಳಿ ಆನಂದಿಸಲು ಆನಂದ್ ಆಡಿಯೋದ ಮಿಲನ ಖರೀದಿಸಬಹುದು. "ನಿನ್ನಿಂದಲೇ" ಹಾಡು ಗುನುಗುವುದನ್ನು ಶುರು ಮಾಡಬಹುದು!

English summary
Puneeth Rajkumar starred Milana film audio review by Chethan B.S, Bangalore
Please Wait while comments are loading...

ಮನರಂಜನಾ ಜಗತ್ತಿನ ಎಲ್ಲ ತಾಜಾ ರೋಚಕ ಸುದ್ದಿಗಳನ್ನು ಪಡೆಯಿರಿ - Filmibeat Kannada