ಅಮೀರ್‌ ಸಿನಿಮಾಗೆ ಕಥೆ ಬರೆಯುತ್ತಿರುವ ಅಶುತೋಷ್‌

ಲಗಾನ್‌ ನಂತರ ಏನು?ನಾವು ಸುಮ್ಮನೇ ಕುಳಿತಿಲ್ಲ ಎನ್ನುತ್ತಾರೆ ಲಗಾನ್‌ ನಿರ್ದೇಶಕ ಅಶುತೋಷ್‌ ಗೌರೀಕರ್‌. ಮತ್ತೆ ಕಥೆ ಬರೆಯಲು ಗೌರೀಕರ್‌ ಅವುಡುಗಚ್ಚಿ ಕೂತಿದ್ದಾರೆ. ಅಲ್ಲಿಗೆ ಅಶುತೋಷ್‌-ಅಮೀರ್‌ ಜೋಡಿ ಬೆಳ್ಳಿತೆರೆಯಲ್ಲಿ ಮತ್ತೊಂದು ಮೋಡಿಗೆ ಸಿದ್ಧವಾಗುತ್ತಿದೆಯೆಂದಾಯಿತು!

2003 ನೇ ಇಸವಿ ಜನವರಿಯಲ್ಲಿ ಲಗಾನ್‌ ನಂತರದ ಅಮೀರ್‌ ನಿರ್ಮಾಣದ ಹೊಸ ಚಿತ್ರ ಸೆಟ್ಟೇರಲಿದೆ. ಅಮೀರ್‌ ಖಾನ್‌ ಲಾಂಛನದಲ್ಲಿಯೇ ಈ ಭಾರೀ ಬಜೆಟ್ಟಿನ ಚಿತ್ರ ನಿರ್ಮಾಣವಾಗಲಿದೆ ಎಂದು ಅಶುತೋಷ್‌ ಕನಸುಗಳನ್ನು ಎದುರಿಗಿಡುತ್ತಾರೆ. ಅವರು ಕೋಲ್ಕತ್ತಾದಲ್ಲಿ ನಡೆದ ಸಮಾರಂಭದಲ್ಲಿ ಸತ್ಯಜಿತ್‌ ಭಟ್ಕಳ್‌ರ - ದಿ ಸ್ಪಿರಿಟ್‌ ಆಫ್‌ ಲಗಾನ್‌ ಪುಸ್ತಕ ಬಿಡುಗಡೆ ಸಂದರ್ಭದಲ್ಲಿ ಸುದ್ದಿಗಾರರನ್ನುದ್ದೇಶಿಸಿ ಮಾತನಾಡುತ್ತಿದ್ದರು.

ಹೊಸ ಚಿತ್ರದಲ್ಲಿ ಅಮೀರ್‌ ನಟಿಸಲಿದ್ದಾರೆ. ಆದರೆ ಚಿತ್ರದ ಬಜೆಟ್‌ ಇನ್ನೂ ಅಂತಿಮವಾಗಿಲ್ಲ . ಇನ್ನೆರಡು ತಿಂಗಳಲ್ಲಿ ತಾರಾಗಣ ಸೇರಿದಂತೆ ಚಿತ್ರದ ರೂಪುರೇಷೆ ಸ್ಪಷ್ಟವಾಗಬಹುದು ಎಂದು ಗೌರೀಕರ್‌ ಸುದ್ದಿಗಾರರ ಪ್ರಶ್ನೆಗೆ ಉತ್ತರಿಸಿದರು. ಲಗಾನ್‌ ಬಗ್ಗೆ ವಿಮರ್ಶಕರ ಟೀಕೆಗಳಾದ ದೀರ್ಘ ನಿರೂಪಣೆ ಹಾಗೂ ಹಾಡುಗಳ ಕುರಿತು ಪ್ರತಿಕ್ರಿಯಿಸಿದ ಅವರು, ಹೊಸ ಚಿತ್ರದಲ್ಲೂ ಈ ಎರಡೂ ಅಂಶಗಳು ಇರುತ್ತವೆ ಎಂದರು.

ಹಾಡುಗಳು ಭಾರತೀಯ ಸಿನಿಮಾದ ಅವಿಭಾಜ್ಯ ಅಂಗ. ದೀರ್ಘ ನಿರೂಪಣೆ ಕೂಡ ನಮ್ಮ ಅನನ್ಯತೆಯೇ. ನಾವು ಪಶ್ಚಿಮದ ನೀತಿಗಳನ್ನು ಒಪ್ಪಿಕೊಳ್ಳುವುದಾದರೆ, ಅವರು ಹಿಂದಿ ಸಿನಿಮಾವನ್ನು ನೋಡಲು ಏಕೆ ಬರುತ್ತಾರೆ ಎಂದು ಅಶುತೋಷ್‌ ಪ್ರಶ್ನಿಸಿದರು. (ಪಿಟಿಐ)