ಜೈಲಿನಲ್ಲಿ ರಕ್ಷಿತಾಗೆ ಜನಾರ್ದನ ರೆಡ್ಡಿ ಆಶೀರ್ವಾದ

ಶ್ರೀರಾಮುಲು ಅವರ ಬಡವರ ಶ್ರಮಿಕರ ರೈತರ (ಬಿಎಸ್‌ಆರ್) ಪಕ್ಷಕ್ಕೆ ನಟಿ ರಕ್ಷಿತಾ ಸೇರ್ಪಡೆಯಾದ ಮೇಲೆ ಇದೇ ಮೊದಲ ಬಾರಿಗೆ ಸಿಬಿಐ ಬಂಧನದಲ್ಲಿರುವ ಜಿ ಜನಾರ್ದನ ರೆಡ್ಡಿ ಅವರನ್ನು ಪರಪ್ಪನ ಅಗ್ರಹಾರ ಕೇಂದ್ರ ಕಾರಾಗೃಹದಲ್ಲಿ ಭೇಟಿ ಮಾಡಿದ್ದಾರೆ. ಪಕ್ಷದ ಹತ್ತು ಕಾರ್ಯಕರ್ತರೊಂದಿಗೆ ಸೋಮವಾರ (ಮಾ.19) ರೆಡ್ಡಿ ಅವರನ್ನು ಭೇಟಿ ಮಾಡಿದ ರಕ್ಷಿತಾ, ಅವರ ಆಶೀರ್ವಾದ ಪಡೆದಿದ್ದಾಗಿ ತಿಳಿಸಿದ್ದಾರೆ.

ಈ ಬಗ್ಗೆ ಆಂಗ್ಲ ಪತ್ರಿಕೆಯೊಂದಿಗೆ ಮಾತನಾಡುತ್ತಾ, ರೆಡ್ಡಿ ಅವರ ವಿನಯವಂತಿಕೆಗೆ ಮಾರುಹೋಗಿದ್ದಾಗಿ ತಿಳಿಸಿದ್ದಾರೆ. ತಾನು ರಾಜಕೀಯಕ್ಕೆ ಎಂಟ್ರಿ ಕೊಟ್ಟಿರುವ ಬಗ್ಗೆ ಸಂತಸ ವ್ಯಕ್ತಪಡಿಸಿರುವ ರೆಡ್ಡಿ, ರಾಜಕೀಯಕ್ಕೆ ಸಂಬಂಧಿಸಿದ ಪುಸ್ತಕಗಳನ್ನು ಹೆಚ್ಚಾಗಿ ಓದುವಂತೆ ಸಲಹೆ ನೀಡಿದ್ದಾಗಿ ಹೇಳಿದ್ದಾರೆ.

ತಾನು ಇದುವರೆಗೂ ಭೇಟಿಯಾಗಿರುವ ವ್ಯಕ್ತಿಗಳ ಪೈಕಿ ರೆಡ್ಡಿ ಅವರಷ್ಟು ತಾಳ್ಮೆಯಿಂದ ಇರುವವರನ್ನು ನೋಡೇ ಇಲ್ಲ. ಅವರಿಂದ ಕಲಿಯುವುದು ಬಹಳಷ್ಟಿದೆ. ಅವರ ನಡವಳಿಕೆ ನನಗೆ ಹೊಸ ಸ್ಫೂರ್ತಿ ನೀಡಿದೆ. ಅವರ ಸಲಹೆ ಸೂಚನೆಗಳನ್ನು ಪಾಲಿಸುತ್ತೇನೆ ಎಂದಿದ್ದಾರೆ ರಕ್ಷಿತಾ.