ನಟಿ ತಾರಾ ಹೆಸರಿನ ಜೊತೆ ಈಗ ಪತಿಯ ಹೆಸರಿಲ್ಲ

ಕರ್ನಾಟಕ ಚಲನಚಿತ್ರ ಅಕಾಡೆಮಿ ಅಧ್ಯಕ್ಷೆ ತಾರಾ ಅವರು ತಮ್ಮ ಹೆಸರನ್ನು ಬದಲಾಯಿಸಿಕೊಂಡಿದ್ದಾರೆ. ಹೆಸರಿನಲ್ಲಿ ಭಾರಿ ಬದಲಾವಣೆಯೇನೂ ಇಲ್ಲ. ಅವರ ಮೂಲ ಹೆಸರು ತಾರಾ ಅನುರಾಧಾ. ಚಿತ್ರರಂಗಕ್ಕೆ ಬಂದ ಬಳಿಕ ಅವರನ್ನು ಎಲ್ಲರೂ ಶಾರ್ಟ್ ಅಂಡ್ ಸ್ವೀಟ್ ಆಗಿ ತಾರಾ ಎಂದು ಕರೆಯುತ್ತಿದ್ದರು.

ಬಳಿಕ ಛಾಯಾಗ್ರಾಹಕ ವೇಣು ಅವರ ಕೈಹಿಡಿದ ಮೇಲೆ ಅವರ ಹೆಸರು ತಾರಾ ಅನುರಾಧಾ ವೇಣು ಎಂದಾಯಿತು. ಶಾಲಾ ದಾಖಲೆಗಳಲ್ಲಿ ಎಲ್ಲಾ ಕಡೆ ಅವರ ಹೆಸರು ತಾರಾ ಅನುರಾಧಾ ಎಂದೇ ನಮೂದಾಗಿದೆ. ಈಗ ಹೆಸರು ಉದ್ದವಾದ ಕಾರಣ ತಾರಾ ಅನುರಾಧಾ ಎಂದು ಬದಲಾಯಿಸಿಕೊಂಡಿರುವುದಾಗಿ ಅವರು ತಿಳಿಸಿದ್ದಾರೆ.

ಆದರೆ ತಮ್ಮ ಹೆಸರಿನ ಬದಲಾವಣೆಗೆ ಯಾವುದೇ ಜ್ಯೋತಿಷ್ಯ, ಸಂಖ್ಯಾಶಾಸ್ತ್ರ, ಕವಡೆಶಾಸ್ತ್ರದ ಉದ್ದೇಶವಿಲ್ಲ ಎಂದಿದ್ದಾರೆ ತಾರಾ. ಇದೇ ಸಂದರ್ಭದಲ್ಲಿ ಅವರು ಮಾತನಾಡುತ್ತಾ, ಅಕಾಡೆಮಿ ನಡೆಸಿಕೊಂಡು ಬರುತ್ತಿರುವ ಬೆಳ್ಳಿ ಹೆಜ್ಜೆ ಕಾರ್ಯಕ್ರಮವನ್ನು ಈ ಬಾರಿ ಬೆಂಗಳೂರಿಗೆ ಬದಲಾಗಿ ಮೈಸೂರಿನಲ್ಲಿ ನಡೆಸುವುದಾಗಿ ತಿಳಿಸಿದರು. (ಒನ್‌ಇಂಡಿಯಾ ಕನ್ನಡ)