ದ್ವಾರಕೀಶ್‌ ಕನಸುಗಳಲ್ಲಿ ಐಶ್ವರ್ಯಾ ರೈ !

ಕನ್ನಡದ ಕುಳ್ಳ ದ್ವಾರಕೀಶ್‌ ಮತ್ತೆ ಸುದ್ದಿಯಲ್ಲಿದ್ದಾರೆ. ಎಲ್ಲವನ್ನು ಸಿನಿಮಾದಿಂದಲೇ ಸಂಪಾದಿಸಿ, ಅಲ್ಲಿಯೇ ಕಳೆದುಕೊಂಡರು ಉತ್ಸಾಹ ಕಡಿಮೆಯಾಗಿಲ್ಲ. ಫೀನಿಕ್ಸ್‌ನಂತೆ ತಮ್ಮ ಅರವತ್ತೆರಡನೆಯ ವಯಸ್ಸಲ್ಲೂ ಕ್ರಿಯಾಶೀಲತೆಯಿಂದ ಎದ್ದು ನಿಲ್ಲಲು ಪ್ರಯತ್ನಿಸುತ್ತಿದ್ದಾರೆ. ಆಪ್ತಮಿತ್ರ ನೆರವಾಗುವನೇ ?

ಸಿನಿಮಾದಲ್ಲಿ ಅಪ್ರಸ್ತುತರಾಗಿ ಮರೆಗೆ ಸರಿದರು ಎನ್ನುವಾಗಲೇ, ಕನ್ನಡ ನಾಡು ವೇದಿಕೆಯ ಮೂಲಕ ದ್ವಾರಕೀಶ್‌ ರಾಜಕೀಯಕ್ಕೆ ಜಿಗಿದರು. ಹುಣಸೂರು ವಿಧಾನಸಭಾ ಆಭ್ಯರ್ಥಿಯಾಗಿ ಜನರ ಮನಗೆಲ್ಲಲಾಗದೇ ಸುಸ್ತಾದರು. ಮತ್ತೆ ಬಣ್ಣದ ಪ್ರಪಂಚಕ್ಕೆ 'ಆಪ್ತಮಿತ್ರ" ಚಿತ್ರದೊಂದಿಗೆ ಪ್ರವೇಶ ಪಡೆದರು. ಕಳ್ಳ-ಕುಳ್ಳ ಜೋಡಿ ಮತ್ತೆ ಒಂದಾಯಿತು. ವಿಷ್ಣುವರ್ಧನ್‌-ಸೌಂದರ್ಯ ಜೋಡಿಯ ಆಪ್ತಮಿತ್ರ ಇನ್ನೇನು ಬಿಡುಗಡೆಗೆ ಸಿದ್ಧ . ಆದರೆ ಈ ಸುದ್ದಿ ಆಪ್ತಮಿತ್ರನಿಗೆ ಸಂಬಂಧಿಸಿದ್ದಲ್ಲ , ಕಳ್ಳರಿಗೆ ಸಂಬಂಧಿಸಿದ್ದು .

ಆಪ್ತಮಿತ್ರ ಬಿಡುಗಡೆಗೆ ಮೊದಲೇ 'ಆಲಿಬಾಬಾ ಮತ್ತು ನಲವತ್ತು ಜನ ಕಳ್ಳರು" ಎನ್ನುವ ತಮ್ಮ ಮಹತ್ವಾಕಾಂಕ್ಷೆಯ ಚಿತ್ರ ಸೆಟ್ಟೇರಿಸುವ ಚಿಂತನೆಯಲ್ಲಿ ದ್ವಾರಕೀಶ್‌ ಮುಳುಗಿದ್ದಾರೆ. ಮಕ್ಕಳಿಂದ ಮುದುಕರವರೆಗೆ ಇಂದಿಗೂ ಆಕರ್ಷಣೆ ಉಳಿಸಿಕೊಂಡಿರುವ ಈ ಕತೆಯನ್ನು ಸಿನಿಮಾ ಮಾಡುವ ದ್ವಾರ್ಕಿ ಕನಸು ಇಂದಿನದಲ್ಲ. ರಾಜ್‌ಕುಮಾರ್‌ರನ್ನು ಹಾಕಿಕೊಂಡು ಚಿತ್ರ ಮಾಡಬೇಕು ಆಂದುಕೊಂಡಿದ್ದರಂತೆ. ಆಮೇಲೆ ವಿಷ್ಣುವರ್ಧನ್‌-ಶ್ರೀದೇವಿ ಜೋಡಿಯನ್ನು ಹಾಕಿಕೊಂಡು ಚಿತ್ರ ಮಾಡಲು ಯೋಚಿಸಿದ್ದರೂ ಆಗ ಕೈಗೂಡಿರಲಿಲ್ಲ. ಕನಸು ಮತ್ತೆ ಚಿಗುರಿದ್ದು ಈಗ.

ಗಾಂಧಿನಗರದ ಮೂಲಗಳ ಪ್ರಕಾರ- ಆಲಿಬಾಬಾದಲ್ಲಿ ನಟಿಸಲು ಉಪೇಂದ್ರ ಮನಸ್ಸು ಮಾಡಿದ್ದಾರೆ. ನಾಯಕಿಯಾಗಿ ಸುರಸುಂದರಿ ಐಶ್ವರ್ಯ ರೈ ಚಿತ್ರ ದ್ವಾರಕೀಶ್‌ ಕಣ್ಣಲ್ಲಿದೆ. ಈಕೆ ಹ್ಞೂಂ ಅಂತಾಳಾ ಅನ್ನೋದು ಬೇರೆ ಪ್ರಶ್ನೆ .

ಕನ್ನಡ ಮಾತ್ರವಲ್ಲದೆ 'ಆಲಿಬಾಬಾ ಮತ್ತು ನಲವತ್ತು ಜನ ಕಳ್ಳರು" ಚಿತ್ರವನ್ನು ತೆಲುಗು, ಇಂಗ್ಲಿಷ್‌ನಲ್ಲೂ ನಿರ್ಮಿಸುವ- ಜಪಾನ್‌, ರಷ್ಯಾ, ಇಟಲಿ ಮತ್ತಿತರ ದೇಶಗಳಲ್ಲಿ ಚಿತ್ರ ಪ್ರದರ್ಶಿಸುವ ಐಡಿಯಾ ದ್ವಾರಕೀಶ್‌ ಅವರದು. ಚಿತ್ರದ ಬಜೆಟ್‌ ಎಷ್ಟು ? ಈ ಬಗ್ಗೆ ದ್ವಾರಕೀಶರದು ಡೋಂಟ್‌ಕೇರ್‌ ಪಾಲಿಸಿ. ದ್ವಾರಕೀಶ್‌ ಹೇಳೋದು ಇಷ್ಟೇ- ದೃಶ್ಯ ಮಾಧ್ಯಮದ ಅಪಾರ ಸಾಧ್ಯತೆಗಳನ್ನು ಬಳಸಿಕೊಂಡು ಅನ್ನ ನೀಡಿದ ಅಭಿಮಾನಿ ದೇವರುಗಳಿಗೆ ಅತ್ಯುತ್ತಮ ಚಿತ್ರ ನೀಡುವುದು ನನ್ನ ಕರ್ತವ್ಯ. ಭಲೇ ಕುಳ್ಳ ದ್ವಾರಕೀಶ್‌ಗೆ ಬೆಸ್ಟ್‌ ಆಫ್‌ ಲಕ್‌ ಅನ್ನೋಣ.