‘ವರ್ಷದೊಳಗೆ ಅನುರೂಪ ವರನೊಡನೆ ಶಿಲ್ಪಾ ಮದುವೆ’

ಬೆಂಗಳೂರು : ಸಾರ್ವಜನಿಕ ವೇದಿಕೆ ಮೇಲೆ ಮುತ್ತು ಪಡೆದು ತಿಪ್ಪೆ ಸಾರಿಸಿದ ನಂತರ, ಶಿಲ್ಪಾಶೆಟ್ಟಿ ಎಲ್ಲಿಗೋದರು? ಎಲ್ಲೆಲ್ಲೋ ಹುಡುಕಬೇಡಿ.. ಅವರು ಸೀದಾ ಅಜ್ಜಿಮನೆಗೆ ಬಂದಿದ್ದಾರೆ!

ದಕ್ಷಿಣ ಕನ್ನಡ ಜಿಲ್ಲೆಯ ಕಾರ್ಕಳ ಸಮೀಪದ ಅಜ್ಜಿಮನೆಯಲ್ಲಿ ಎರಡು-ಮೂರು ದಿನದಿಂದ ತಂಗಿದ್ದಾರೆ. ಸುತ್ತಮುತ್ತಲಿನ ದೇವಸ್ಥಾನಗಳ ದರ್ಶನಕ್ಕಾಗಿ ಅವರು ಇನ್ನೂ ನಾಲ್ಕೈದು ದಿನ, ಕರ್ನಾಟಕದಲ್ಲಿರಲಿದ್ದಾರೆ. ತಾಯಿ ಸುನಂದಾ ಶೆಟ್ಟಿ , ತಂಗಿ ಶಮಿತಾ ಶೆಟ್ಟಿ ಜೊತೆ ಇದ್ದಾರೆ. ನಾಗಪೂಜೆ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಅವರು ಪಾಲ್ಗೊಂಡಿದ್ದಾರೆ. ರಾತ್ರಿಯಿಡೀ ಜಾಗರಣೆ ಮಾಡುತ್ತಾ, ಅವರು ಧಾರ್ಮಿಕ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದ್ದಾರೆ.

ನಿದ್ದೋಡಿ ಬಳಿ ಜಾರಂದಾಯ ದೇವಸ್ಥಾನಕ್ಕೆ ಭೇಟಿ ನೀಡಿದ ಅವರು, ಅಲ್ಲಿ ಭೂತ ಕೋಲ ವೀಕ್ಷಿಸಿದರು. ಈ ಸಂದರ್ಭದಲ್ಲಿ ದೈವವು, ಶಿಲ್ಪಾಗೆ ವರ ನೀಡಿದೆ. ಇನ್ನೊಂದು ವರ್ಷದೊಳಗಾಗಿ ಅನುರೂಪ ವರನನ್ನು ಶಿಲ್ಪಾ ಮದುವೆಯಾಗಲಿದ್ದಾಳೆ ಎಂದು ಅಭಯ ನೀಡಿದೆ.

ಅಪ್ಪಟ ಹಳ್ಳಿ ಹುಡುಗಿಯಂತೆಯೇ, ದೊಡ್ಡ ಸ್ಟಾರಿಣಿ ಎಂಬ ಬಿಂಕವಿಲ್ಲದೇ ಶಿಲ್ಪಾ ತಮ್ಮೂರಲ್ಲಿ ಸುತ್ತಾಡುತ್ತಿದ್ದಾರೆ. ಎಲ್ಲರನ್ನು ಅಕ್ಕರೆಯಿಂದ ಮಾತನಾಡಿಸುತ್ತಿದ್ದಾರೆ.

(ಏಜನ್ಸೀಸ್‌)