ಸುನೀಲ್‌ ಎನ್ನುವ ನಮ್ಮೂರ ಹುಡುಗ

ಸುನೀಲ್‌ರಾವ್‌. ಕಣ್ಣುಗಳಲ್ಲಿ ಮಿಂಚುಗಳನ್ನು ಅಡಗಿಸಿಕೊಂಡ ಭರವಸೆಯ ಯುವನಟ. ಹಾಗಂತ ಗಾಂಧಿನಗರ ಹಾಡಿಹೊಗಳುತ್ತಿದೆ. ಆದರೆ ಅವಕಾಶ ಮಾತ್ರ ಅಷ್ಟಕ್ಕಷ್ಟೇ.

ಕಿರುತೆರೆಯಲ್ಲಿ ಮೂಡಿಬಂದ ಯಶಸ್ವಿ ಧಾರಾವಾಹಿ 'ಮನ್ವಂತರ" ನಿಮಗೆ ನೆನಪಿರಬೇಕು. ಈ ಧಾರಾವಾಹಿಯಲ್ಲಿ ತನ್ನ ಅಭಿನಯ ಪ್ರಚುರ ಪಡಿಸಿ ಬೆಳ್ಳಿತೆರೆಯ ಮೆಟ್ಟಿಲುಗಳನ್ನೇರಿದ ಯಶಸ್ವಿ ನಟ ಸುನೀಲ್‌. ಅವರ ಅಭಿನಯದ 'ಪ್ರೀತಿ ಪ್ರೇಮ ಪ್ರಣಯ" ಶತದಿನೋತ್ಸವ ಕಂಡಿದೆ. 'ಎಕ್ಸ್‌ಕ್ಯೂಸ್‌ಮಿ" ಕೂಡ ಇತ್ತೀಚೆಗೆ ಶತಕ ಬಾರಿಸಿತು. ಸದ್ಯ ಚಿತ್ರೀಕರಣಗೊಳ್ಳುತ್ತಿರುವ 'ಬಾ ಬಾರೋ ರಸಿಕ " ಶತದಿನ ಆಚರಿಸಿದರೆ ಈತ ಹ್ಯಾಟ್ರಿಕ್‌ ಹಿರೋ...

ಸುನೀಲ್‌ ಗಾಯಕ ಕೂಡ. ರಂಗಭೂಮಿ, ಸಂಗೀತ ಕ್ಷೇತ್ರದೊಂದಿಗೆ ಸುನೀಲ್‌ಗೆ ನಿಕಟವಾದ ನಂಟಿದೆ. ಇಲ್ಲದೆ ಏನು ; ಆತನ ತಾಯಿ ಹೇಳಿಕೇಳಿ ಕನ್ನಡದ ಕೋಗಿಲೆ, ಬಿ.ಕೆ.ಸುಮಿತ್ರಾ.

ಸುನೀಲ್‌ ಹೊಸ ಚಿತ್ರ 'ಬಾ ಬಾರೋ ರಸಿಕ " . ಈ ಚಿತ್ರದ ಚಿತ್ರೀಕರಣಕ್ಕಾಗಿ ಮೊನ್ನೆ ಹೊಸೂರು ರಸ್ತೆಗೆ ಬಂದಿದ್ದ ಸುನೀಲ್‌- 'ಇಂಡಿಯಾ ಇನ್ಫೋ"ಗೂ ಬಂದಿದ್ದರು. ಒಂದೆಡೆ ನಿಲ್ಲದೆ ಚಡಪಡಿಸುವ ಆತನನ್ನು ಕಂಡಾಗ ಕಾಲಲ್ಲಿ ಚಕ್ರವಿದೆ ಅನ್ನಿಸದಿರದು. ಆದರೆ, ನಾಯಕರುಗಳಿಗೆ ಇರುವ 'ಅಹಂ"ನಿಂದ ಸುನೀಲ್‌ ಮಾರುದೂರ. ಆತನಾಯ್ತು ಆಭಿನಯವಾಯ್ತು. ಕನ್ನಡ ಚಿತ್ರರಂಗಕ್ಕೆ ನಿಜವಾಗ್ಲೂ ಬೇಕಾದವರು ಇಂಥವರೇ ತಾನೆ !

ಅಷ್ಟೇ ಅಲ್ಲ , ಈ ತುಂಟಾಟದ ಸುನೀಲ್‌ ಆಂಗ್ಲ ಚಿತ್ರವೊಂದರಲ್ಲಿಯೂ ಅಭಿನಯಿಸಿದ್ದಾನೆ. ಸುನೀಲ್‌, ತನ್ನ ಗುಣ ಮತ್ತು ಪ್ರತಿಭೆಯಿಂದ ಚಿತ್ರರಂಗದಲ್ಲಿ ಇನ್ನಷ್ಟು ಯಶಸ್ಸಿನ ಮೆಟ್ಟಿಲುಗಳನ್ನೇರಲಿ ಎಂದು ಹಾರೈಸುವ.