ಡೆಹ್ರಾಡೂನ್‌ನಲ್ಲಿ ಧ್ಯಾನ್ ಮದುವೆಗೆ ಗಟ್ಟಿಮೇಳ

ಕನ್ನಡ ಚಿತ್ರರಂಗದಲ್ಲಿ 'ಜೂಟಾಟ' ಆಡಿ'ಅಮೃತಧಾರೆ' ಹರಿಸಿದ ಹುಡುಗ ಧ್ಯಾನ್ ಅಲಿಯಾಸ್ ಸಮೀರ್ ದತ್ತಾನಿ ಮದುವೆಗೆ ಮಾರ್ಚ್ 12ರಂದು ಗಟ್ಟಿಮೇಳ ಮೊಳಗಲಿದೆ. ತನ್ನ ಬಾಲ್ಯದ ಗೆಳತಿ ರಿತಿಕಾ ಜಾಲಿ ಅವರನ್ನು ಡೆಹ್ರಾಡೂನಲ್ಲಿ ಧ್ಯಾನ್ ವರಿಸಲಿದ್ದಾರೆ.

ರಿತಿಕಾ ಅವರ ಸ್ವಸ್ಥಳ ಡೆಹ್ರಾಡೂನ್‌ ಆದ ಕಾರಣ ಮದುವೆ ಅಲ್ಲಿಯೇ ಆಗಬೇಕು ಎಂದು ಆಕೆ ಪಟ್ಟು ಹಿಡಿದಿದ್ದರಂತೆ. ಇದಕ್ಕೆ ಧ್ಯಾನ್ ಕೂಡ ಮೌನ ಸಮ್ಮತಿ ನೀಡಿದ್ದಾರೆ ಎನ್ನುತ್ತವೆ ಮೂಲಗಳು. ಮದುವೆಗೆ ಅದ್ದೂರಿ ಸಿದ್ಧತೆ ನಡೆದಿದ್ದು, ಮದುಮಗ ಧ್ಯಾನ್ ಈಗ ಹೊಸ ಉತ್ಸಾಹದಲ್ಲಿದ್ದಾರೆ.

ಈ ಹಿಂದೆ ಡೆಹ್ರಾಡೂನ್‌ನಲ್ಲಿ ಭಾರತ ಕ್ರಿಕೆಟ್ ತಂಡದ ನಾಯಕ ಧೋನಿ ಹಾಗೂ ಸಾಕ್ಷಿ ಮದುವೆ ದಿಢೀರ್ ಅಂತ ನಡೆದಿತ್ತು. ಈಗ ಧ್ಯಾನ್ ಮತ್ತು ರಿತಿಕಾ ಮದುವೆಗೆ ಡೆಹ್ರಾಡೂನ್ ಸಾಕ್ಷಿಯಾಗಲಿದೆ. ಧೋನಿ ಮದುವೆ ಬಳಿಕ ಡೆಹ್ರಾಡೂನ್‌‍ನಲ್ಲಿ ನಡೆಯಲಿರುವ ಎರಡನೇ ಅದ್ದೂರಿ ಮದುವೆ ಇದಾಗಲಿದೆ.

ಡಿಸೆಂಬರ್ 19ರಂದು ಧ್ಯಾನ್ ಮತ್ತು ರಿತಿಕಾ ಅವರ ನಿಶ್ಚಿತಾರ್ಥ ನಡೆದಿತ್ತು. ಅಂದಹಾಗೆ ಧ್ಯಾನ್ ಅಭಿನಯದ ಸಿಹಿಮುತ್ತು, ಓ ಮನಸೇ, ಉದ್ಯಾನ್ ಎಕ್ಸ್‌ಪ್ರೆಸ್ ಹಾಗೂ ಮಥುರಾನಗರಿ ಚಿತ್ರಗಳು ಬಿಡುಗಡೆಯಾಬೇಕಿವೆ.ಹೊಸ ಬಾಳಿನ ಹೊಸಿಲಲಿ ನಿಂತಿರುವ ಧ್ಯಾನ್‌ಗೆ ಶುಭವಾಗಲಿ ಎಂದು ದಟ್ಸ್‌ಕನ್ನಡ ಹಾರೈಸುತ್ತದೆ. [ಮದುವೆ]