‘ಮಸಾಲ’ನಾಗಶೇಖರ್‌ ಚಿತ್ರದಲ್ಲಿ ಕಾಮಿಡಿ ಟೈಂ ಗಣೇಶ್‌!

ಕತೆ, ಚಿತ್ರಕತೆಯನ್ನು ಬರೆದು ಆ್ಯಕ್ಷನ್‌-ಕಟ್‌ ಹೇಳುವ ಅವರ ಬಹುದಿನದ ಹಂಬಲ, ನಿಜವಾಗುವ ದಿನಗಳು ಹತ್ತಿರದಲ್ಲಿಯೇ ಇವೆ. ನಾಗಶೇಖರ್‌ ಚಿತ್ರದಲ್ಲಿ ನಟಿಸಲು, ಸ್ಯಾಂಡಲ್‌ವುಡ್‌ನ ಸದ್ಯದ ಓಡುವ ಕುದುರೆ 'ಕಾಮಿಡಿ ಟೈಂ" ಗಣೇಶ್‌ ಗ್ರೀನ್‌ ಸಿಗ್ನಲ್‌ ನೀಡಿದ್ದಾರೆ. ಚಿತ್ರದ ಕತೆ ಬಗ್ಗೆ ಸಾಕಷ್ಟು ಕುತೂಹಲ ಕೆರಳಿಸಿರುವ ನಾಗಶೇಖರ್‌, ಏನ್‌ ಬೇಕಾದರೂ ಕೇಳಿ, ಕತೆ ತಂಟೆಗೆ ಬರಬೇಡಿ ಎನ್ನುತ್ತಿದ್ದಾರೆ!

ಚಿತ್ರಕತೆ ಬರೆಯಲು ಸುಮಾರು 1ವರ್ಷ ತೆಗೆದುಕೊಂಡಿರುವ ನಾಗಶೇಖರ್‌, ಅತ್ಯಂತ ಶ್ರದ್ಧೆಯಿಂದ ಹೊಸ ಜವಾಬ್ದಾರಿ ನಿರ್ವಹಿಸಲು ಮಾಡಿರುವ ಹೋಮ್‌ವರ್ಕ್‌ ಕಡಿಮೆಯೇನಿಲ್ಲ. ಚೊಚ್ಚಲ ಚಿತ್ರಕ್ಕೆ ಚೆಂದದ ಹಾಡುಗಳನ್ನು ಮಾಡಲು ಬಯಸಿರುವ ಅವರು, ಚಿತ್ರದ ಸಂಗೀತಕ್ಕಾಗಿ ಇಳಯರಾಜರ ಬೆನ್ನು ಹತ್ತಿದ್ದಾರೆ. ನೇರವಾಗಿ ಈ ಬಗ್ಗೆ ಇಳಯರಾಜ ಜೊತೆ ಪುಟ್ಟ ಮಾತುಕತೆ ಸಹಾ ನಡೆಸಿದ್ದಾರೆ.

ಕೆ.ಮಂಜು ಸಿನಿಮಾ ನಿರ್ಮಾಣಕ್ಕೆ ಆಸಕ್ತಿವಹಿಸಿದ್ದು, ಎಲ್ಲವೂ ಸುಸೂತ್ರವಾದರೆ, ಹೊಸ ನಿರ್ದೇಶಕನ ಸ್ಥಾನವನ್ನು ನಾಗಶೇಖರ್‌ ಅಲಂಕರಿಸಲಿದ್ದಾರೆ.