ಜರಾಸಂಧ '3 ಕೋಟಿ' ರು. ಗಳಿಕೆ ವರದಿ ಠುಸ್

ಹ್ಯಾಟ್ರಿಕ್ ನಿರ್ದೇಶಕ ಶಶಾಂಕ್‌ 'ಜರಾಸಂಧ' ಚಿತ್ರಕ್ಕೆ ವಿಮರ್ಶಕರಿಂದ ಹಾಗೂ ಪ್ರೇಕ್ಷಕರಿಂದ ಕಟು ಟೀಕೆ ವ್ಯಕ್ತವಾಗಿತ್ತು. ಆದರೆ 'ಜರಾಸಂಧ' ಮೊದಲ ದಿನವೇ 1 ಕೋಟಿ ರು, 2 ನೇ ದಿನ 1, ಹಾಗೂ 3 ನೇ ದಿನ 1, ಹೀಗೆ ಒಟ್ಟೂ 3 ಕೋಟಿ ರು. ಭರ್ಜರಿ ಕಲೆಕ್ಷನ್ ಆಗಿದೆ. ಇದು ವಿಜಯ್ ನಟನೆಯ, ಈವರೆಗಿನ ಎಲ್ಲಾ ಚಿತ್ರಗಳಿಗಿಂತ ಹೆಚ್ಚು" ಎಂದು ಮಾಧ್ಯಮಗಳಿಗೆ ಸುದ್ದಿ ನೀಡಿದ್ದರು, ನಿರ್ದೇಶಕ ಶಶಾಂಕ್.

ಆದರೆ, ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ಅಧ್ಯಕ್ಷ ಕೆ.ವಿ. ಚಂದ್ರಶೇಖರ್ ಹೇಳುವುದೇ ಬೇರೆ. "ದುನಿಯಾ ವಿಜಯ್-ಪ್ರಣೀತಾ ಚಿತ್ರ 'ಜರಾಸಂಧ' ಅಷ್ಟೊಂದು ಸಂಪಾದನೆ ಮಾಡಿಯೇ ಇಲ್ಲ. ಇದು ಸುಳ್ಳು ವರದಿ. ಇತ್ತೀಚಿನ ದಿನಗಳಲ್ಲಿ ಬಾಕ್ಸಾಫೀಸ್ ವರದಿ ಅನ್ನೋದು ಮಾಮೂಲಿಯಾಗುತ್ತಿದೆ. ಚಿತ್ರಮಂದಿರದತ್ತ ಪ್ರೇಕ್ಷಕರು ಸುಳಿಯದೇ ಇದ್ದರೂ, ನಮ್ಮ ಸಿನಿಮಾ ಮೊದಲ ದಿನವೇ ಇಷ್ಟು ಗಳಿಸಿದೆ ಅಂತ ನಿರ್ಮಾಪಕ-ನಿರ್ದೇಶಕರು ಹೇಳಿಕೊಳ್ಳುತ್ತಾರೆ."

'ಸಿದ್ಲಿಂಗು' ಆಡಿಯೋ ಬಿಡುಗಡೆ ಸಮಾರಂಭ ಈ ವಿಷಯದ ಮಾತುಕತೆ ನಡೆದಿದೆ. ದುನಿಯಾ ವಿಜಯ್ ಕೂಡ ಅಲ್ಲಿದ್ದರು. ಪತ್ರಕರ್ತರು ಜರಾಸಂಧದ ಗಳಿಕೆ ಕುರಿತು ಪ್ರಶ್ನೆ ಹಾಕಿದ್ದರು. ಇದಕ್ಕೆ ಉತ್ತರಿಸಿದ ಚಂದ್ರಶೇಖರ್, "ಬಾಕ್ಸಾಫೀಸ್ ವರದಿಯಲ್ಲಿ ಹೇಳಿರುವುದು ಅರ್ಧಸತ್ಯ. ಮೂರು ದಿನಗಳಲ್ಲಿ ಮೂರು ಕೋಟಿ ರೂಪಾಯಿಗಳನ್ನು ಈ ಚಿತ್ರ ಸಂಪಾದಿಸಿಲ್ಲ. ಅಷ್ಟು ಬಿಡಿ, ಅದರ ಅರ್ಧದಷ್ಟೂ ಗಳಿಕೆಯಾಗಿಲ್ಲ" ಎಂದರು.

ಹಾಗಿದ್ದರೆ ಮೊಗ್ಗಿನ ಮನಸು, ಕೃಷ್ಣನ್ ಲವ್ ಸ್ಟೋರಿಗಳಂತಹ ಸದಭಿರುಚಿಯ ಚಿತ್ರಗಳ ನಿರ್ದೇಶಕ ಶಶಾಂಕ್ ಸುಳ್ಳು ಹೇಳಿದರೇ? ಈ ಬಗ್ಗೆ ಸ್ವತಃ ಪ್ರದರ್ಶಕರೂ ಆಗಿರುವ ಚಂದ್ರಶೇಖರ್ ನೇರವಾಗಿ ಏನೂ ಹೇಳಲಿಲ್ಲ. ಬದಲಿಗೆ, ಹೀಗೆ ಸುಳ್ಳು ಬಾಕ್ಸಾಫೀಸ್ ವರದಿಗಳನ್ನು ನೀಡಿ ಪ್ರೇಕ್ಷಕರು ಮತ್ತು ಚಿತ್ರರಂಗವನ್ನು ಹಾದಿ ತಪ್ಪಿಸುತ್ತಿರುವವರು ಬಹಳ ಮಂದಿ ಇದ್ದಾರೆ ಎಂದು ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸಿದರು. (ಒನ್ ಇಂಡಿಯಾ ಕನ್ನಡ)