ಥೈಲ್ಯಾಂಡ್ ಅಖಾಡದಲ್ಲಿ ನಟ ಅರುಣ್‌ ಸಾಗರ್‌ ಪುತ್ರನ ಅಪರೂಪದ ಸಾಧನೆ!

ರಾಜಡಮ್ನೆರ್ನ್ ಸ್ಟೇಡಿಯಂ ವಿಶೇಷತೆ

ಹೌದು, ರಾಜಡಮ್ನೆರ್ನ್ ಪ್ರಪಂಚದ ಮೊದಲ ಮುವಾಯ್​ ಥಾಯ್ ಸ್ಟೇಡಿಯಂ. ಹಾಗಾಗಿ ಇಲ್ಲಿ ಪಂದ್ಯ ಆಡುವುದು, ಗೆಲ್ಲುವುದು ಎಲ್ಲಾ ಮುವಾಯ್​ ಥಾಯ್ ಪಟುಗಳ ಕನಸು. ಆ ಸ್ಟೇಡಿಯಂನಲ್ಲಿ ಆಡಿ ಗೆದ್ದ ಮೊದಲ ಭಾರತೀಯ ಎನ್ನುವ ಹೆಗ್ಗಳಿಕೆಗೆ ಸೂರ್ಯ ಸಾಗರ್ ಭಾಜನರಾಗಿದ್ದಾರೆ. ಸಂಗೀತ ನಿರ್ದೇಶಕ ವಾಸುಕಿ ವೈಭವ್, ನಿರ್ದೇಶಕ ಕೆ. ಎಂ ಚೈತನ್ಯ ಕಾಮೆಂಟ್ ಮಾಡಿ ಅಭಿನಂದನೆ ತಿಳಿಸಿದ್ದಾರೆ.

ಇದು ಬರೀ ಆರಂಭ ಅಷ್ಟೇ!

ರಾಜಡಮ್ನೆರ್ನ್ ಪಂದ್ಯ ಗೆದ್ದ ಖುಷಿಯನ್ನು ಹಂಚಿಕೊಂಡಿರುವ ಸೂರ್ಯ ಸಾಗರ್, 'ನಾನು ಈ ಸಂಭ್ರಮವನ್ನು ಈ ಕ್ಷಣಕ್ಕಷ್ಟೆ ಸೆಲೆಬ್ರೆಟ್ ಮಾಡುತ್ತಿದ್ದೇನೆ. ಇದು ಆರಂಭ ಅಷ್ಟೇ. ಈ ಆಟದಲ್ಲಿ ಮತ್ತಷ್ಟು ಮೇಲೆರಲು ಸಾಕಷ್ಟು ಕಲಿಯುವುದು, ಕರಗತ ಮಾಡಿಕೊಳ್ಳುವುದು ಬಾಕಿಯಿದೆ. ನನ್ನ ಬೆಂಬಲಕ್ಕೆ ನಿಂತು ಕುಟುಂಬ ಸದಸ್ಯರು ಹಾಗೂ ಪ್ರೋತ್ಸಾಹ ನೀಡಿದ ಎಲ್ಲರಿಗೂ ಧನ್ಯವಾದ' ಎಂದು ಬರೆದುಕೊಂಡಿದ್ದಾರೆ.

3 ವರ್ಷಗಳ ಹಿಂದೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ಗೆಲುವು

2019ರಲ್ಲಿ ಅಂತರಾಷ್ಟ್ರೀಯ ಮಟ್ಟದ ಮಾಕ್ಸ್ ಮುವಾಯ್​ ಥಾಯ್ ಸ್ಪರ್ಧೆ ಥಾಯ್ಲಂಡ್‌ನ ಪಟಾಯದಲ್ಲಿ ನಡೆದಿತ್ತು. ಇದರಲ್ಲಿ ವಿವಿಧ ದೇಶದ ಸ್ಪರ್ಧಿಗಳು ಭಾಗಿಯಾಗಿದ್ದರು. 21 ವರ್ಷದ ಸೂರ್ಯ ಭಾರತವನ್ನು ಪ್ರತಿನಿಧಿಸಿದ್ದರು. ವಿಶೇಷ ಅಂದರೆ, ಅದೇ ಮೊದಲ ಬಾರಿಗೆ ಭಾರತಕ್ಕೆ ಗೆಲುವು ಸಿಕ್ಕಿತ್ತು. ಥಾಯ್ ಫೈಟರ್ ಅರ್ಪಿಂಗ್ ಚಿತಾಂಗ್ ವಿರುದ್ಧ ಸೂರ್ಯ ಗೆದ್ದು ಬೀಗಿದ್ದರು.

ಸೂರ್ಯ ಸಾಗರ್ ಗುರಿ

ಥಾಯ್ಲೆಂಡ್‌ನ ರಾಷ್ಟ್ರೀಯ ಕ್ರೀಡೆಯಾಗಿರುವ ಮುವಾಯ್​ ಥಾಯ್‌ನ ದೇಹದ ಎಂಟು ಭಾಗಗಳನ್ನು ಬಳಸಿ ಆಡುತ್ತಾರೆ. ನೋಡಲು ಬಾಕ್ಸಿಂಗ್‌ ರೀತಿ ಕಾಣುವ ಈ ಸಮರ ಕಲೆಗೆ ಕಠಿಣ ತರಬೇತಿ ಅವಶ್ಯಕ. ಹಲವು ವರ್ಷಗಳಿಂದ ಮುವಾಯ್​ ಥಾಯ್ ಕಲಿಯುತ್ತಿರುವ ಸೂರ್ಯನಿಗೆ ಒಲಂಪಿಕ್ಸ್‌ನಲ್ಲಿ ಭಾರತವನ್ನು ಪ್ರತಿನಿಧಿಸುವ ಆಸೆ ಇದ್ದು ಅದಕ್ಕಾಗಿ ತಯಾರಿಯನ್ನು ನಡೆಸುತ್ತಿದ್ದಾರೆ. ಇನ್ನು ಕಿಚ್ಚ ಸುದೀಪ್ ಹಾಗೂ ರಾಕಿಂಗ್ ಸ್ಟಾರ್ ಯಶ್ ಎದುರು ಸಿನಿಮಾದಲ್ಲಿ ವಿಲನ್ ಆಗಿ ನಟಿಸುವ ಆಸೆಯೂ ಅವರಿಗಿದೆ.