46 ವರ್ಷದ ಹಿಂದೆ ರಾಜ್‌ಕುಮಾರ್ ಹೇಳಿದ್ದ ಮಾತು ನೆನಪಿಸಿಕೊಂಡ ಕಮಲ್ ಹಾಸನ್

46 ವರ್ಷದ ಹಿಂದೆ ಆಡಿದ್ದ ಮಾತು ನೆನಪು ಮಾಡಿಕೊಂಡ ಕಮಲ್

ಕರ್ನಾಟಕದೊಂದಿಗಿನ ನಂಟಿನ ಬಗ್ಗೆ ಮಾತನಾಡುತ್ತಾ ರಾಜ್‌ಕುಮಾರ್ ಅವರನ್ನು ನೆನಪು ಮಾಡಿಕೊಂಡ ಕಮಲ್ ಹಾಸನ್, ''ನಾನು ಕೇವಲ 21 ವರ್ಷ ವಯಸ್ಸಿನವನಾಗಿದ್ದಾಗ ಒಬ್ಬ ಅದ್ಭುತ ನಟ ನನ್ನನ್ನು ಮನೆಗೆ ಕರೆಸಿದ್ದರು. 'ಬಹಳ ಚೆನ್ನಾಗಿ ನಟಿಸುತ್ತೀಯ' ಎಂದಿದ್ದರು. ಅವರೇ ಡಾ.ರಾಜ್‌ಕುಮಾರ್. ಅಂಥಹಾ ದೊಡ್ಡ ವ್ಯಕ್ತಿ ನನ್ನನ್ನು 'ನೀವು' ಎಂದು ಸಂಭೋದಿಸುತ್ತಿದ್ದರು'' ಎಂದು ನೆನಪು ಮಾಡಿಕೊಂಡರು ಕಮಲ್ ಹಾಸನ್.

''ನನ್ನ ಮೊದಲ ನಿರ್ಮಾಣ ಸಂಸ್ಥೆಯನ್ನು ಉದ್ಘಾಟಿಸಿದ್ದು ರಾಜ್‌ಕುಮಾರ್''

''ನನ್ನ ಮೊದಲ ನಿರ್ಮಾಣ ಸಂಸ್ಥೆ 'ರಾಜಪಾರ್ವೈ' ಅನ್ನು ಉದ್ಘಾಟಿಸಿದ್ದು ಡಾ ರಾಜ್‌ಕುಮಾರ್. ನಾನು ಇಲ್ಲಿ 'ಪುಷ್ಪಕ ವಿಮಾನ' ಮಾಡಿದಾಗ ಮೊದಲ ದಿನ ಬಂದು ನನ್ನ ಬೆನ್ನುತಟ್ಟಿದ್ದು ಡಾ ರಾಜ್‌ಕುಮಾರ್. ಅವರೊಬ್ಬ ಅದ್ಭುತ ವ್ಯಕ್ತಿ. ಅಷ್ಟು ದೊಡ್ಡ ನಟರಾಗಿದ್ದರೂ ಎಂಥಹಾ ವಿನಯ ಅವರದ್ದು, ಈಗ ಅವಕಾಶ ಕೇಳಲು ಬಂದಿದ್ದಾರೇನೋ ಎಂಬಂತೆ ಬಾಗಿ ವಿನಯದಿಂದ ಮಾತನಾಡುತ್ತಿದ್ದರು. ನನಗೆ ಆಗ ಕೇವಲ 27 ವರ್ಷ ವಯಸ್ಸು, ಅವರ ಮನೆಗೆ ಹೋದರೆ, 'ಬನ್ನಿ, ಬನ್ನಿ' ಎಂದು ವಿನಯದಿಂದ ಆತ್ಮೀಯತೆಯಿಂದ ಕರೆಯುತ್ತಿದ್ದರು'' ಎಂದು ನೆನಪಿಸಿಕೊಂಡಿದ್ದಾರೆ ಕಮಲ್ ಹಾಸನ್.

''ತಮ್ಮ ಒಳ್ಳೆಯತನವನ್ನು ಮಕ್ಕಳಿಗೆ ನೀಡಿ ಹೋಗಿದ್ದಾರೆ''

''ರಾಜ್‌ಕುಮಾರ್ ಜೊತೆಗೆ ಹಲವು ಅದ್ಭುತ ಕ್ಷಣಗಳನ್ನು ನಾನು ಕಳೆದಿದ್ದೇನೆ. ಇತರ ನಟರನ್ನು ಹೇಗೆ ಗೌರವಿಸಬೇಕು ಎಂಬುದನ್ನು ನಾನು ಅವರಿಂದ ಕಲಿತಿದ್ದೇನೆ. ಎಲ್ಲದಕ್ಕಿಂತಲೂ ಮುಖ್ಯವಾದುದೆಂದರೆ ಅವರು ತಮ್ಮ ಆ ಗುಣವನ್ನು ಅವರ ಮಕ್ಕಳಿಗೆ ನೀಡಿ ಹೋಗಿದ್ದಾರೆ. ವಿನಯದಿಂದ ಇರುವುದಕ್ಕಿಂತಲೂ ದೊಡ್ಡತನವೆಂದರೆ ತಮ್ಮ ಆ ಒಳ್ಳೆಯತನವನ್ನು ತಮ್ಮ ಮಕ್ಕಳಿಗೆ ಕೊಟ್ಟು ಹೋಗಿದ್ದಾರೆ, ಅವರ ಮಕ್ಕಳು ತಂದೆಯ ಹಾದಿಯಲ್ಲಿ ಸಾಗುತ್ತಿದ್ದಾರೆ'' ಎಂದಿದ್ದಾರೆ ಕಮಲ್ ಹಾಸನ್.

''ಪುನೀತ್ ಜೊತೆ ಸಿನಿಮಾ ಮಾಡುತ್ತಿದ್ದೆನೋ ಏನೋ?''

ಪುನೀತ್ ರಾಜ್‌ಕುಮಾರ್ ಬಗ್ಗೆಯೂ ಮಾತನಾಡಿದ ಕಮಲ್ ಹಾಸನ್, ''ಪುನೀತ್ ಕಾಲವಾದ ಬಹಳ ದಿನಗಳ ಬಳಿಕ ನಾನು ಪುನೀತ್ ರಾಜ್‌ಕುಮಾರ್ ಮನೆಗೆ ಭೇಟಿ ನೀಡಿದ್ದೆ. ಅಣ್ಣಾವ್ರ ಕುಟುಂಬ ಒಂದು ರೀತಿ ನಮ್ಮದೇ ಕುಟುಂಬದ ರೀತಿ. ಈ ಮಗು (ಅಪ್ಪು)ವನ್ನು ನೀವು ದೊಡ್ಡ ಸ್ಟಾರ್ ಮಾಡಿದಿರಿ. ಆದರೆ ಕೆಲವೊಮ್ಮೆ ಅನಿಸುತ್ತದೆ ದೇವರು ಬೇರೆಯದೇ ಏನೋ ಉದ್ದೇಶ ಹೊಂದಿದ್ದಾನೆ ಎಂದು. ಆದರೆ ಪುನೀತ್ ಬದುಕಿದ್ದಿದ್ದರೆ ಬಹುಷಃ ಅವರೊಟ್ಟಿಗೆ ನಾನು ಸಿನಿಮಾ ಮಾಡಿರುತ್ತಿದ್ದೆನೋ ಏನೋ?'' ಎಂದಿದ್ದಾರೆ ಕಮಲ್ ಹಾಸನ್. ಪುನೀತ್ ರಾಜ್‌ಕುಮಾರ್ ಅನ್ನು ಎತ್ತಿ ಆಡಿಸಿದವರಲ್ಲಿ ಕಮಲ್ ಹಾಸನ್ ಒಬ್ಬರು.